EPFO Alert: PF ખાતામાં જોઈનિંગ કે એક્ઝિટ ડેટ ખોટી છે? તો અટકી જશે પેન્શન અને ક્લેમ, જાણો સુધારવાની ઓનલાઈન રીત

EPFO Alert: નોકરી કરતા લોકો માટે પ્રોવિડન્ટ ફંડ એક સુરક્ષિત ભવિષ્ય અને પેન્શનનો મોટો આધાર છે. પરંતુ, શું તમે ક્યારેય ચેક કર્યું છે કે તમારા EPF ખાતામાં તમારી જોઈનિંગ કે એક્ઝિટ તારીખ સાચી લખેલી છે કે નહીં? દેખાવમાં આ એક સામાન્ય ભૂલ લાગે છે, પરંતુ કર્મચારી ભવિષ્ય નિધિ સંગઠનના નિયમો મુજબ, આ એક નાની ભૂલ તમને મોટું નુકસાન પહોંચાડી શકે છે. જો તમારા ખાતામાં તારીખો ખોટી હશે, તો તમારા PF ના પૈસા ઉપાડવામાં અને પેન્શન મેળવવામાં મોટી મુશ્કેલી ઊભી થઈ શકે છે. ચાલો જાણીએ કે આ ભૂલથી શું નુકસાન થાય છે અને તેને કેવી રીતે સુધારી શકાય.

ખોટી તારીખ નોંધાયેલી હોવાથી શું નુકસાન થાય?

PF ટ્રાન્સફરમાં મુશ્કેલી: જ્યારે તમે નોકરી બદલીને નવી કંપનીમાં જાઓ છો, ત્યારે જૂના PF ના પૈસા નવા ખાતામાં ટ્રાન્સફર કરવા માટે 'એક્ઝિટ ડેટ' (જૂની નોકરી છોડ્યાની તારીખ) સાચી હોવી જરૂરી છે. જો આ તારીખ ખોટી હશે અથવા નહીં હોય, તો તમારું ફંડ ટ્રાન્સફર રિજેક્ટ થઈ જશે.

પેન્શન અટકી શકે: EPFOના નિયમ મુજબ, એમ્પ્લોય પેન્શન સ્કીમ હેઠળ પેન્શન મેળવવા માટે તમારે સળંગ 10 વર્ષની નોકરી પૂરી કરવી ફરજિયાત છે. જો જોઈનિંગ કે એક્ઝિટ ડેટ ખોટી હશે, તો સિસ્ટમમાં તમારી સર્વિસ ઓછી દેખાશે. આના કારણે તમે પેન્શનના હકદાર હોવા છતાં તેનાથી વંચિત રહી શકો છો.

શું ખોટી તારીખથી PFનું વ્યાજ મળતું બંધ થઈ જાય છે?

ઘણા લોકોને એવો ડર હોય છે કે તારીખ ખોટી હોવાથી તેમના પૈસા ડૂબી જશે કે વ્યાજ નહીં મળે. પણ આવું બિલકુલ નથી! EPFO એ સ્પષ્ટ કર્યું છે કે જો એક્ઝિટ ડેટ ખોટી હોય કે અપડેટ ન થઈ હોય, તો પણ તમારા જમા થયેલા પૈસા પર વ્યાજ મળતું રહે છે. વ્યાજની ગણતરી દર મહિનાના રનિંગ બેલેન્સના આધારે થતી રહે છે. એટલે તમારા પૈસા એકદમ સુરક્ષિત છે.

ઘરે બેઠા ઓનલાઈન કેવી રીતે સુધારવી તારીખ?

હવે તમારે આ કામ માટે કંપનીના કે EPFO ઓફિસના ધક્કા ખાવાની કોઈ જરૂર નથી. નોકરી છોડ્યાના 60 દિવસ પછી કર્મચારીઓ જાતે જ ઓનલાઈન પોર્ટલ પર તારીખ અપડેટ કરી શકે છે. જોકે, આ માટે તમારો UAN આધાર કાર્ડ સાથે લિંક હોવો ખૂબ જ જરૂરી છે.

* સૌથી પહેલા EPFO ના સત્તાવાર 'Unified Member Portal' પર જઈને લોગીન કરો.

* હવે ઉપર આપેલા મેનુ બારમાં 'Manage' વિકલ્પ પર ક્લિક કરો અને તેમાંથી 'Mark Exit' પસંદ કરો.

* તમારો સંબંધિત PF એકાઉન્ટ નંબર (જે કંપનીની તારીખ સુધારવી હોય તે) સિલેક્ટ કરો.

* અહીં તમારી સાચી એક્ઝિટ ડેટ અને નોકરી છોડવાનું સાચું કારણ ભરો.

* છેલ્લે, તમારા આધાર કાર્ડ સાથે લિંક થયેલા મોબાઈલ નંબર પર એક OTP આવશે. આ OTP નાખીને પ્રોસેસ પૂરી કરો.

ખાસ નોંધ: જો તમારો UAN નંબર 1 ઓક્ટોબર 2017 પહેલાનો જૂનો છે અથવા તમારે જોઈનિંગ ડેટમાં કોઈ મોટો ફેરફાર કરવાનો છે, તો તેવા સંજોગોમાં તમારે તમારી કંપની (એમ્પ્લોયર) પાસે વેરિફિકેશન કરાવવું પડી શકે છે.

જ્યારે પણ તમે નોકરી બદલો કે નવરાશનો સમય મળે, ત્યારે ઓનલાઈન જઈને તમારી EPF પાસબુક અને સર્વિસ હિસ્ટ્રી જરૂર ચેક કરો. ભવિષ્યમાં PF ક્લેમ, ટ્રાન્સફર કે રિટાયરમેન્ટના સમયે પેન્શનમાં કોઈ અડચણ ન આવે તે માટે આજે જ તમારી જોઈનિંગ અને એક્ઝિટ ડેટ ચકાસી લો અને જો કોઈ ભૂલ હોય તો તેને તાત્કાલિક સુધારી લો.

આ પણ વાંચો- બેન્ક FD કરતાં વધુ વ્યાજ અને 100% સરકારી ગેરંટી, રિઝર્વ બેન્કની આ સ્કીમમાં પૈસા ડૂબવાનું નથી કોઈ જ જોખમ