આ મહિનામાં ભારત આવશે અમેરિકાના ઉપરાષ્ટ્રપતિ, પીએમ મોદી સાથે કરશે મુલાકાત, જયપુર અને આગરાની પણ લેશે મુલાકાત

અમેરિકાના ઉપરાષ્ટ્રપતિ જેડી વેન્સ પોતાની પત્ની ઉષા વેન્સ સાથે 18 એપ્રિલથી 24 એપ્રિલ દરમિયાન ઇટાલી અને ભારતની યાત્રા પર રહેશે. ભારત પ્રવાસ દરમિયાન તેઓ વડાપ્રધાન નરેન્દ્ર મોદીના સાથે મીટિંગ કરશે અને દેશના કેટલાક ઐતિહાસિક શહેરોની મુલાકાત પણ લેશે.

ઉલ્લેખનીય છે કે ઉષા વેન્સના માતાપિતા મૂળ આંધ્રપ્રદેશના છે, જો કે ત્યારબાદ તેઓ અમેરિકા સ્થાયી થયા હતા. તેમની માતા મોલિક્યુલર બાયોલોજિસ્ટ છે અને પિતા મેકેનિકલ ઈજનેર છે. ઉષા વેન્સ માટે આ ભારત પ્રવાસ ખાસ મહત્વનો છે, કારણ કે તેઓ પ્રથમ વખત "સેકન્ડ લેડી" તરીકે ભારત આવી રહી છે. તેઓ પોતાના પતિ સાથે નવી દિલ્હી, જયપુર અને આગરા જશે.

આ મુલાકાત એવા સમયે થઈ રહી છે જ્યારે આંતરરાષ્ટ્રીય સ્તરે અમેરિકા દ્વારા ફરીથી વેપાર શુલ્ક (ટેરિફ) લગાવવા વિશે ચર્ચા થઈ રહી છે. ટ્રમ્પ વહીવટીતંત્રની "અમેરિકા ફર્સ્ટ" નીતિ ફરીથી ચર્ચાના કેન્દ્રમાં આવી રહી છે, જે વૈશ્વિક વેપાર વિવાદોને ફરીથી જન્મ આપી રહી છે. આવા સમયે વેન્સનો ભારત પ્રવાસ વ્યૂહાત્મક રીતે ખૂબ મહત્વનો ગણાય છે.

ભારત-અમેરિકા વેપાર સંબંધોમાં નવો ધબકાર?

તેની અનુસંધાનમાં ભારતના વાણિજ્ય મંત્રી પીયૂષ ગોયલના નેતૃત્વ હેઠળ ભારતીય પ્રતિનિધિમંડળ 3 થી 6 માર્ચ દરમિયાન અમેરિકા ગયો હતો. જ્યાં તેમણે અમેરિકાના વાણિજ્ય સચિવ અને અન્ય ઉંચા અધિકારીઓ સાથે ચર્ચા કરી હતી. વેન્સની ભારત મુલાકાતથી બંને દેશો વચ્ચે વેપાર સંબંધો વધુ મજબૂત થવાની શક્યતા છે અને આથી આ મુલાકાતને બંને દેશો માટે મહત્વપૂર્ણ માપવામાં આવી રહી છે.

શું જેડી વેન્સનો પ્રવાસ ભારત માટે લાભદાયી રહેશે?

જેડી વેન્સનો આ પ્રવાસ ભારત અને અમેરિકા વચ્ચેના સંબંધોને વધુ મજબૂત કરવાની દિશામાં એક મહત્વનું પગલું માનવામાં આવે છે. આ દરમિયાન થનારી ચર્ચાઓ બંને દેશો વચ્ચે વેપાર, રોકાણ અને રાજનૈતિક સહયોગને નવી દિશા આપી શકે છે.

આ પણ વાંચો- ભારત-અમેરિકા વેપાર સમજૂતી: ભારત-અમેરિકા વેપાર સોદામાં ભારત સાવધ, આંકડાઓની ચાલબાજીનો ભય