Anger and Heart attack: ગુસ્સો બની શકે છે હાર્ટ એટેકનું કારણ? જાણો નિષ્ણાતો શું કહે છે!

Anger and Heart attack: આજકાલ નાની ઉંમરે હાર્ટ એટેકના કેસ ઝડપથી વધી રહ્યા છે, જે ચિંતાનો વિષય છે. અગાઉ હાર્ટ એટેક મોટે ભાગે વૃદ્ધોમાં જોવા મળતો હતો, પરંતુ હવે યુવાનો પણ આનો શિકાર બની રહ્યા છે. તાજેતરમાં ફિટનેસ કોચે ઈન્સ્ટાગ્રામ પર એક રીલ શેર કરી, જેમાં તેમણે દાવો કર્યો કે સતત ગુસ્સો હાર્ટ એટેકનું જોખમ વધારી શકે છે. હાર્વર્ડની સ્ટડીનો હવાલો આપતા તેમણે લોકોને ગુસ્સાના જોખમો વિશે ચેતવણી આપી. તો શું ખરેખર ગુસ્સો હૃદય માટે ખતરનાક છે? ચાલો જાણીએ.

ગુસ્સો અને હાર્ટ એટેકનું કનેક્શન

હાર્વર્ડ યુનિવર્સિટીના રિસર્ચ પ્રમાણે, જ્યારે આપણે અતિશય માનસિક અથવા ઈમોશનલ સ્ટ્રેસમાં હોઈએ છીએ, ત્યારે શરીરમાં ફેરફારો થાય છે. આ ફેરફારો હૃદયને લોહી પહોંચાડતી નળીઓને અસર કરે છે, જેને ઈસ્કેમિયા કહેવાય છે. જો કોઈને પહેલાથી હૃદયની બીમારી હોય, તો આ સ્થિતિ હાર્ટ એટેકનું જોખમ બમણું કરી શકે છે.

2020ની એક સ્ટડીમાં જણાવાયું છે કે ગુસ્સો, ચિંતા કે દુઃખ જેવા ઈમોશનલ ટ્રિગર્સ હૃદય સંબંધિત સમસ્યાઓનું કારણ બની શકે છે. આ સમયે એડ્રેનાલિન અને કોર્ટિસોલ જેવા સ્ટ્રેસ હોર્મોન્સ બ્લડ પ્રેશર અને હૃદયના ધબકારા વધારે છે, જે હાર્ટ એટેકનું ટ્રિગર બની શકે છે.

મહિલાઓ પર વધુ અસર

નિષ્ણાતોના જણાવ્યા પ્રમાણે, સ્ટ્રેસ હૃદયની નાની રક્તવાહિનીઓને અસર કરે છે, જે મહિલાઓમાં વધુ જોવા મળે છે. 2023ની એક સ્ટડીમાં 313 દર્દીઓનો અભ્યાસ કરવામાં આવ્યો, જેમાં જાણવા મળ્યું કે હાર્ટ એટેકના 48 કલાક પહેલા અતિશય ગુસ્સો અનુભવનારાઓમાં આગામી 2 કલાકમાં હાર્ટ એટેકનું જોખમ 8.5 ગણું વધ્યું હતું.

નિષ્ણાતો કહે છે કે “ગુસ્સો માત્ર હાર્ટ એટેકનું જ કારણ નથી, પરંતુ તે હૃદય પર તણાવ વધારે છે. ખાસ કરીને હાઈ બ્લડ પ્રેશર, ડાયાબિટીસ કે ધૂમ્રપાન કરનારાઓ માટે આ વધુ ખતરનાક છે.” તેઓ બેલેન્સ્ડ ડાયટ, રેગ્યુલર એક્સરસાઈઝ, યોગ અને ધ્યાન અપનાવવાની સલાહ આપે છે.

ગુસ્સો અને સ્ટ્રેસ હૃદયના સ્વાસ્થ્ય માટે ખતરો બની શકે છે. તેનાથી બચવા માટે લાઈફસ્ટાઈલમાં સુધારો, તણાવ ઘટાડવાની ટેકનિક અને હેલ્ધી ડાયટ અપનાવવું જરૂરી છે. હૃદયની તકલીફ ધરાવતા લોકોએ ખાસ કાળજી રાખવી જોઈએ.

આ પણ વાંચો-હરિદ્વાર અર્ધકુંભ 2027: પહેલીવાર સાધુ-સંન્યાસીઓ સાથે 3 અમૃત સ્નાન, તારીખો જાહેર