Budget 2027: શેરબજારના રોકાણકારોને બજેટમાં મળી શકે છે મોટી ભેટ! LTCG ટેક્સમાં છૂટ અને STTમાં 50% ઘટાડા પર મંથન શરૂ
બજેટ 2027 પહેલાં શેરબજારના રોકાણકારો માટે મોટા સમાચાર! નાણા મંત્રાલય STT માં 50% ઘટાડો કરવા અને LTCG ટેક્સમાં છૂટ આપવા પર વિચાર કરી રહ્યું છે. જાણો સરકારનો પ્લાન.
રિપોર્ટ મુજબ, શોર્ટલિસ્ટ કરવામાં આવેલી આ ભલામણો ખૂબ જ ટૂંક સમયમાં નાણામંત્રી નિર્મલા સીતારમણ સમક્ષ રજૂ કરવામાં આવશે.
Budget 2027 : આગામી સામાન્ય બજેટ 2027 ની તૈયારીઓ વચ્ચે શેરબજારના કરોડો રોકાણકારો માટે ખૂબ જ રાહતના સમાચાર સામે આવી રહ્યા છે. બ્લૂમબર્ગના એક તાજેતરના રિપોર્ટ અનુસાર, નાણા મંત્રાલયના મહેસૂલ અધિકારીઓ ઈક્વિટી રોકાણ પર લાગતા ટેક્સનું ભારણ ઘટાડવાના પ્રસ્તાવો પર ગંભીરતાથી વિચાર કરી રહ્યા છે.
આ પ્રસ્તાવ હેઠળ શેર ટ્રેડિંગ પર લાગતા સિક્યોરિટીઝ ટ્રાન્ઝેક્શન ટેક્સમાં 50% સુધીનો મોટો ઘટાડો કરવાની અને લોન્ગ ટર્મ કેપિટલ ગેઈન્સ ટેક્સમાં રાહત આપવાની સમીક્ષા ચાલી રહી છે. બીજી તરફ, બજારમાં સટ્ટાકીય કારોબાર પર લગામ કસવા માટે ડેરિવેટિવ્ઝ પર ટેક્સ વધારવા અંગે પણ વિચારણા કરવામાં આવી રહી છે.
નાણામંત્રી નિર્મલા સીતારમણ સમક્ષ રજૂ થશે ભલામણો
રિપોર્ટ મુજબ, શોર્ટલિસ્ટ કરવામાં આવેલી આ ભલામણો ખૂબ જ ટૂંક સમયમાં નાણામંત્રી નિર્મલા સીતારમણ સમક્ષ રજૂ કરવામાં આવશે. આ પહેલાં સેન્ટ્રલ બોર્ડ ઓફ ડાયરેક્ટ ટેક્સીસના ચેરમેન રવિ અગ્રવાલે પણ નવી દિલ્હીમાં એક કાર્યક્રમ દરમિયાન સંકેત આપ્યો હતો કે પ્રી-બજેટ ચર્ચા દરમિયાન નાણા મંત્રાલય વિવિધ પક્ષકારોના સૂચનોની તપાસ કરી રહ્યું છે.
તેમણે જણાવ્યું હતું કે 1 ફેબ્રુઆરી, 2027 ના રોજ રજૂ થનારા સામાન્ય બજેટમાં કોઈ અંતિમ નિર્ણયની જાહેરાત કરતા પહેલાં સરકાર કેપિટલ ગેઈન્સ ટેક્સ વ્યવસ્થાના તમામ પાસાઓનું ઝીણવટભર્યું વિશ્લેષણ કરશે.
બેવડા ટેક્સના મારમાંથી મુક્તિ અને LTCG ટેક્સ પર મળી શકે છે મોટી ભેટ
બજારના નિષ્ણાતો અને રોકાણકારો લાંબા સમયથી ઈક્વિટી રોકાણ પર લાગતા બેવડા ટેક્સનું ભારણ ઘટાડવાની માંગ કરી રહ્યા છે. હકીકતમાં, રોકાણકારને ટ્રેડિંગમાં નફો થાય કે નુકસાન, દરેક ટ્રેડની વેલ્યુ પર STT વસૂલવામાં આવે છે. તેની ઉપર લોન્ગ ટર્મ અને શોર્ટ ટર્મ કેપિટલ ગેઈન્સ ટેક્સ લાગવાથી રોકાણકારો પર બેવડો માર પડે છે. તાજેતરમાં નાણામંત્રી નિર્મલા સીતારમણ સમક્ષ એવો પ્રસ્તાવ પણ મૂકવામાં આવ્યો છે કે લાંબા ગાળાના રોકાણને આકર્ષિત કરવા માટે લિસ્ટેડ સિક્યોરિટીઝ પર LTCG ટેક્સમાંથી મળતી છૂટ ફરીથી બહાલ કરવામાં આવે.
ઉલ્લેખનીય છે કે વર્ષ 2004 માં તત્કાલીન નાણામંત્રી પી. ચિદમ્બરમે LTCG ટેક્સ નાબૂદ કરીને તેની જગ્યાએ STT લાગુ કર્યો હતો, પરંતુ વર્ષ 2018 માં તત્કાલીન નાણામંત્રી અરુણ જેટલીએ ફરીથી LTCG ટેક્સ લાગુ કરી દીધો હતો. હવે પ્રસ્તાવમાં જણાવાયું છે કે સરકાર 2004 ની જેમ જ LTCG ટેક્સમાં છૂટ ફરી શરૂ કરવા અને સરકારી તિજોરીની આવક જાળવી રાખવા માટે ડિલિવરી-આધારિત ટ્રાન્ઝેક્શન પર STTમાં સંતુલિત ફેરફાર કરવા પર વિચાર કરી શકે છે.
F&O માં રોકાણકારોના 91,700 કરોડના નુકસાન પર સરકારની નજર
ડેરિવેટિવ્ઝ સેગમેન્ટમાં ઓછો ટેક્સ હોવાને કારણે ખાસ કરીને ઓપ્શન્સ ટ્રેડિંગમાં સટ્ટાબાજીને ભારે પ્રોત્સાહન મળ્યું છે, જ્યારે તેની સામે કેશ માર્કેટમાં ટ્રેડિંગ પ્રમાણમાં સુસ્ત રહ્યું છે.
માર્કેટ રેગ્યુલેટર SEBI ના આંકડા મુજબ, માર્ચ 2026 ના રોજ પૂરા થયેલા નાણાકીય વર્ષમાં ઈક્વિટી ડેરિવેટિવ્ઝમાં કારોબાર કરનારા આશરે 88% ટ્રેડર્સને નુકસાન સહન કરવું પડ્યું હતું. તેમનું કુલ નુકસાન અંદાજે 91,700 કરોડ (10 અબજ ડોલર) રહ્યું હતું, જેમાં એકલા ઓપ્શન્સ ટ્રેડિંગનો હિસ્સો 92% હતો. આ ગંભીર સ્થિતિને ધ્યાનમાં રાખીને સરકાર કેશ માર્કેટને પ્રોત્સાહન આપવા અને F&O માં બિનજરૂરી જોખમ ઘટાડવાની દિશામાં પગલાં ભરી શકે છે.
હાલમાં શું છે LTCG, STCG અને STT ના નિયમો?
LTCG ટેક્સ: હાલમાં ઈક્વિટી, મ્યુચ્યુઅલ ફંડ, પ્રોપર્ટી અને સોનાના રોકાણમાંથી 1 વર્ષમાં થતા 1.25 લાખથી વધુના લાંબા ગાળાના નફા પર 12.5% ના દરે ટેક્સ લાગે છે. તેમાં ઈન્ડેક્સેશનનો લાભ પણ બંધ કરી દેવામાં આવ્યો છે.
STCG ટેક્સ: શોર્ટ ટર્મ કેપિટલ ગેઈન્સ પર અત્યારે 20% ના દરે ટેક્સ વસૂલવામાં આવે છે.
STTના દરો: ઈક્વિટી ફ્યુચર્સના વેચાણ પર STT 0.05% છે (જે પહેલા 0.02% હતો). ઓપ્શન્સના વેચાણ પર તે ઓપ્શન પ્રીમિયમના 0.15% છે (જે પહેલા 0.1% હતો). જ્યારે કોઈ ઓપ્શન એક્સરસાઈઝ કરવામાં આવે, ત્યારે ખરીદનારે ઓપ્શનની ઈન્ટ્રિન્સિક વેલ્યુ પર 0.15% STT ચૂકવવો પડે છે.
ડિસ્ક્લેમર: આ માહિતી માત્ર જાણકારીના હેતુથી આપવામાં આવી છે. અહીં જણાવવું જરૂરી છે કે શેરબજારમાં રોકાણ એ બજારના જોખમોને આધીન છે. રોકાણકારોએ કોઈપણ જગ્યાએ નાણાં રોકતા પહેલા હંમેશા નિષ્ણાતની સલાહ લેવી જોઈએ. મનીકંટ્રોલ દ્વારા ક્યારેય પણ કોઈને રોકાણ કરવાની સલાહ આપવામાં આવતી નથી.