2026માં Home Loan લેવાનું પ્લાનિંગ છે? તો જાણો તમારા માટે ફિક્સ્ડ કે ફ્લોટિંગ, કયો વ્યાજ દર રહેશે બેસ્ટ?

Fixed vs Floating Interest Rate: પોતાનું ઘર હોવું એ દરેક મધ્યમવર્ગીય માણસનું સપનું હોય છે. અત્યારના સમયમાં મોટાભાગના લોકો બેંકમાંથી લોન લઈને પોતાના ઘરનું સ્વપ્ન પૂરું કરતા હોય છે. જો તમે પણ આ વર્ષે એટલે કે 2026માં નવું ઘર ખરીદવાનું અને તેના માટે હોમ લોન લેવાનું વિચારી રહ્યા છો, તો તમારા મનમાં અનેક સવાલો હશે.

તેમાં પણ સૌથી મોટો અને મહત્ત્વનો સવાલ એ હોય છે કે લોન કયા વ્યાજ દરે લેવી? બેંક તમને બે વિકલ્પ આપે છે: 'ફ્લોટિંગ ઈન્ટરેસ્ટ રેટ' અને 'ફિક્સ્ડ ઈન્ટરેસ્ટ રેટ'. આ બંનેમાંથી કયો વિકલ્પ તમારા માટે ફાયદાકારક રહેશે તે જાણવું ખૂબ જરૂરી છે. આજે અમે તમને આ ગૂંચવણ ઉકેલવામાં મદદ કરીશું.

ફ્લોટિંગ કે ફિક્સ્ડ: કયો વિકલ્પ છે બેસ્ટ?

સૌથી પહેલા એ સમજવું જરૂરી છે કે કોઈ એક વિકલ્પ દરેક માટે શ્રેષ્ઠ હોતો નથી. કયો વ્યાજ દર પસંદ કરવો તે તમારી આર્થિક સ્થિતિ, આવક અને ભવિષ્યના પ્લાનિંગ પર આધાર રાખે છે. ચાલો વિગતે સમજીએ.

ફ્લોટિંગ રેટનો અર્થ એ છે કે તમારા લોનના વ્યાજ દર બજારની સ્થિતિ અને RBIની નીતિઓ મુજબ બદલાતા રહે છે. એટલે કે, લોનની મુદત દરમિયાન વ્યાજ વધી પણ શકે છે અને ઘટી પણ શકે છે. જે લોકોની આવક સારી છે અને નોકરીમાં સ્થિરતા છે, તેમના માટે આ વિકલ્પ સારો છે. જો ભવિષ્યમાં તમારી સેલેરી કે આવક વધવાની શક્યતા હોય, તો તમે ફ્લોટિંગ રેટ પસંદ કરી શકો છો. સૌથી મહત્ત્વની વાત એ છે કે, જો ભવિષ્યમાં વ્યાજ દર વધે અને તમારી EMIમાં વધારો થાય, તો તે આર્થિક બોજ ઉઠાવવાની તમારી તૈયારી હોવી જોઈએ. જે લોકો થોડું જોખમ લેવા તૈયાર છે, તેમના માટે ફ્લોટિંગ રેટ ફાયદાકારક સાબિત થઈ શકે છે.

કોણે પસંદ કરવો જોઈએ ફિક્સ્ડ રેટ?

ફિક્સ્ડ રેટમાં નામ પ્રમાણે જ વ્યાજ દર નિશ્ચિત હોય છે. લોનની પૂરી અવધિ દરમિયાન વ્યાજ દરમાં કોઈ ફેરફાર થતો નથી અને તમારી EMI પણ એકસમાન રહે છે. જે લોકોની આવક ઓછી છે અથવા જેમનું બજેટ ટાઈટ છે, તેમણે ફિક્સ્ડ રેટ પસંદ કરવો જોઈએ. જો તમે ઈચ્છતા હોવ કે બજારમાં વ્યાજ દર ગમે તેટલા વધે, તમારી EMI પર કોઈ અસર ન પડે, તો આ વિકલ્પ તમારા માટે છે. જે લોકો જોખમ લેવા નથી માંગતા અને સુરક્ષિત રીતે લોન ચૂકવવા માંગે છે, તેમના માટે ફિક્સ્ડ રેટ સારો વિકલ્પ છે. જો કે, અહીં એક વાતનું ધ્યાન રાખવું જરૂરી છે કે સામાન્ય રીતે ફિક્સ્ડ રેટ એ ફ્લોટિંગ રેટ કરતાં થોડા વધારે હોય છે.

ટૂંકમાં કહીએ તો, જો તમારી નોકરી સ્થિર ન હોય અથવા આવક મર્યાદિત હોય અને તમે ફ્લોટિંગ રેટ પસંદ કરો, તો વ્યાજ દર વધતા તમારી EMI વધી શકે છે અને તમારું ઘરખર્ચનું બજેટ ખોરવાઈ શકે છે. તેથી, 2026માં લોન લેતા પહેલા તમારી આવક અને જોખમ લેવાની ક્ષમતા ચકાસીને જ યોગ્ય નિર્ણય લેવો હિતાવહ છે.

આ પણ વાંચો- Kotak Mutual Fund: કોટકે લોન્ચ કર્યો ડિવિડન્ડ યીલ્ડ ફંડ, માત્ર 100 રૂપિયાથી શરૂ કરો રોકાણ, જાણો શું છે ખાસ?