Bank FD: ખાતામાં 10 લાખ રૂપિયા છે? જાણો વધુ વ્યાજ સાથે તમારા પૈસા 100% સુરક્ષિત રાખવાની બેસ્ટ રીત

Bank FD: ફિક્સ્ડ ડિપોઝિટને ભારતમાં હંમેશા સૌથી સુરક્ષિત અને જોખમ વગરના રોકાણ તરીકે જોવામાં આવે છે. જો તમારી પાસે 10 લાખ કે 20 લાખ રૂપિયાની બચત છે અને તમે તેને કોઈ એક જ બેંકની FD માં મુકવા જઈ રહ્યા છો, તો તમારે એક ખૂબ જ મહત્વપૂર્ણ નિયમ જાણવો જરૂરી છે. નિયમ એ છે કે જો તમે તમારી બધી જ જમાપુંજી એક જ બેંકમાં રાખો છો, તો તમારું પૂરું ફંડ સુરક્ષિત નથી.

આ માટે તમારે સાચી નાણાકીય વ્યૂહરચના અને 'લેડરિંગ' ટેકનિક અપનાવવી જોઈએ. ચાલો જાણીએ કે બેંકમાં મોટી રકમ રોકવા છતાં તેને 100% સુરક્ષિત કેવી રીતે રાખી શકાય અને સારું વ્યાજ કેવી રીતે મેળવી શકાય.

માત્ર 5 લાખ રૂપિયા સુધીનો જ છે વીમો

રિઝર્વ બેંક ઓફ ઇન્ડિયાની પેટાકંપની ડિપોઝિટ ઇન્સ્યોરન્સ એન્ડ ક્રેડિટ ગેરંટી કોર્પોરેશનના નિયમ મુજબ, કોઈપણ બેંકમાં ગ્રાહકની મહત્તમ 5 લાખ રૂપિયા સુધીની જ રકમ પર વીમા કવર મળે છે. ખાસ ધ્યાન રાખો કે આ 5 લાખ રૂપિયાની મર્યાદામાં તમારી મૂળ રકમ અને તેની પર મળતું વ્યાજ બંનેનો સમાવેશ થઈ જાય છે.

ઘણીવાર લોકો એવું વિચારે છે કે એક જ બેંકમાં 2-2 લાખ રૂપિયાની 5 અલગ-અલગ FD બનાવી દેવાથી તેમના 10 લાખ રૂપિયા સુરક્ષિત થઈ જશે. પરંતુ આવું બિલકુલ નથી.

જો તમારી એક જ બેંકમાં ઘણી બધી FD છે, તો બેંક ડૂબવા પર DICGC તે તમામ રકમને એકસાથે ગણે છે. ઉદાહરણ તરીકે, જો તમારી પાસે 2-2 લાખની 3 FD (કુલ 6 લાખ) છે અને તમારા સેવિંગ્સ એકાઉન્ટમાં 1 લાખ પડ્યા છે, તો તમારી કુલ જમા રકમ 7 લાખ ગણાશે. પરંતુ નિયમ મુજબ તમને મહત્તમ 5 લાખ રૂપિયા જ પાછા મળશે. એક જ બેંકની અલગ-અલગ બ્રાન્ચમાં ખાતા ખોલાવવાથી પણ વીમાની લિમિટ અલગ-અલગ નથી થતી. બધું એક જ ગણાય છે.

તમારા પૈસાને 100% સુરક્ષિત કેવી રીતે બનાવવા?

જો તમારી પાસે રોકાણ કરવા માટે મોટી રકમ છે, તો તમારું જોખમ ઘટાડવા નીચે મુજબની ટિપ્સ અપનાવો.

અલગ-અલગ બેંકોમાં પૈસા વહેંચો

DICGC દરેક અલગ બેંકને એક અલગ એન્ટિટી માને છે. જો તમારી પાસે 15 લાખ રૂપિયા છે, તો તેને 3 અલગ-અલગ બેંકોમાં 5-5 લાખ રૂપિયાની FD માં રોકો. આમ કરવાથી તમારા પૂરા 15 લાખ રૂપિયા સુરક્ષિત રહેશે.

જોઈન્ટ એકાઉન્ટનો ફાયદો ઉઠાવો

એક જ બેંકમાં જો તમે અલગ-અલગ માલિકી હક (જેમ કે - વ્યક્તિગત ખાતું, પત્ની સાથે જોઈન્ટ ખાતું અથવા HUF ખાતું) હેઠળ FD કરાવો છો, તો તમને અલગથી વીમા કવર મળી શકે છે.

જો બેંક ડૂબી જાય તો શું થાય?

જ્યારે કોઈ બેંક નાદારી નોંધાવે અથવા RBI તેના પર પ્રતિબંધ મૂકે, ત્યારે DICGC ફ્રેમવર્ક લાગુ થાય છે. બેંકે નક્કી કરેલી સમયમર્યાદામાં ગ્રાહકોની વિગતો જમા કરવાની હોય છે. કાનૂની પ્રક્રિયા પૂરી થયા બાદ ગ્રાહકને વધુમાં વધુ 5 લાખ રૂપિયા સુધીનું ચૂકવણું કરવામાં આવે છે.

મોટી FD કરાવતા પહેલા આ બાબતો ધ્યાનમાં રાખો

એક જ બેંકમાં તમારી કુલ કેટલી રકમ (સેવિંગ્સ + FD + RD) જમા છે તેનો હંમેશા હિસાબ રાખો અને તેને 5 લાખની અંદર રાખવાનો પ્રયાસ કરો. 10 કે 15 લાખ જેવી મોટી રકમને ક્યારેય એક જ સમયગાળા માટે ના રોકો. તેને 1 વર્ષ, 2 વર્ષ અને 3 વર્ષ એમ અલગ-અલગ સમય માટે અને 2 થી 3 સારી બેંકોમાં વહેંચીને રોકાણ કરો. માત્ર વીમા કવર જ નહીં, બેંક પસંદ કરતી વખતે ત્યાં મળતો વ્યાજ દર, પૈસા ઉપાડવા પર લાગતો ચાર્જ અને લોક-ઇન પિરિયડ પણ ચકાસી લો.

આ પણ વાંચો-FD Rates Hike: સિનિયર સિટીઝન્સને FD પર મળી રહ્યું છે 8.50% સુધીનું વ્યાજ, જાણો 10 લાખ રોકવા પર કેટલી થશે કમાણી

ડિસ્ક્લેમર: આ માહિતી માત્ર જાણકારીના હેતુથી આપવામાં આવી છે. અહીં જણાવવું જરૂરી છે કે શેરબજારમાં રોકાણ એ બજારના જોખમોને આધીન છે. રોકાણકારોએ કોઈપણ જગ્યાએ નાણાં રોકતા પહેલા હંમેશા નિષ્ણાતની સલાહ લેવી જોઈએ. મનીકંટ્રોલ દ્વારા ક્યારેય પણ કોઈને રોકાણ કરવાની સલાહ આપવામાં આવતી નથી.