સરકારનું મોટું પગલું: 2.25 કરોડ લોકોના નામ રાશન કાર્ડમાંથી કટ! લિસ્ટમાં કંપની ડાયરેક્ટર અને ગાડી માલિકો પણ સામેલ

Free Ration Scheme: કેન્દ્ર સરકારે ગરીબો માટે ચાલતી મફત રાશન યોજનામાં પારદર્શિતા લાવવા માટે એક મોટું અને કડક પગલું ભર્યું છે. છેલ્લા 4થી 5 મહિનામાં દેશભરમાંથી લગભગ 2.25 કરોડ લોકોના નામ રાશન કાર્ડની યાદીમાંથી કાયમ માટે હટાવી દેવામાં આવ્યા છે. ખાદ્ય મંત્રાલયના જણાવ્યા અનુસાર, આ એવા લોકો હતા જેઓ સરકારી નિયમો મુજબ આ યોજના માટે લાયક ન હતા, છતાં પણ તેનો લાભ લઈ રહ્યા હતા.

સરકારનો મુખ્ય ઉદ્દેશ્ય એ સુનિશ્ચિત કરવાનો છે કે મફત અનાજનો લાભ ફક્ત એવા જરૂરિયાતમંદ લોકો સુધી જ પહોંચે જેઓ ખરેખર તેના હકદાર છે.

શા માટે લેવામાં આવ્યું આ પગલું? જાણો કોણ હતું લિસ્ટમાં

રાષ્ટ્રીય ખાદ્ય સુરક્ષા અધિનિયમ (NFSA) હેઠળ, સરકારી તપાસમાં જાણવા મળ્યું કે ઘણા એવા લોકો મફત અનાજ લઈ રહ્યા હતા જેઓ આર્થિક રીતે સક્ષમ હતા. ખાદ્ય સચિવ સંજીવ ચોપરાએ જણાવ્યું કે, "NFSA લિસ્ટમાંથી લગભગ 2.25 કરોડ અયોગ્ય લાભાર્થીઓને દૂર કરવામાં આવ્યા છે."

* જેમની પાસે ચાર પૈડાવાળી ગાડી (ફોર-વ્હીલર) છે.

* જેઓ કોઈ કંપનીમાં ડાયરેક્ટરના પદ પર છે.

* જેમની માસિક આવક નિર્ધારિત મર્યાદા કરતાં વધુ છે.

* કેટલાક કિસ્સાઓમાં, જે લાભાર્થીઓનું મૃત્યુ થઈ ચૂક્યું છે, તેમના નામ પણ યાદીમાંથી દૂર કરાયા છે.

આવી રીતે થઈ અયોગ્ય લોકોની ઓળખ

કેન્દ્ર સરકારના ખાદ્ય અને જાહેર વિતરણ વિભાગે આવા અયોગ્ય લાભાર્થીઓની ઓળખ કરી હતી. ત્યારબાદ, આ યાદી રાજ્ય સરકારોને મોકલવામાં આવી હતી. રાજ્ય સરકારોએ આ યાદીની ખરાઈ કરી અને જે લોકો નિયમો મુજબ પાત્ર ન હતા તેમના નામ રાશન કાર્ડમાંથી દૂર કરવાની પ્રક્રિયા પૂર્ણ કરી. આ સાથે જ, રાજ્ય સરકારો દ્વારા નવા અને પાત્ર લાભાર્થીઓને યાદીમાં ઉમેરવાનું કામ પણ સતત ચાલી રહ્યું છે.

શું છે રાષ્ટ્રીય ખાદ્ય સુરક્ષા અધિનિયમ (NFSA)?

આ કાયદો વર્ષ 2013માં સંસદ દ્વારા પસાર કરવામાં આવ્યો હતો. તેનો હેતુ દેશની મોટી વસ્તીને સબસિડીવાળા દરે અનાજ ઉપલબ્ધ કરાવવાનો છે. આ કાયદો દેશની ગ્રામીણ વસ્તીના 75% અને શહેરી વસ્તીના 50% લોકોને આવરી લે છે. 2011ની વસ્તી ગણતરી મુજબ, આ યોજના હેઠળ કુલ 81.35 કરોડ લોકોને લાભ આપવાનો લક્ષ્યાંક છે. લાભાર્થીઓની ઓળખ કરવાની અને તેમના માટે રાશન કાર્ડ બનાવવા જવાબદારી રાજ્ય સરકારોની હોય છે.

કોને અને કેટલું અનાજ મળે છે?

આ યોજના હેઠળ મુખ્યત્વે બે કેટેગરીમાં અનાજ આપવામાં આવે છે:

અંત્યોદય અન્ન યોજના (AAY): આ કેટેગરીના પરિવારોને દર મહિને 35 કિલો અનાજ (ઘઉં અને ચોખા) મળે છે.

પ્રાથમિકતાવાળા પરિવારો (PHH): આ કેટેગરીમાં પરિવારના દરેક સભ્યને દર મહિને 5 કિલો અનાજ મળે છે.

હાલમાં દેશમાં 19 કરોડથી વધુ રાશન કાર્ડ ધારકો છે અને લગભગ 5 લાખ સરકારી રાશનની દુકાનો કાર્યરત છે. સરકારની આ કાર્યવાહીથી હવે યોજનાનો લાભ સાચા અર્થમાં ગરીબ અને જરૂરિયાતમંદ લોકો સુધી પહોંચી શકશે.

આ પણ વાંચો-હવે ઘરે બેઠા 5 મિનિટમાં તમારું નામ 2002ની મતદાર યાદી સાથે જોડો, ચૂંટણી પંચની SIR પ્રક્રિયા થઈ ઓનલાઈન, જાણો સંપૂર્ણ ગાઈડ