હિન્દુસ્તાન યુનિલિવરની મોટી જાહેરાત: લાઇફબોય, લક્સ, ડવ સહિતના પ્રોડક્ટ્સ પર ભાવ ઘટાડો!

બ્રિટનની અગ્રણી FMCG કંપની યુનિલિવરની ભારતીય શાખા હિન્દુસ્તાન યુનિલિવર લિમિટેડ (HUL)એ નવા GST સિસ્ટમને અનુરૂપ તેના અનેક પ્રોડક્ટ્સની કિંમતોમાં ઘટાડો કરવાની મોટી જાહેરાત કરી છે. 22 સપ્ટેમ્બર, 2025થી લાગુ થનારા નવા GST નિયમોને પગલે, HULએ લાઇફબોય સાબુ, લક્સ સાબુ, ડવ શેમ્પૂ, ક્લિનિક પ્લસ, હોર્લિક્સ, કિસાન જામ, બ્રૂ કોફી, ક્લોઝઅપ ટૂથપેસ્ટ જેવા લોકપ્રિય પ્રોડક્ટ્સની કિંમતો ઘટાડવાનો નિર્ણય લીધો છે. જે પ્રોડક્ટ્સની કિંમતો ઘટાડવામાં નહીં આવે, તેમાં પેકેજિંગની માત્રામાં વધારો કરવામાં આવશે.

કયા પ્રોડક્ટ પર કેટલી બચત?

HULના જાહેરાત મુજબ, ડવ હેર ફોલ રેસ્ક્યૂ શેમ્પૂ (340 ml)ની કિંમત 490 રૂપિયાથી ઘટીને 435 રૂપિયા થશે. તેવી જ રીતે, ક્લિનિક પ્લસ સ્ટ્રોંગ એન્ડ લોન્ગ શેમ્પૂ (355 ml)ની કિંમત 393 રૂપિયાથી ઘટીને 340 રૂપિયા થશે. હોર્લિક્સ ચોકલેટ (200 g)નું જાર હવે 130 રૂપિયાને બદલે 110 રૂપિયામાં મળશે, જ્યારે કિસાન જામ (200 g) 90 રૂપિયાને બદલે 80 રૂપિયામાં ઉપલબ્ધ થશે. લાઇફબોય સાબુના 75 ગ્રામના ચાર સાબુના પેકની કિંમત 68 રૂપિયાથી ઘટીને 60 રૂપિયા થશે. આ ઉપરાંત, લક્સ રેડિયન્ટ ગ્લો સાબુ (75 g x 4)ની કિંમત 96 રૂપિયાથી ઘટીને 85 રૂપિયા થશે.

અન્ય પ્રોડક્ટ્સની નવી કિંમતો

ક્લોઝઅપ ટૂથપેસ્ટ (150 g): 145 રૂપિયાથી ઘટીને 129 રૂપિયા

બ્રૂ કોફી (75 g): 300 રૂપિયાથી ઘટીને 270 રૂપિયા

નોર ટોમેટો સૂપ (67 g): 65 રૂપિયાથી ઘટીને 55 રૂપિયા

બૂસ્ટ (200 g): 124 રૂપિયાથી ઘટીને 110 રૂપિયા

શું છે HULનું પગલું?

ભારત સરકારે કંપનીઓને નવા GST નિયમો અંગે ગ્રાહકોને જાણકારી આપવા માટે અખબારોમાં જાહેરાતો પ્રકાશિત કરવાનું ફરજિયાત કર્યું છે. તેને અનુસરીને, HULએ આ કિંમત ઘટાડાની જાહેરાત અખબારો દ્વારા કરી છે. કંપનીએ જણાવ્યું કે નવી MRP અથવા વધેલી માત્રા સાથેનું નવું સ્ટોક ટૂંક સમયમાં બજારમાં ઉપલબ્ધ થશે. આ પગલું ગ્રાહકો માટે રાહતરૂપ સાબિત થશે, કારણ કે રોજિંદા જીવનમાં વપરાતા આવશ્યક ઉત્પાદનો હવે વધુ સસ્તા થશે. HULના આ નિર્ણયથી ગ્રાહકોને નવા GST સિસ્ટમનો સીધો લાભ મળશે.

આ પણ વાંચો-GSTના મોટા નિર્ણયથી ફાયદો: ઘર બનાવવું થશે સસ્તું, સિમેન્ટ, ઈંટ અને સરિયામાં લાખોની બચત!