India Germany weapons: NSGથી લઈ નેવી કમાન્ડો માટેના શસ્ત્રો હવે આસાનીથી આયાત કરી શકશે ભારત, જર્મનીએ હટાવ્યો પ્રતિબંધ

India Germany weapons: જર્મનીએ ભારતને હથિયારોના વેચાણ પરનો પ્રતિબંધ હટાવી લીધો છે. જર્મનીએ કહ્યું છે કે તે ભારતને અપવાદ માનીને નાના હથિયારોના વેચાણ પરનો પ્રતિબંધ હટાવી રહ્યું છે. યુરોપિયન દેશનું આ પગલું ભારત સાથેના તેના વધતા વ્યૂહાત્મક અને સૈન્ય સંબંધોને દર્શાવે છે. આ પહેલા જર્મનીના પોતાના નિયમો હતા. તેણે નોન-નાટો દેશોને નાના હથિયારોના વેચાણ પર પ્રતિબંધ મૂક્યો હતો.

એક ન્યૂઝ પેપરે ઘટનાક્રમની નજીકના સૂત્રોને ટાંકીને લખ્યું છે કે જર્મની પાસેથી છૂટ મળ્યા બાદ ભારત હવે તેની સેના અને રાજ્ય પોલીસ દળો માટે નાના હથિયારો ખરીદી શકશે. રાજદ્વારી સૂત્રોના જણાવ્યા અનુસાર, જર્મનીએ આ મહિનાની શરૂઆતમાં નેશનલ સિક્યુરિટી ગાર્ડ (NSG) ને તેની MP5 સબમશીન ગન (હેકલર એન્ડ કોચ MP5) માટે સ્પેરપાર્ટ્સ અને અન્ય સાધનો ખરીદવાની મંજૂરી આપી છે.

આ પણ વાંચો-Viral Reel: કારના ગેટ પર ટેપ સાથે યુવકને ચિપકાવ્યો, વાયરલ રીલ પર YouTuberની ધરપકડ

રિપોર્ટ અનુસાર ભારત અને જર્મની વચ્ચે સંરક્ષણ સહયોગ ઝડપથી વધી રહ્યો છે. ભારતીય વાયુસેના તેના AN-32ને બદલવા માટે 18 થી 30 ટનની વહન ક્ષમતા સાથે મધ્યમ પરિવહન એરક્રાફ્ટ (MTA) શોધી રહી છે, જેમાં જર્મની સહિત અનેક વૈશ્વિક ઉત્પાદકો રસ લઈ રહ્યા છે. ઉપરાંત, આ વર્ષના ઓક્ટોબરના અંતમાં, જર્મનીના બે જહાજો (સંભવતઃ એક ફ્રિગેટ અને એક ટેન્કર) મોટી જમાવટના ભાગરૂપે ભારતની મુલાકાત લેશે અને ભારતીય નૌકાદળ સાથેના કેટલાક દરિયાઈ દાવપેચમાં ભાગ લેશે. જર્મની ભારતના લાઇટ ટેન્ક પ્રોગ્રામ માટે એન્જિન પ્રદાન કરવા માટે ભારત સાથે પણ વાતચીત કરી રહ્યું છે. જો કે, તે પ્રારંભિક તબક્કામાં છે અને વિચારણા હેઠળ છે.