જૂની ટેક્સ રિજીમ માટે નવા કડક નિયમો: હવે ડોક્યુમેન્ટરી પુરાવા વિના નહીં મળે ડિડક્શન

ઇન્કમ ટેક્સ રિટર્ન (ITR) ફાઇલિંગની પ્રક્રિયામાં નાણાકીય વર્ષ 2024-25 (એસેસમેન્ટ યર 2025-26) માટે નવા અને કડક નિયમો લાગુ કરવામાં આવ્યા છે. જો તમે જૂની ટેક્સ રિજીમ પસંદ કરી હોય, તો હવે દરેક રોકાણ અને ખર્ચના ડિડક્શન માટે ડોક્યુમેન્ટરી પુરાવા રજૂ કરવા ફરજિયાત બન્યા છે. ઇન્કમ ટેક્સ ડિપાર્ટમેન્ટે સ્પષ્ટ કર્યું છે કે એકંદર રકમની એન્ટ્રીથી હવે કોઈ ટેક્સ છૂટ મળશે નહીં. આ નવા નિયમોનો હેતુ ખોટા ડિડક્શન અને બનાવટી રિફંડના દાવાઓને રોકવાનો છે.

નવા નિયમો શું છે?

ટેક્સપેયર્સે હવે રોકાણ અને ખર્ચની માહિતી PAN અને આધાર સાથે લિંક કરવી પડશે. આનાથી ઇન્કમ ટેક્સ ડિપાર્ટમેન્ટ ઇન્શ્યોરન્સ કંપનીઓ, બેંકો, વાહન પોર્ટલ (Vahan), નોકરીદાતાઓ અને અન્ય સરકારી પ્લેટફોર્મ્સ સાથે ક્રોસ-વેરિફિકેશન કરી શકશે. આ પગલાંથી ખોટા રિટર્ન અને છુપાયેલી આવકને રોકવામાં મદદ મળશે.

કયા ડિડક્શન માટે શું આપવું પડશે?

સેક્શન 80C (રોકાણ):

LIC, PPF, NSC, ELSS, હોમ લોનનું મૂડી ચુકવણી વગેરે માટે પોલિસી નંબર અથવા ડોક્યુમેન્ટ આઇડેન્ટિફિકેશન નંબર આપવો પડશે.

હાઉસ રેન્ટ એલાઉન્સ (HRA):

કર્મચારીઓએ પોતાનું બેઝિક પગાર, કામનું સ્થળ, મળેલ HRA અને ચૂકવેલ ભાડાની વિગતો આપવી પડશે.

સેક્શન 80D (હેલ્થ ઇન્શ્યોરન્સ):

ઇન્શ્યોરન્સ કંપનીનું નામ અને પોલિસી નંબર આપવું ફરજિયાત છે.

સેક્શન 24b (હોમ લોનનું વ્યાજ):

લોન આપનાર સંસ્થાનું નામ, લોન એકાઉન્ટ નંબર, સેંક્શન તારીખ, કુલ લોનની રકમ, હાલનું બાકી બેલેન્સ અને વ્યાજની રકમની વિગતો આપવી પડશે.

સેક્શન 80E (ઉચ્ચ શિક્ષણ લોન):

લોન એકાઉન્ટની સંપૂર્ણ માહિતી સાથે વ્યાજની રકમ આપવી પડશે.

સેક્શન 80EEB (ઇલેક્ટ્રિક વ્હીકલ લોન):

લોનની વિગતો સાથે વાહનનો રજિસ્ટ્રેશન નંબર આપવો પડશે.

સેક્શન 80DDB (ગંભીર રોગોની સારવાર):

સારવાર થઈ રહેલા રોગનું નામ સ્પષ્ટ કરવું પડશે.

સેક્શન 80EEA (સસ્તા મકાનની લોન):

સેક્શન 80EEની જેમ તમામ વિગતો શેર કરવી પડશે.

ITR ફાઇલિંગની ડેડલાઇન વધી

જૂની અને નવી ટેક્સ રિજીમ તેમજ ITR ફોર્મમાં થયેલા ફેરફારોને ધ્યાનમાં રાખીને ઇન્કમ ટેક્સ ડિપાર્ટમેન્ટે એસેસમેન્ટ યર 2025-26 માટે ITR ફાઇલ કરવાની અંતિમ તારીખ 31 જુલાઈથી વધારીને 15 સપ્ટેમ્બર 2025 કરી દીધી છે. આનાથી ટેક્સપેયર્સને રિટર્ન ફાઇલ કરવા માટે 45 દિવસનો વધારાનો સમય મળશે.

એક્સપર્ટની સલાહ

ટેક્સ એક્સપર્ટ્સનું કહેવું છે કે ટેક્સપેયર્સે તમામ રોકાણ અને ખર્ચના ડોક્યુમેન્ટ્સ અગાઉથી તૈયાર રાખવા જોઈએ. આનાથી નિર્ધારિત સમયમાં સચોટ રિટર્ન ફાઇલ કરવું સરળ બનશે. જો ખોટી માહિતી આપવામાં આવશે અથવા ડોક્યુમેન્ટરી પુરાવા વિના ડિડક્શનનો દાવો કરવામાં આવશે, તો ટેક્સ ડિપાર્ટમેન્ટ કાર્યવાહી કરી શકે છે.

શા માટે આ નિયમો મહત્વના છે?

આ નવા નિયમો ટેક્સ સિસ્ટમને વધુ પારદર્શી અને ચોક્કસ બનાવવા માટે લાગુ કરવામાં આવ્યા છે. PAN અને આધાર લિંકેજથી ટેક્સ ચોરી અને ખોટા રિફંડના કેસ ઘટશે, જેનાથી સરકારની આવકમાં વધારો થશે.

આ પણ વાંચો-કચ્છમાં ઓપરેશન સિંદૂરની થીમ પર બનશે ‘સિંદૂર વન’ પાર્ક, જાણો શું-શું હશે ખાસ