નાણા મંત્રાલય UPSને લઈને મૂંઝવણમાં, કર્મચારીઓને કેવી રીતે મળશે નિશ્ચિત પેન્શન?

સરકારે 1 એપ્રિલથી યુનિફાઇડ પેન્શન સ્કીમ (UPS) લાગુ કરી છે, જેના હેઠળ કેન્દ્ર અને રાજ્ય સરકારના કર્મચારીઓને ગેરંટીવાળી પેન્શનનો વિકલ્પ આપવામાં આવ્યો છે. આ યોજના ઉપરાંત ન્યૂ પેન્શન સ્કીમ (NPS)માંથી પણ કોઈ એક પસંદ કરવાની સુવિધા છે. જોકે, UPSની જાહેરાત થઈ ગઈ હોવા છતાં, તેના અમલ માટેની ચોક્કસ રણનીતિ હજી નક્કી થઈ નથી. આ મુદ્દે નાણાં મંત્રાલય હવે વૈશ્વિક પેન્શન ફંડની વ્યવસ્થાઓનું અધ્યયન કરી રહ્યું છે.

એક વરિષ્ઠ અધિકારીએ જણાવ્યું કે મંત્રાલય વિશ્વભરના પેન્શન ફંડના સંચાલનની પદ્ધતિઓની તપાસ કરી રહ્યું છે. આના આધારે UPS હેઠળ સરકારના વધારાના યોગદાનથી બનતા ફંડના રોકાણના નિયમો નક્કી કરવામાં આવશે. આ યોજનામાં બે પ્રકારના ફંડની રચના થશે - એક વ્યક્તિગત ફંડ અને બીજું પૂલ ફંડ, જેમાં સરકાર વધારાની રકમ ઉમેરશે.

UPS હેઠળ કર્મચારીઓએ પોતાની મૂળ સેલરી અને ડીએના 10 ટકા યોગદાન આપવાનું રહેશે, જેની બરાબર રકમ સરકાર પણ ઉમેરશે. આ ઉપરાંત, ગેરંટીવાળી પેન્શન માટે સરકાર વધારાના 8.5 ટકા યોગદાન પૂલ ફંડમાં નાખશે. આ ફંડનો ઉપયોગ નિશ્ચિત પેન્શન અને નિવૃત્તિ પછી ડીએમાં વધારા માટે થશે.

કર્મચારીઓની ભૂમિકા

વ્યક્તિગત ફંડમાં કર્મચારીઓને NPSની જેમ રોકાણની પસંદગીની સ્વતંત્રતા મળશે. તેઓ નક્કી કરી શકશે કે આ રકમ કેવી રીતે રોકાણમાં મૂકવી અને તેમનો સૂચનો પણ આપી શકશે. જોકે, પૂલ ફંડના રોકાણનો નિર્ણય ફક્ત સરકારના હાથમાં રહેશે. આ જ કારણે સરકાર માટે મુશ્કેલી ઊભી થઈ છે કે આ રકમનું સંચાલન કેવી રીતે કરવું જેથી કર્મચારીઓને ગેરંટીવાળી પેન્શન મળી રહે.

રોકાણના નિયમો ટૂંક સમયમાં

અધિકારીના મતે, નાણાં મંત્રાલય ટૂંક સમયમાં પૂલ ફંડના રોકાણ માટે નિયમો ઘડશે. આ માટે એવું મોડેલ તૈયાર કરવામાં આવશે જે ભારતની પરિસ્થિતિને અનુરૂપ હશે. UPSનો મુખ્ય ઉદ્દેશ્ય કેન્દ્ર સરકારના કર્મચારીઓને નિશ્ચિત પેન્શનની ખાતરી આપવાનો છે, કારણ કે NPS હેઠળ આવી કોઈ ગેરંટી નથી. કર્મચારીઓ NPSમાં રહેવાનું પસંદ કરી શકે છે, પરંતુ એકવાર UPS પસંદ કર્યા બાદ તેને બદલી શકાશે નહીં.

રોકાણના વિકલ્પો

UPS હેઠળ વ્યક્તિગત ફંડ માટે કર્મચારીઓ નિયમનકાર પાસે નોંધાયેલા પેન્શન ફંડમાંથી કોઈ એક પસંદ કરી શકશે. તેમની પાસે ચાર વિકલ્પો હશે, જેમાં 100% સરકારી સિક્યોરિટીઝમાં રોકાણનો સમાવેશ થાય છે. આ ઉપરાંત, 25% ઇક્વિટી એક્સપોઝર સાથે કન્ઝર્વેટિવ લાઇફ સાયકલ ફંડ, 50% ઇક્વિટી એક્સપોઝર સાથે મોડરેટ લાઇફ સાયકલ ફંડ અને એક ડિફોલ્ટ યોજના પણ ઉપલબ્ધ રહેશે. નાણાં મંત્રાલય હવે આ યોજનાને સફળ બનાવવા માટે ઝડપથી કામ કરી રહ્યું છે, જેથી કર્મચારીઓને નિવૃત્તિ પછી આર્થિક સુરક્ષા મળી રહે.

આ પણ વાંચો-મધ્યમ વર્ગને મળી શકે છે મોટી રાહત, 9 એપ્રિલે આવશે મહત્વનો નિર્ણય