FASTag Annual Pass Signage Boards: નેશનલ હાઈવે પર ટોલ પાસની સંપૂર્ણ માહિતી હવે સાઈનેજ બોર્ડ પર, NHAIની નવી પહેલ

FASTag Annual Pass Signage Boards: ભારતીય રાષ્ટ્રીય રાજમાર્ગ પ્રાધિકરણ (NHAI) દ્વારા નેશનલ હાઈવેના યુઝર્સ માટે એક નવી અને મહત્વપૂર્ણ પહેલ શરૂ કરવામાં આવી છે. આ પહેલનો હેતુ લોકલ મંથલી પાસ અને ફાસ્ટેગ એન્યુઅલ પાસની સુવિધા વિશે પારદર્શકતા વધારવી અને યુઝર્સમાં જાગૃતિ લાવવાનો છે. NHAIએ તમામ રિજનલ ઓફિસોને નિર્દેશ આપ્યા છે કે નેશનલ હાઈવે પરના દરેક ટોલ પ્લાઝા પર આ પાસની સંપૂર્ણ માહિતી સ્પષ્ટ રીતે પ્રદર્શિત કરવામાં આવે. આ નવી પહેલથી યુઝર્સને ટોલ પાસની ઉપલબ્ધતા, કિંમત અને પ્રોસેસની સચોટ માહિતી સરળતાથી મળી રહેશે.

ટોલ પ્લાઝા પર સાઈનેજ બોર્ડ દ્વારા માહિતી

NHAIના જણાવ્યા અનુસાર, લોકલ મંથલી પાસ અને ફાસ્ટેગ એન્યુઅલ પાસની વિગતો ટોલ પ્લાઝાના પ્રવેશ અને બહાર નીકળવાના સ્થળો, કસ્ટમર સર્વિસ પોઈન્ટ અને અન્ય સ્પષ્ટ દેખાતી જગ્યાઓ પર સાઈનેજ બોર્ડ દ્વારા પ્રદર્શિત કરવામાં આવશે. આ બોર્ડ અંગ્રેજી, હિન્દી અને સ્થાનિક ભાષામાં હશે, જેથી દરેક યુઝરને માહિતી સમજવામાં સરળતા રહે. NHAIએ રિજનલ ઓફિસોને 30 દિવસની અંદર આ બોર્ડ લગાવવા અને દિવસ-રાત દરમિયાન આ બોર્ડ સ્પષ્ટ દેખાય તેની ખાતરી કરવા જણાવ્યું છે.

આ ઉપરાંત, આ માહિતી 'રાજમાર્ગયાત્રા' મોબાઈલ એપ અને NHAIની સંબંધિત પ્રોજેક્ટ વેબસાઈટ પર પણ ઉપલબ્ધ કરવામાં આવશે, જેથી વધુમાં વધુ લોકો સુધી આ માહિતી પહોંચી શકે.

લોકલ મંથલી પાસ એ નેશનલ હાઈવે યુઝર્સ માટે એક રાહતદાયક સુવિધા છે, જે ખાસ કરીને ટોલ પ્લાઝાની 20 કિલોમીટરની ત્રિજ્યામાં રહેતા લોકો માટે ઉપલબ્ધ છે. આ પાસ ફક્ત પ્રાઈવેટ વાહનો માટે જ છે. આ પાસ મેળવવા માટે નીચેના ડોક્યુમેન્ટ્સની જરૂર પડશે:-

- આધાર કાર્ડ

- વાહનની રજિસ્ટ્રેશન સર્ટિફિકેટ (RC)

- રહેઠાણનું પ્રમાણપત્ર

આ ડોક્યુમેન્ટ્સની ચકાસણી બાદ ટોલ પ્લાઝાના હેલ્પડેસ્ક પરથી લોકલ મંથલી પાસ જારી કરવામાં આવે છે. આ પાસથી નજીકના ટોલ પ્લાઝા પર વારંવાર મુસાફરી કરતા લોકો માટે ખર્ચ અને સમય બંનેની બચત થશે.

ફાસ્ટેગ એન્યુઅલ પાસના ફાયદા

ફાસ્ટેગ એન્યુઅલ પાસ એ પ્રાઈવેટ વાહનો જેમ કે કાર, જીપ, વેન માટે ઉપલબ્ધ એક વિશેષ સુવિધા છે. આ પાસની વેલિડિટી એક વર્ષ અથવા 200 ટોલ પ્લાઝા ક્રોસિંગ સુધીની છે. આ પાસની ખરીદી 'રાજમાર્ગયાત્રા' એપ દ્વારા કરી શકાય છે. આ માટે 3,000 રૂપિયાની એકમુશ્ત ફી ચૂકવવાની રહેશે, જે બાદ આ પાસ ડિજિટલી વાહનના ફાસ્ટેગ સાથે લિંક થઈ જશે.

આ એન્યુઅલ પાસ દેશભરના નેશનલ હાઈવે અને એક્સપ્રેસવે પર આવેલા લગભગ 1,150 ટોલ પ્લાઝા પર માન્ય છે. આથી લાંબા અંતરની મુસાફરી કરતા લોકો માટે આ એક આર્થિક અને અનુકૂળ વિકલ્પ છે.

શું છે NHAIનો હેતુ?

NHAIનો મુખ્ય હેતુ નેશનલ હાઈવે યુઝર્સને સરળ, પારદર્શક અને ખર્ચ-અસરકારક ટોલ સેવાઓ પૂરી પાડવાનો છે. આ નવી પહેલથી યુઝર્સને ટોલ પાસની સુવિધાઓ વિશે સ્પષ્ટ અને સરળ માહિતી મળશે, જેનાથી તેમની મુસાફરી વધુ અનુકૂળ અને આર્થિક બનશે. આ પહેલથી નેશનલ હાઈવેની મુસાફરી કરતા લોકોને નવી સુવિધા અને સરળતા મળશે. જો તમે પણ આ સુવિધાનો લાભ લેવા માંગો છો, તો તમારા નજીકના ટોલ પ્લાઝા પર સંપર્ક કરો અથવા 'રાજમાર્ગયાત્રા' એપ ડાઉનલોડ કરો.

આ પણ વાંચો- Nebulizer vs Steamer: નેબ્યુલાઈઝર અને સ્ટીમર વચ્ચે શું છે તફાવત? ઉપયોગ પહેલાં જાણો ફાયદા અને નુકસાન