હવે ટ્રેન દ્વારા જઈ શકાશે ભૂટાન, પડોશી દેશના આ બે શહેરો સુધી મળશે રેલ કનેક્ટિવિટી

ભારત અને ભૂટાનની સરકારો વચ્ચે સરહદ પાર રેલ્વે પ્રોજેક્ટ શરૂ કરવા માટે એક મહત્વપૂર્ણ કરાર થયો છે. ભારતના વિદેશ સચિવ વિક્રમ મિશ્રીએ સોમવારે આ જાહેરાત કરી. અહેવાલો અનુસાર, ભારત અને ભૂટાન વચ્ચે આ પ્રકારનો પહેલો ક્રોસ બોર્ડર રેલ પ્રોજેક્ટ હશે. ચાલો જોઈએ કે આ રેલ પ્રોજેક્ટ બંને દેશોના કયા ભાગોને જોડશે અને તેના ફાયદા શું હશે.

ભારત અને ભૂટાનના આ શહેરો રેલ દ્વારા જોડાશે

અહેવાલો અનુસાર, ભારત અને ભૂટાન વચ્ચેનો રેલ્વે કનેક્ટિવિટી સોદો પશ્ચિમ બંગાળના બનારહાટને ભૂટાનના સમત્સે સાથે જોડશે. બીજી લાઇન આસામના કોકરાઝારને ભૂટાનના ગેલેફુ સાથે જોડશે.

આ રેલ પ્રોજેક્ટની જાહેરાત કરતા, વિદેશ સચિવ વિક્રમ મિશ્રીએ કહ્યું, "ભૂતાન સાથે રેલ કનેક્ટિવિટી પ્રોજેક્ટનો આ પહેલો સેટ હશે. ગયા વર્ષે વડા પ્રધાન નરેન્દ્ર મોદીની ભૂટાનની મુલાકાત દરમિયાન આ લિંક માટે એમઓયુ પર હસ્તાક્ષર કરવામાં આવ્યા હતા."

કેન્દ્રીય રેલ્વે મંત્રી અશ્વિની વૈષ્ણવે ભારત અને ભૂટાન વચ્ચે રેલ કનેક્ટિવિટી માટેના પ્રોજેક્ટને મંજૂરી આપવા અંગે એક નિવેદન પણ જારી કર્યું. તેમણે કહ્યું, "આ પ્રોજેક્ટ ભૂટાનના બે મહત્વપૂર્ણ શહેરોને જોડે છે. એક ગેલેફુ છે, જેને માઇન્ડફુલનેસ શહેર તરીકે વિકસાવવામાં આવી રહ્યું છે, અને બીજો સમત્સે, એક ઔદ્યોગિક શહેર. બંને પ્રોજેક્ટ ભારતીય રેલ્વેના કોકરાઝાર અને બનારહાટ નેટવર્કમાંથી ઉદ્ભવશે."

આ પ્રોજેક્ટનો ખર્ચ કેટલો થશે?

કેન્દ્રીય રેલ્વે મંત્રી અશ્વિની વૈષ્ણવે જણાવ્યું હતું કે "ભારત-ભૂતાન રેલ પ્રોજેક્ટ માટે અંદાજિત રોકાણ આશરે ₹4,033 કરોડ છે. આ રેલ પ્રોજેક્ટની કુલ લંબાઈ આશરે 90 કિલોમીટર છે. 89 કિલોમીટરનું રેલ્વે નેટવર્ક બનાવવામાં આવશે."

આ પ્રોજેક્ટનો હેતુ શું છે?

રેલવે મંત્રી અશ્વિની વૈષ્ણવે કહ્યું, "ભારત ભૂટાનનો સૌથી મોટો વેપારી ભાગીદાર છે અને ભૂટાનનો મોટાભાગનો મુક્ત વેપાર ભારતીય બંદરો દ્વારા થાય છે. ભૂટાનના અર્થતંત્રના વિકાસ અને લોકોને વૈશ્વિક નેટવર્ક સુધી વધુ સારી પહોંચ મળે તે માટે સારી અને અવિરત રેલ કનેક્ટિવિટી જરૂરી છે. તેથી જ આ સમગ્ર પ્રોજેક્ટ શરૂ કરવામાં આવ્યો છે."

આ પણ વાંચો-Mosquito Factory: બ્રાઝિલની વિશ્વની સૌથી મોટી ‘મચ્છર ફેક્ટરી’, ડેન્ગ્યુ સામે નવી આશા