8th Pay Commission: કેન્દ્રીય કર્મચારીઓ માટે મોટા સમાચાર, સંસદમાં સરકારે જણાવ્યું ક્યારે આવશે રિપોર્ટ અને કેટલો વધશે પગાર?

8th Pay Commission: જો તમે કેન્દ્ર સરકારના કર્મચારી કે પેન્શનર છો, તો તમારા માટે 8મા પગાર પંચને લઈને એક ખૂબ જ અગત્યના સમાચાર સામે આવ્યા છે. સંસદમાં રાજ્યસભાની કાર્યવાહી દરમિયાન નાણા રાજ્ય મંત્રી પંકજ ચૌધરીએ 8મા પગાર પંચનો રિપોર્ટ ક્યારે આવશે અને તેની પ્રક્રિયા શું છે, તે અંગે સરકારનું વલણ એકદમ સ્પષ્ટ કરી દીધું છે.

જો તમે જાણવા માંગો છો કે આયોગ પોતાની ભલામણો ક્યારે સોંપશે, સરકાર તેને ક્યારથી લાગુ કરશે અને તમારો બેઝિક પગાર કેટલો વધી શકે છે, તો ચાલો જાણીએ આ સંપૂર્ણ રિપોર્ટની ખાસ વાતો.

ક્યારે આવશે 8મા પગાર પંચનો ફાઇનલ રિપોર્ટ?

રાજ્યસભામાં પૂછાયેલા એક પ્રશ્નના લેખિત જવાબમાં નાણા રાજ્ય મંત્રી પંકજ ચૌધરીએ જણાવ્યું કે, સરકારે 3 નવેમ્બર 2025 ના રોજ 8મા કેન્દ્રીય પગાર પંચની રચના કરી હતી. આ આયોગને પોતાનો રિપોર્ટ તૈયાર કરીને સોંપવા માટે 18 મહિનાનો સમય આપવામાં આવ્યો છે. આ ગણતરી મુજબ, 8મા પગાર પંચે પોતાની ફાઇનલ રિપોર્ટ 3 મે 2027 સુધીમાં સરકારને સોંપવાની રહેશે. જોકે, આયોગ ઈચ્છે તો તે પહેલા પણ પોતાનો રિપોર્ટ જમા કરાવી શકે છે.

એકવાર રિપોર્ટ સરકારના હાથમાં આવી જાય, ત્યારબાદ કેન્દ્ર સરકાર તેની ઊંડાણપૂર્વક સમીક્ષા કરશે. ભલામણોનો સ્વીકાર કરવા માટે કોઈ ચોક્કસ કાનૂની સમયમર્યાદા નથી હોતી, પરંતુ ભૂતકાળના આંકડાઓ જોઈએ તો રિપોર્ટ લાગુ કરવામાં 6 થી 8 મહિનાનો સમય લાગી શકે છે.

(ઉદાહરણ તરીકે: 7મા પગાર પંચે નવેમ્બર 2015 માં રિપોર્ટ સોંપ્યો હતો અને કેબિનેટે જૂન 2016 માં તેને મંજૂરી આપી હતી.)

ક્યારથી લાગુ થશે નવો પગાર?

કર્મચારીઓ માટે સૌથી ખુશીની વાત એ છે કે, ભલે સરકારની ફાઇનલ મંજૂરી 2027 ના અંતમાં મળે, પરંતુ 8મા પગાર પંચની ભલામણો 1 જાન્યુઆરી 2026 થી જ લાગુ માનવામાં આવશે. એટલે કે, કર્મચારીઓને પાછલા મહિનાઓનું એરિયર્સ પણ એકસાથે ચૂકવવામાં આવશે.

કેટલો વધી શકે છે તમારો બેઝિક પગાર?

પગાર વધારાની ચર્ચા વચ્ચે ફિટમેન્ટ ફેક્ટર સૌથી મહત્વનો મુદ્દો છે.

કર્મચારીઓની માંગ: કર્મચારી યુનિયનોની નેશનલ કાઉન્સિલ (JCM) એ 3.83 ના ફિટમેન્ટ ફેક્ટરની માંગણી કરી છે.

હાલનો પગાર: અત્યારે 7મા પગાર પંચ મુજબ 2.57 ના ફિટમેન્ટ ફેક્ટરના આધારે લઘુત્તમ બેઝિક પગાર 18,000 રૂપિયા છે.

નવો અંદાજિત પગાર: જો સરકાર 3.83 નું ફિટમેન્ટ ફેક્ટર સ્વીકારી લે છે, તો કેન્દ્રીય કર્મચારીઓના લઘુત્તમ બેઝિક પગારમાં સીધો 283% નો ઉછાળો આવશે અને પગાર 18,000 થી વધીને સીધો 69,000 રૂપિયા પ્રતિ માસ થઈ શકે છે.

(નોંધ: જ્યાં સુધી કેબિનેટ ફાઇનલ રિપોર્ટને લીલી ઝંડી ન આપે, ત્યાં સુધી આ પગારના આંકડાઓને માત્ર એક અંદાજ તરીકે જ લેવા.)

શું છે 8મા પગાર પંચનું વર્તમાન સ્ટેટસ?

હાલમાં 8મું પગાર પંચ અલગ-અલગ કર્મચારી યુનિયનો અને સંગઠનો સાથે બેઠકો કરી રહ્યું છે અને ડેટા એકઠો કરવાનું કામ ચાલુ છે. આયોગ સપ્ટેમ્બર 2026 માં ચેન્નઈ (7-8 સપ્ટેમ્બર) અને પુડુચેરી (9 સપ્ટેમ્બર) નો પ્રવાસ કરશે. લાયક કર્મચારી યુનિયનો પોતાના મેમોરેન્ડમ ID સાથે 18 ઓગસ્ટ 2026 સુધી આયોગ પાસે મુલાકાતનો સમય માંગી શકે છે.

આ પણ વાંચો-EPFO Big Update: PF એકાઉન્ટમાં વ્યાજના પૈસા જમા થવાનું શરૂ, આ રીતે ફટાફટ ચેક કરો તમારું બેલેન્સ