September CPI : મોંઘવારીનો ડામ! સપ્ટેમ્બરમાં રિટેલ ફુગાવો 23 મહિનાની ટોચે પહોંચ્યો, ડુંગળી અને લસણના ભાવે કાઢ્યા આંસુ

September CPI : સામાન્ય માણસ માટે મોંઘવારીના મોરચે ખૂબ જ ખરાબ સમાચાર આવ્યા છે. આજે 12 ઓક્ટોબરના રોજ જાહેર થયેલા આંકડા મુજબ, સપ્ટેમ્બર મહિનામાં ભારતનો રિટેલ મોંઘવારી દર ઉછળીને 5.54 ટકા પર પહોંચી ગયો છે. નોંધનીય છે કે ઓગસ્ટમાં આ દર 4.83 ટકા હતો. નવી કન્ઝ્યુમર પ્રાઇસ ઇન્ડેક્સ સિરીઝમાં આ પહેલીવાર બન્યું છે જ્યારે મોંઘવારી દર 5 ટકાની સપાટી વટાવી ગયો હોય. આ સતત છઠ્ઠો મહિનો છે જ્યારે મોંઘવારીના આંકડામાં વધારો નોંધાયો છે.

જોકે, આ ફુગાવો રિઝર્વ બેંક ઓફ ઇન્ડિયાના 4 ટકાના લક્ષ્યાંકથી ઉપર જતો રહ્યો છે, પરંતુ તે હજુ પણ RBI ની 2 થી 6 ટકાની સ્વીકાર્ય મર્યાદાની અંદર જ છે.

ખાવા-પીવાની વસ્તુઓએ બગાડ્યું બજેટ

આ વધારા પાછળ સૌથી મોટો ફાળો ખાવાપીવાની ચીજવસ્તુઓનો છે. કન્ઝ્યુમર ફૂડ પ્રાઇસ ઇન્ડેક્સ મુજબ, ખાદ્યપદાર્થોની મોંઘવારી ઓગસ્ટના 5.97 ટકાથી કૂદકો મારીને સપ્ટેમ્બરમાં સીધી 7.74 ટકા પર પહોંચી ગઈ છે.

ડુંગળીના ભાવે લોકોને ખરેખર રડાવ્યા છે. ડુંગળીનો મોંઘવારી દર ઓગસ્ટમાં 48.78 ટકા હતો, જે સપ્ટેમ્બરમાં ડબલ કરતા પણ વધુ 108.09 ટકા થઈ ગયો. આ ઉપરાંત લસણના ભાવનો દર 43.60 ટકાથી વધીને 54.62 ટકા અને લીંબુમાં 15.15 ટકાથી વધીને 36.41 ટકાનો ઉછાળો જોવા મળ્યો છે.

રાહતના સમાચાર

જોકે શાકભાજીમાં થોડી રાહત પણ છે. બટાકાના ભાવમાં વાર્ષિક ધોરણે 11.50 ટકા અને ટામેટામાં 8.62 ટકાનો ઘટાડો નોંધાયો છે.

ગામડાઓમાં મોંઘવારીની વધુ અસર

શહેરો કરતા ગ્રામીણ વિસ્તારોમાં મોંઘવારીની વધુ ખરાબ અસર જોવા મળી છે. ગ્રામીણ ભારતમાં મોંઘવારી દર 5.24 ટકાથી વધીને સીધો 6.08 ટકા એટલે કે 6 ટકાની પાર પહોંચી ગયો છે. શહેરી વિસ્તારોમાં આ દર 4.31 ટકાથી વધીને 4.88 ટકા નોંધાયો છે. રાજ્યોની વાત કરીએ તો, તમિલનાડુમાં સૌથી વધુ 6.81 ટકા મોંઘવારી દર નોંધાયો છે. ત્યારબાદ ઓડિશા (6.70%), મધ્યપ્રદેશ (6.68%) અને તેલંગાણા (6.64%) નો નંબર આવે છે.

અન્ય કઈ વસ્તુઓ થઈ મોંઘી?

માત્ર શાકભાજી જ નહીં, અન્ય સેવાઓ અને વસ્તુઓના ભાવ પણ વધ્યા છે. ફૂડ એન્ડ બેવરેજીસનો મોંઘવારી દર 5.66 ટકાથી વધીને 7.36 ટકા થયો છે.

પાન-મસાલા અને તમાકુ મોંઘવારી: 4.71% થી વધીને 4.8%

એજ્યુકેશન (શિક્ષણ) સેવાઓ: 3.73% થી વધીને 3.94%

ટ્રાન્સપોર્ટેશન (વાહનવ્યવહાર): 4.60% થી વધીને 5.01%

કપડાં અને પગરખાં: 3.56% થી વધીને 3.93%

હાઉસિંગ યુટિલિટી: 2.61% થી વધીને 2.74%

આ તમામ આંકડા સ્પષ્ટ દર્શાવે છે કે સપ્ટેમ્બર મહિનામાં મોંઘવારીએ છેલ્લા 23 મહિનાનો રેકોર્ડ તોડ્યો છે.

આ પણ વાંચો-શેરબજારમાં કડાકા વચ્ચે પણ મ્યુચ્યુઅલ ફંડમાં રોકાણકારોનો જબ્બર દાવ: SIPમાં રેકોર્ડબ્રેક રોકાણ, ગોલ્ડ ETFની ચમક વધી