ગુજરાતના રસ્તાઓ 1242 કરોડ રૂપિયાથી ચમકશે, મુખ્યમંત્રી પટેલના આદેશે કામગીરી શરૂ

ગુજરાતના તમામ જિલ્લાઓમાં રસ્તાઓની જરૂરિયાતોને ધ્યાને લઈને મુખ્યમંત્રી ભૂપેન્દ્ર પટેલે રાજ્યના રસ્તા-માળખાને મજબૂત કરવા ઐતિહાસિક પગલું ભર્યું છે. આ અંતર્ગત રસ્તાઓની રિસરફેસિંગ, પુનઃનિર્માણ, સિમેન્ટ-કોંક્રિટ (સીસી) બનાવવા અને અન્ય સહાયક કામગીરી માટે કુલ 1242 કરોડ રૂપિયાની ફાળવણી કરવામાં આવી છે. આ નિર્ણયથી નાગરિકો, ઉદ્યોગો અને વેપારીઓને પરિવહનમાં સરળતા મળશે, ગ્રામીણ વિસ્તારોનો વિકાસ થશે અને હાજીપીર જેવા તીર્થસ્થળો સાથે જોડાણ વધુ મજબૂત થશે.

735 કિલોમીટર રસ્તાઓ માટે 975 કરોડની મંજૂરી

મુખ્યમંત્રી ભૂપેન્દ્ર પટેલે રાજ્યભરના રસ્તાઓની સ્થિતિને સુધારવા માટે વ્યાપક યોજના હાથ ધરી છે. આ અંતર્ગત રાજ્યના વિવિધ જિલ્લાઓમાં અત્યંત જરૂરી 118 રસ્તાઓના 735 કિલોમીટર લાંબા વિસ્તારના પુનઃનિર્માણ, રિસરફેસિંગ અને અન્ય સહાયક કામગીરી માટે રસ્તા અને મકાન વિભાગને 975 કરોડ રૂપિયાની ફાળવણી કરવામાં આવી છે. આ રસ્તાઓમાં રાજ્ય ધોરીમાર્ગો, મુખ્ય જિલ્લા રસ્તાઓ અને ગ્રામીણ વિસ્તારોના અન્ય રસ્તાઓનો સમાવેશ થાય છે.

મહેસાણા જિલ્લાને 267 કરોડની ભેટ

આ ઉપરાંત, કડી તાલુકા મુખ્યાલયને જોડતા બે મહત્વના રસ્તાઓ – ભાલઠી-ધરમપુર-ખાવડ રોડ અને કડી-નાની કડી-બાવડુ-ચંદ્રાસણ-ખોડાનો ઢાળ રોડના વિસ્તરણ માટે 144 કરોડ રૂપિયાની ફાળવણી કરવામાં આવી છે. આ રસ્તાઓને યાતાયાતના ભારને ધ્યાને લઈને 7 મીટરથી 10 મીટર પહોળા કરવામાં આવશે. આમ, કડી તાલુકામાં કુલ ચાર રસ્તાઓના સુધારણા કાર્યો માટે 171 કરોડ રૂપિયા મંજૂર થયા છે.

હાજીપીરને જોડતા રસ્તાનું આધુનિકરણ

કચ્છ જિલ્લાના પવિત્ર તીર્થસ્થળ હાજીપીરને દેશલપરથી જોડતા 32 કિલોમીટર લાંબા અને 7 મીટર પહોળા રાજ્ય ધોરીમાર્ગને ભારે વાહનોની અવરજવરને ધ્યાને લઈને સિમેન્ટ-કોંક્રિટમાં બનાવવાનો નિર્ણય લેવાયો છે. આ રસ્તાના નિર્માણ માટે 95 કરોડ રૂપિયાની ફાળવણી કરવામાં આવી છે. આ પગલાથી હાજીપીરની મુલાકાતે આવતા શ્રદ્ધાળુઓને સરળ અને સુરક્ષિત મુસાફરીની સુવિધા મળશે.

ગ્રામીણ અને ઔદ્યોગિક વિસ્તારોને ફાયદો

મુખ્યમંત્રી ભૂપેન્દ્ર પટેલના આ નિર્ણયથી રાજ્યના દૂરના ગામડાઓથી તાલુકા મુખ્યાલયો સુધીની મુસાફરી સરળ બનશે. ગ્રામીણ વિસ્તારો અને નગરોના વિકાસને વેગ મળશે, ઔદ્યોગિક વિસ્તારોમાં યાતાયાતની સુવિધા વધશે અને હાજીપીર જેવા તીર્થસ્થળો સાથેનું જોડાણ મજબૂત થશે. આ યોજનામાં રાજ્ય ધોરીમાર્ગો, મુખ્ય જિલ્લા રસ્તાઓ અને ગ્રામીણ સ્તરના રસ્તાઓનો સમાવેશ થાય છે, જે રાજ્યના દરેક વર્ગના લોકો માટે અનુકૂળ સાબિત થશે.

લોકોને મળશે સુવિધાજનક રસ્તાઓ

મુખ્યમંત્રી ભૂપેન્દ્ર પટેલે રસ્તાઓના મજબૂતીકરણ, પુનઃનિર્માણ અને અન્ય સહાયક કામગીરી માટે 1242 કરોડ રૂપિયાની ફાળવણી કરીને જનહિતનો મહત્વનો નિર્ણય લીધો છે. આ નિર્ણયથી ગુજરાતના નાગરિકોને આવાગમન માટે ઉચ્ચ ગુણવત્તાવાળા અને સુવિધાજનક રસ્તાઓ મળશે, જે રાજ્યના આર્થિક અને સામાજિક વિકાસમાં મહત્વનું યોગદાન આપશે.

આ પણ વાંચો - અમદાવાદમાં બનશે વર્લ્ડ ક્લાસ ગ્લાસ ડોમ ગાર્ડન, હવે સિંગાપોર જવાની નહીં પડે જરૂર