મોટા બેંકિંગ સુધારાની તૈયારી: સરકારી બેંકોમાં FDI 49% સુધી વધારવા અને ખાનગીકરણ પર ફરી વિચારણા

Banking Reforms: ભારત સરકાર દેશના બેંકિંગ સેક્ટરમાં મોટા સુધારાની તૈયારીઓ કરી રહી છે, જેની અસર આગામી સમયમાં સ્પષ્ટપણે જોવા મળી શકે છે. સૂત્રો દ્વારા મળતી માહિતી અનુસાર, આ અંગે વડાપ્રધાન કાર્યાલય (PMO)માં આગામી કેટલાક અઠવાડિયામાં એક મહત્વપૂર્ણ બેઠક યોજાઈ શકે છે. આ બેઠકમાં મુખ્યત્વે 2 થી 3 મુખ્ય મુદ્દાઓ પર ગહન ચર્ચા થવાની સંભાવના છે.

FDI સીમામાં વધારો: 20%થી સીધા 49% સુધીનો પ્રસ્તાવ

આ બેઠકમાં સૌથી પહેલા સરકારી બેંકો માટે મૂડી એકત્ર કરવા અને તેમાં વિદેશી સીધા રોકાણ (FDI)ની મર્યાદા વધારવા પર વિચારણા થઈ શકે છે. હાલમાં, સરકારી બેંકોમાં FDIની મર્યાદા 20% છે, જેને વધારીને 49% સુધી લઈ જવાનો પ્રસ્તાવ છે. જો આ પ્રસ્તાવને મંજૂરી મળશે, તો સરકારી બેંકોને વધુ વિદેશી ભંડોળ મળશે, જે તેમની આર્થિક સ્થિતિને મજબૂત કરવામાં મદદરૂપ થશે.

ખાનગીકરણના પ્રસ્તાવ પર ફરી વિચારણા અને મોટા બેંકોનું વિઝન

વધુમાં નાણામંત્રી ભારતમાં 2થી 4 મોટા બેંકો હોવા જોઈએ તેવા વિચાર પર સતત ભાર મૂકી રહ્યા છે. આ દ્રષ્ટિકોણને સાકાર કરવા માટે પણ હવે ઝડપથી કામ થતું જોવા મળી શકે છે. આ સંપૂર્ણ બેંકિંગ સુધારાની પ્રક્રિયા માટે નાણા મંત્રાલય, નાણા વિભાગ અને ભારતીય રિઝર્વ બેંક (RBI) વચ્ચે વ્યાપક ચર્ચાઓ ચાલી રહી છે.

આગામી બજેટમાં સંકેત શક્ય

આગામી કેટલાક મહિનાઓમાં ભારતીય બેંકિંગ સેક્ટરમાં ઘણી હલચલ જોવા મળી શકે છે. નાણામંત્રી બજેટ રજૂ કરતી વખતે આ મોટા સુધારા અંગે કેટલાક નક્કર સંકેતો આપી શકે છે, જે ભવિષ્યમાં ભારતના આર્થિક પરિદ્રશ્યને નવી દિશા આપશે.

આ પણ વાંચો-સરકારની સુપરહિટ યોજના: ગેરંટી વગર મેળવો 90,000ની લોન, ફક્ત આધાર જરૂરી