Credit Score: શું તમારો ક્રેડિટ સ્કોર 550 છે? જાણો તેનાથી શું મુશ્કેલીઓ આવી શકે છે

Credit Score: આજના સમયમાં ક્રેડિટ સ્કોર એક મહત્વનું નાણાકીય સૂચક બની ગયું છે. બેન્કો અને નાણાકીય સંસ્થાઓ હોમ લોન, કાર લોન કે પર્સનલ લોન આપતા પહેલાં કસ્ટમર્સનો ક્રેડિટ સ્કોર તપાસે છે. જો તમારો ક્રેડિટ સ્કોર 550 હોય, તો તે નબળો ગણાય છે અને આનાથી અનેક નાણાકીય મુશ્કેલીઓનો સામનો કરવો પડી શકે છે. નિષ્ણાતોનું માનવું છે કે આવા ક્રેડિટ સ્કોરને સુધારવા માટે તાત્કાલિક પગલાં લેવા જરૂરી છે.

ક્રેડિટ સ્કોર 550 હોવાનો અર્થ શું?

ક્રેડિટ સ્કોર એ એક આંકડો છે જે તમારી નાણાકીય વિશ્વસનીયતા દર્શાવે છે. 550નો સ્કોર નબળો ગણાય છે, જે બેન્કો અને નોન-બેન્કિંગ ફાઇનાન્શિયલ કંપનીઓ (NBFC) માટે તમને 'જોખમી' કસ્ટમર્સ તરીકે દર્શાવે છે. આનાથી લોન મેળવવી મુશ્કેલ બની શકે છે, અને જો લોન મળે તો વ્યાજનો દર ઘણો ઊંચો હોઈ શકે છે. નિષ્ણાતોના મતે, જેમ બ્લડ પ્રેશરની સમસ્યા હોય ત્યારે ડૉક્ટરની સલાહ લેવી જરૂરી છે, તેવી જ રીતે નબળા ક્રેડિટ સ્કોરના કિસ્સામાં નાણાકીય સલાહકારનો સંપર્ક કરવો જોઈએ.

નબળા ક્રેડિટ સ્કોરનાં કારણો

-ક્રેડિટનો અતિરેક ઉપયોગ: ક્રેડિટ લિમિટનો મોટો હિસ્સો વારંવાર ઉપયોગમાં લેવો.

-લોન પર ડિફૉલ્ટ: લોનની ચુકવણી ન કરવી અથવા નિયમિત ચુકવણીમાં નિષ્ફળતા.

-વારંવાર લોનની પૂછપરછ: ટૂંકા ગાળામાં ઘણી બેન્કો પાસેથી લોન વિશે માહિતી મેળવવી.

આ બધાં પરિબળો તમારા ક્રેડિટ સ્કોરને નુકસાન પહોંચાડે છે અને બેન્કોને તમારા પર વિશ્વાસ ઓછો થાય છે.

શું તમારી ક્રેડિટ રિપોર્ટમાં ભૂલ છે?

કેટલીકવાર ક્રેડિટ રિપોર્ટમાં ખોટી માહિતીના કારણે પણ સ્કોર ઓછો દેખાઈ શકે છે. તમે ટ્રાન્સયુનિયન, ઇક્વિફેક્સ અથવા એક્સપિરિયન જેવી ક્રેડિટ રેટિંગ એજન્સીઓ પાસેથી તમારો ક્રેડિટ રિપોર્ટ મેળવી શકો છો. રિપોર્ટની દરેક વિગત ધ્યાનથી તપાસો. જો કોઈ ભૂલ જણાય, તો તેને સુધારવા માટે સંબંધિત એજન્સીને જાણ કરો. આનાથી તમારો ક્રેડિટ સ્કોર સુધરી શકે છે. નિષ્ણાતોની સલાહ છે કે દર 6 મહિને એકવાર ક્રેડિટ રિપોર્ટ તપાસવો જોઈએ.

ક્રેડિટ સ્કોર સુધારવાના સરળ ઉપાય

-સમયસર ચુકવણી: ક્રેડિટ કાર્ડનું બિલ, લોનની EMI, ફોન બિલ અને અન્ય ચુકવણીઓ નિયત તારીખ પહેલાં કરો.

-ઓટો-પેમેન્ટ સુવિધા: જો તમને ચુકવણીની તારીખ યાદ ન રહેતી હોય, તો ઓટો-પેમેન્ટ સુવિધા શરૂ કરો.

-ક્રેડિટ લિમિટનો ઓછો ઉપયોગ: તમારી ક્રેડિટ લિમિટના 30%થી વધુ ઉપયોગ ટાળો.

-વધારે પૂછપરછ ટાળો: બિનજરૂરી રીતે લોન કે ક્રેડિટ કાર્ડ માટે અરજી ન કરો, કારણ કે આનાથી સ્કોર ઘટે છે.

-લોનની નિયમિત ચુકવણી: જો તમે લોન લીધું હોય, તો તેની EMI નિયમિત ચૂકવો. લોનની સફળ ચુકવણી સ્કોર સુધારવામાં મદદ કરે છે.

વધુ લોન લેવાની આદત પણ નુકસાનકારક

નિષ્ણાતોનું કહેવું છે કે કેટલાક લોકો વારંવાર પર્સનલ લોન લેવાની અથવા બેન્કો પાસેથી લોન વિશે પૂછપરછ કરવાની આદત રાખે છે. આનાથી તેમના ક્રેડિટ સ્કોર પર નકારાત્મક અસર પડે છે. નિષ્ણાતોની સલાહ છે કે પર્સનલ લોન ફક્ત ત્યારે જ લેવું જોઈએ જ્યારે તે અત્યંત જરૂરી હોય. લોન લીધા બાદ તેની EMIની ચુકવણી નિયમિત રીતે કરવી જોઈએ, જેથી સ્કોરમાં સુધારો થઈ શકે.

આ પણ વાંચો-Boycott Turkey : પાકિસ્તાનને ટેકો આપ્યા બાદ, સરકાર તુર્કી કંપનીઓ પર કડક, ઉડ્ડયન કંપનીઓ પર ખાસ ધ્યાન