નવી મુંબઈ ઇન્ટરનેશનલ એરપોર્ટ પર લાગશે યુઝર ફી, મુસાફરોને ચૂકવવા પડશે 1,225 રૂપિયા

જો તમે નવી મુંબઈ ઇન્ટરનેશનલ એરપોર્ટથી મુસાફરી કરવાનું વિચારી રહ્યા છો, તો તમારે હવે યુઝર ડેવલપમેન્ટ ફી (UDF) ચૂકવવા માટે તૈયાર રહેવું પડશે. એરપોર્ટ્સ ઇકોનોમિક રેગ્યુલેટરી ઓથોરિટી (AERA) દ્વારા આ ફી લગાવવાની મંજૂરી આપવામાં આવી છે, જે અંતર્ગત મુસાફરોને એરપોર્ટનો ઉપયોગ કરવા માટે નિર્ધારિત શુલ્ક ચૂકવવો પડશે.

કેટલી હશે UDF?

AERAના આદેશ અનુસાર, નવી મુંબઈ ઇન્ટરનેશનલ એરપોર્ટ પરથી ફ્લાઇટ લેતા મુસાફરો માટે ઘરેલું ઉડાન માટે 620 અને આંતરરાષ્ટ્રીય ઉડાન માટે 1,225 યુઝર ડેવલપમેન્ટ ફી લાગુ પડશે. આ ઉપરાંત, એરપોર્ટ પર લેન્ડ થતા મુસાફરો માટે ઘરેલું ઉડાન માટે 270 અને આંતરરાષ્ટ્રીય ઉડાન માટે 525 UDF રહેશે.

ક્યારે શરૂ થશે એરપોર્ટ અને UDF નો અમલ?

AERAએ નાણાકીય વર્ષ 2025-26 માટે અનૌપચારિક ધોરણે આ UDFને મંજૂરી આપી છે. આ ફી 31 માર્ચ 2026 સુધી અથવા નિયમિત ફીના અંતિમ નિર્ધારણ સુધી (જે વહેલું હોય તે) લાગુ રહેશે. ત્યારબાદ, એરપોર્ટ ઓથોરિટી દ્વારા નિયમિત ટેરિફ પોલિસી બનાવવામાં આવશે અને UDF માં ફેરફારો થઈ શકે છે.

NMIAની ક્ષમતા અને ભવિષ્યની યોજનાઓ

આ નવા એરપોર્ટની પ્રથમ અને બીજા તબક્કામાં વાર્ષિક બે કરોડ મુસાફરોને હેન્ડલ કરવાની ક્ષમતા હશે. ભવિષ્યમાં તેની ક્ષમતામાં તબક્કાવાર વધારો કરવામાં આવશે. નાણાકીય વર્ષ 2030 સુધીમાં ત્રીજા તબક્કામાં 5 કરોડ, ચોથા તબક્કામાં 7 કરોડ અને અંતિમ પાંચમા તબક્કામાં 9 કરોડ મુસાફરોને હેન્ડલ કરવાની ક્ષમતા પ્રાપ્ત કરવાનો લક્ષ્યાંક છે.

AERAએ નાણાકીય વર્ષ 2026માં આ એરપોર્ટ પરથી 11.98 મિલિયન મુસાફરોની અવરજવરનો અંદાજ લગાવ્યો છે. આ UDF એરપોર્ટના વિકાસ અને સંચાલન ખર્ચને પહોંચી વળવા માટે મદદરૂપ થશે.