કોંગ્રેસ અધ્યક્ષ મલ્લિકાર્જુન ખડગેએ ઓપરેશન સિંદૂરની કરી પ્રશંસા, કહ્યું- અમે સેના અને સરકારની સાથે

Operation Sindoor : જમ્મુ અને કાશ્મીરના પહેલગામમાં થયેલા આતંકવાદી હુમલાના જવાબમાં, ભારતીય સેનાએ આતંકવાદ સામે મોટી કાર્યવાહી કરી છે. એક સંયુક્ત ઓપરેશન હેઠળ, ભારતની ત્રણેય સેનાઓએ પાકિસ્તાનમાં સ્થિત કુલ 9 આતંકવાદી ઠેકાણાઓ પર હવાઈ હુમલા કરીને કાર્યવાહી કરી છે. રિપોર્ટ અનુસાર, આ હુમલામાં લગભગ 90 આતંકવાદીઓ માર્યા ગયા છે. ભારતે આ કાર્યવાહીને 'સિંદૂર ઓપરેશન' નામ આપ્યું છે.

ભારત સરકારે પોતાના નિવેદનમાં કહ્યું છે કે, "આ કાર્યવાહીમાં પાકિસ્તાન અને પાકિસ્તાન અધિકૃત કાશ્મીરમાં આતંકવાદી માળખાને નિશાન બનાવવામાં આવ્યું છે, જ્યાંથી ભારત પર આતંકવાદી હુમલાઓનું આયોજન કરવામાં આવ્યું હતું." બીજી તરફ, પાકિસ્તાનના વડા પ્રધાન શાહબાઝ શરીફે ભારત દ્વારા કરવામાં આવેલા હવાઈ હુમલાને 'કાયરતાપૂર્ણ' ગણાવ્યો છે.

કોંગ્રેસ અધ્યક્ષ મલ્લિકાર્જુન ખડગેએ પાકિસ્તાનમાં છુપાયેલા આતંકવાદીઓ સામે ભારતની કાર્યવાહીની પ્રશંસા કરી. તેમણે કહ્યું કે, અમને ભારતીય સેના પર ગર્વ છે. અમે સરકારના આ પગલાને સમર્થન આપીએ છીએ. સેનાની બહાદુરીને સલામ. અમે સરકારના દરેક પગલાની સાથે છીએ.

અમે સરકાર અને સંરક્ષણ દળોની સાથે : કેરળના મુખ્યમંત્રી

કેરળના સીએમ પિનરાઈ વિજયને કહ્યું કે, અમે કેન્દ્ર સરકાર અને અમારા સંરક્ષણ દળો દ્વારા આતંકવાદ સામે લેવામાં આવેલા પગલાંને સંપૂર્ણ સમર્થન આપીએ છીએ. પહેલગામ હત્યાકાંડના ગુનેગારોને ન્યાય અપાવવા અને પાકિસ્તાનમાં આતંકવાદી શિબિરો કાર્યરત ન રહે તે સુનિશ્ચિત કરવા માટે સરકાર તરફથી રાજદ્વારી હસ્તક્ષેપ સાથે આવા પગલાં લેવા જોઈએ. ભારતના નાગરિક તરીકે, ચાલો આપણે બધા દેશની એકતા અને અખંડિતતાના રક્ષણ માટે સાથે ઉભા રહીએ.

અમિત શાહે સરહદી રાજ્યોના મુખ્યમંત્રીઓ સાથે બેઠક યોજી

કેન્દ્રીય ગૃહમંત્રી અમિત શાહે સરહદી રાજ્યોના મુખ્યમંત્રીઓ, ડીજીપી અને મુખ્ય સચિવો સાથે બેઠક યોજી હતી. આ બેઠકમાં જમ્મુ અને કાશ્મીર, પંજાબ, રાજસ્થાન, ગુજરાત, ઉત્તરાખંડ, ઉત્તર પ્રદેશ, બિહાર, સિક્કિમ, પશ્ચિમ બંગાળના મુખ્યમંત્રીઓ અને લદ્દાખના ઉપરાજ્યપાલ અને જમ્મુ અને કાશ્મીરના ઉપરાજ્યપાલે ભાગ લીધો હતો.

આ પણ વાંચો-તમામ અર્ધલશ્કરી દળોની રજા રદ, આંતરરાષ્ટ્રીય સરહદ પર હાઇ એલર્ટ; MHAએ જાહેર કરી સૂચના