ઓપરેશન સિંદૂરની સફળતા: રાષ્ટ્રપતિ દ્રૌપદી મુર્મૂએ કરી સેનાની પ્રશંસા, ત્રણેય સેના પ્રમુખ અને CDS હાજર

ભારતીય સેનાના ઓપરેશન સિંદૂરની શાનદાર સફળતા બાદ આજે ચીફ ઓફ ડિફેન્સ સ્ટાફ (CDS) જનરલ અનિલ ચૌહાણ, થલસેના પ્રમુખ જનરલ ઉપેન્દ્ર દ્વિવેદી, વાયુસેના પ્રમુખ એર ચીફ માર્શલ એ.પી. સિંહ અને નૌસેના પ્રમુખ એડમિરલ દિનેશ કે. ત્રિપાઠીએ રાષ્ટ્રપતિ દ્રૌપદી મુર્મૂ સાથે મુલાકાત કરી હતી. આ દરમિયાન તેમણે રાષ્ટ્રપતિને ઓપરેશન સિંદૂરની વિગતો અંગે માહિતી આપી. રાષ્ટ્રપતિ મુર્મૂએ ભારતીય સશસ્ત્ર દળોની બહાદુરી અને સમર્પણની ભૂરી ભૂરી પ્રશંસા કરી, જેના કારણે આતંકવાદ સામે ભારતનો પ્રતિસાદ ઐતિહાસિક સફળતામાં ફેરવાયો.

ઓપરેશન સિંદૂરની સફળતા

ઓપરેશન સિંદૂરના પ્રથમ દિવસે જ ભારતીય સેનાએ 100થી વધુ આતંકવાદીઓને ખતમ કરીને વિશ્વ સમક્ષ પોતાની શક્તિ અને નિશ્ચયનું પ્રદર્શન કર્યું હતું. આ ઓપરેશનને લઈને દેશભરમાં ગૌરવની લાગણી ફેલાઈ છે. રાષ્ટ્રપતિ દ્રૌપદી મુર્મૂએ સેનાના આ શૌર્યને દેશની આન, બાન અને શાનનું પ્રતીક ગણાવ્યું.

દેશભરમાં તિરંગા યાત્રા

ભારતીય સેનાના પરાક્રમના સન્માનમાં ભારતીય જનતા પાર્ટી (BJP) દ્વારા દેશભરમાં તિરંગા યાત્રાનું આયોજન કરવામાં આવ્યું છે. શ્રીનગરમાં આજે ભવ્ય તિરંગા યાત્રા યોજાઈ, જેમાં મોટી સંખ્યામાં લોકોએ ભાગ લીધો. દિલ્હીના જામિયા મિલિયા ઇસ્લામિયા કેમ્પસમાં વિદ્યાર્થીઓ અને પ્રોફેસરોએ પણ તિરંગા યાત્રા કાઢી, જેમાં દેશભક્તિનો ઉત્સાહ જોવા મળ્યો.

ઉત્તર પ્રદેશમાં મુખ્યમંત્રી યોગી આદિત્યનાથના નેતૃત્વમાં તિરંગા યાત્રા યોજાઈ. આ દરમિયાન એક જનસભાને સંબોધતા સીએમ યોગીએ કહ્યું, "ભારતની આન, બાન અને શાનની રક્ષા માટે પ્રતિબદ્ધ અમારી સરકારે પાકિસ્તાનને તમામ પુરાવા આપ્યા બાદ પણ જ્યારે તે પોતાની હરકતોથી બાજ ન આવ્યું, ત્યારે ઓપરેશન સિંદૂરનું અભિયાન શરૂ કરવામાં આવ્યું. આપણે જોયું કે પ્રથમ દિવસે જ 100થી વધુ આતંકવાદીઓ ખતમ કરવામાં આવ્યા. આ સમગ્ર વિશ્વે જોયું છે."

પીએમ મોદીના નેતૃત્વમાં CCSની બેઠક

પાકિસ્તાન સાથે સરહદ પર સીઝફાયરની સ્થિતિ બાદ આજે વડાપ્રધાન નરેન્દ્ર મોદીની અધ્યક્ષતામાં કેબિનેટ અને કેબિનેટ કમિટી ઓન સિક્યોરિટી (CCS)ની બેઠક યોજાશે. કેબિનેટની બેઠક સવારે 11 વાગ્યે શરૂ થશે, જેના પછી CCSની બેઠક થશે. ઉલ્લેખનીય છે કે પહેલગામ આતંકી હુમલા બાદ અગાઉ પણ CCSની બે બેઠકો યોજાઈ ચૂકી છે. આજની બેઠકમાં ઓપરેશન સિંદૂર બાદની રણનીતિ, પહેલગામ આતંકી હુમલાની તપાસ અને સીઝફાયર બાદની સ્થિતિ પર ચર્ચા થવાની સંભાવના છે.

દેશભક્તિનો ઉત્સાહ

ઓપરેશન સિંદૂરની સફળતાએ દેશભરમાં દેશભક્તિનો ઉત્સાહ વધાર્યો છે. ભારતીય સેનાની આ ઉપલબ્ધિ ન માત્ર આતંકવાદ સામે દેશની મજબૂત નીતિને દર્શાવે છે, પરંતુ સમગ્ર વિશ્વને ભારતની શક્તિ અને નિશ્ચયનો પરિચય પણ કરાવે છે.

આ પણ વાંચો- કતાર તરફથી ટ્રમ્પને 400 મિલિયન ડોલરની લક્ઝરી ભેટ, ટ્રમ્પે કહ્યું - કોઇ મૂર્ખ જ તેનો કરશે અસ્વિકાર