Joe Biden Diwali celebration: અમેરિકી રાષ્ટ્રપતિ જો બાયડને ‘વ્હાઈટ હાઉસ' ખાતે ઉજવ્યો દિવાળીનો તહેવાર, પ્રગટાવ્યા દીવા

અમેરિકાના રાષ્ટ્રપ્રમુખ જો.બાયડને સોમવારે વ્હાઇટ હાઉસ (અધિકૃત કાર્યાલય અને US પ્રમુખનું નિવાસસ્થાન) ખાતે દિવાળીની ઉજવણીનું આયોજન કર્યું હતું જેમાં દેશભરના ધારાશાસ્ત્રીઓ, અધિકારીઓ અને કોર્પોરેટ નેતાઓ સહિત 600થી વધુ પ્રતિષ્ઠિત ભારતીય અમેરિકનોએ હાજરી આપી હતી. બાયડને વ્હાઇટ હાઉસના ઇસ્ટ રૂમમાં કહ્યું, “રાષ્ટ્રપતિ તરીકે, મને વ્હાઇટ હાઉસમાં અત્યાર સુધીની સૌથી મોટી દિવાળીની ઉજવણીનું આયોજન કરવાનું સૌભાગ્ય મળ્યું છે. તે મારા માટે ઘણું મહત્વનું છે. સાઉથ એશિયન અમેરિકના સેનેટર, વાઇસ પ્રેસિડેન્ટ અને પ્રેસિડેન્ટ તરીકે સ્ટાફના મુખ્ય સભ્યો રહ્યા છે.

બાયડને દીવો પ્રગટાવ્યો

વાઇસ પ્રેસિડેન્ટ કમલા હેરિસ અને બાયડનના પત્ની જીલ બાયડન ચૂંટણી પ્રચારમાં વ્યસ્ત હોવાને કારણે આ કાર્યક્રમમાં હાજર રહી શક્યા ન હતા. બાયડનના ભાષણ પહેલાં, US સર્જન જનરલ વાઈસ એડમિરલ વિવેક એચ મૂર્તિ, નિવૃત્ત નૌકા અધિકારી અને નાસા અવકાશયાત્રી સુનિતા વિલિયમ્સ અને 'ભારતીય-અમેરિકન યુવા કાર્યકર' શ્રુતિ અમુલાએ પણ સમારોહને સંબોધિત કર્યો હતો. આ દરમિયાન સુનીતાએ ઈન્ટરનેશનલ સ્પેસ સ્ટેશન પરથી રેકોર્ડ કરેલો એક વીડિયો મેસેજ મોકલ્યો હતો. વ્હાઇટ હાઉસના 'બ્લુ રૂમ'માં વિધિપૂર્વક દીપ પ્રગટાવતા બાયડને કહ્યું કે દક્ષિણ એશિયાઈ અમેરિકન સમુદાયે અમેરિકન જીવનના દરેક ભાગને સમૃદ્ધ બનાવ્યો છે.

વ્હાઇટ હાઉસમાં દિવાળીની ઉજવણી

2003માં તત્કાલિન US પ્રમુખ જ્યોર્જ ડબલ્યુ બુશે વ્હાઇટ હાઉસમાં દિવાળી ઉજવવાની પરંપરા શરૂ કરી હતી. જો કે, તેમણે ક્યારેય વ્યક્તિગત રીતે દિવાળીની ઉજવણીમાં ભાગ લીધો ન હતો. 2009 માં, બરાક ઓબામા રાષ્ટ્રપતિ બન્યા પછી વ્હાઇટ હાઉસમાં દિવાળી પાર્ટીમાં વ્યક્તિગત રીતે હાજરી આપી હતી. તેમણે વ્હાઇટ હાઉસમાં દીવા પ્રગટાવીને દિવાળીની ઉજવણી કરી હતી. આ પછી, જ્યારે ડોનાલ્ડ ટ્રમ્પ 2017 માં રાષ્ટ્રપતિ બન્યા, ત્યારે તેમણે આ પરંપરાને આગળ વધારી. 2022 માં, રાષ્ટ્રપતિ જો બાયડન, પ્રથમ મહિલા જીલ બાયડન સાથે, વ્હાઇટ હાઉસમાં અત્યાર સુધીની સૌથી મોટી દિવાળી પાર્ટીનું આયોજન કર્યું હતું. આ દરમિયાન 200 થી વધુ લોકોને આમંત્રિત કરવામાં આવ્યા હતા.

આ પણ વાંચો - સ્પેન જવા માટે વિઝા કેવી રીતે મેળવશો, જાણો શું છે પ્રોસેસ, કયા દસ્તાવેજોની જરૂર પડશે