PM મોદીની એક અપીલ અને IndiGoના શેર કડડભૂસ! જાણો શા માટે શેરમાં આવ્યો 5% નો મોટો ઘટાડો

IndiGo Share Price: ઘરેલુ શેરબજારમાં જોવા મળી રહેલા હાહાકાર વચ્ચે દેશની સૌથી મોટી એરલાઇન કંપની IndiGo (ઇન્ટરગ્લોબ એવિએશન) ના રોકાણકારોને મોટો ઝટકો લાગ્યો છે. વડાપ્રધાન નરેન્દ્ર મોદીએ દેશવાસીઓને કરેલી એક ખાસ અપીલ બાદ, શરૂઆતી કારોબારમાં જ કંપનીના શેર 5% થી વધુ તૂટી ગયા હતા. ચાલો જાણીએ કે પીએમ મોદીની કઈ વાતની અસર ઇન્ડિગોના શેર પર પડી છે અને કંપનીના શેરની અત્યાર સુધીની ચાલ કેવી રહી છે.

શેરબજારમાં ઇન્ડિગોના શેરની સ્થિતિ

દિગ્ગજ એવિએશન કંપની ઇન્ડિગોની પેરેન્ટ કંપની ‘ઇન્ટરગ્લોબ એવિએશન'ના શેરમાં આજે ભારે વેચવાલી જોવા મળી. વૈશ્વિક સ્તરે આર્થિક અનિશ્ચિતતા અને ઈરાન-અમેરિકા વચ્ચે શાંતિ કરાર ન થવાને કારણે ક્રૂડ ઓઇલ (કાચા તેલ) ના ભાવ આસમાને પહોંચ્યા છે. આ વૈશ્વિક ટેન્શન અને પીએમ મોદીની અપીલના કારણે BSE પર ઇન્ડિગોનો શેર ઇન્ટ્રા-ડેમાં 5.24% તૂટીને 4,285.05 ના સ્તરે આવી ગયો હતો. જોકે, હાલમાં આ શેર 4.67% ના ઘટાડા સાથે 4311.15 પર ટ્રેડ કરી રહ્યો છે.

પીએમ મોદીએ પોતાની અપીલમાં શું કહ્યું?

પેટ્રોલ-ડીઝલની બચત: લોકો મેટ્રો અને બસ જેવા પબ્લિક ટ્રાન્સપોર્ટનો વધુ ઉપયોગ કરે, કાર-પૂલિંગ કરે અને ઇલેક્ટ્રિક વાહનો (EV) અપનાવે. સાથે જ માલસામાનની હેરફેર માટે રેલવેનો ઉપયોગ વધારવા પર ભાર મૂક્યો.

વિદેશ પ્રવાસ અને ખર્ચ ટાળવો: આગામી એક વર્ષ સુધી બિનજરૂરી વિદેશ પ્રવાસ, વિદેશમાં ડેસ્ટિનેશન વેડિંગ અને સોનાની ખરીદી ટાળવા અપીલ કરી.

દેશભક્તિ: વિદેશી હૂંડિયામણ (Foreign Exchange Reserve) બચાવવાને તેમણે દેશભક્તિનું કામ ગણાવ્યું.

લોકલને સપોર્ટ: દેશની આર્થિક સ્થિતિ મજબૂત કરવા માટે ભારતમાં જ હરવા-ફરવા, તહેવારો ઉજવવા અને સ્વદેશી (ભારતમાં બનેલી) વસ્તુઓ વાપરવા માટે પ્રોત્સાહિત કર્યા.

IndiGo પહેલેથી જ ટિકિટ મોંઘી કરી ચૂકી છે

અમેરિકા અને ઈરાન વચ્ચેના તણાવના કારણે આખી દુનિયામાં ખળભળાટ છે, જેનાથી એવિએશન ટર્બાઇન ફ્યુઅલ (ATF) એટલે કે જેટ ફ્યુઅલ ખૂબ જ મોંઘુ થઈ ગયું છે. આ ખર્ચને પહોંચી વળવા માટે દેશની સૌથી મોટી એરલાઇન ઇન્ડિગોએ ગયા મહિને ડોમેસ્ટિક અને ઇન્ટરનેશનલ ફ્લાઇટ્સના ફ્યુઅલ સરચાર્જમાં મોટો ફેરફાર કર્યો હતો.

પહેલા ડોમેસ્ટિક ફ્લાઇટમાં 425 નો ફ્લેટ ફ્યુઅલ સરચાર્જ હતો, જેને બદલીને હવે અંતર (Distance) ના આધારે 275 થી લઈને 950 સુધી કરી દેવામાં આવ્યો છે. વિદેશી ફ્લાઇટ્સમાં પણ આ સરચાર્જમાં ભારે વધારો કરવામાં આવ્યો છે. જોકે, દેશમાં ATF ના ભાવ વધ્યા હોવા છતાં, સરકાર અને સરકારી તેલ કંપનીઓએ આ વધારાનો માત્ર અમુક હિસ્સો જ ડોમેસ્ટિક એરલાઇન્સ પર લાગુ કરવાનો વિકલ્પ પસંદ કર્યો છે.

એક વર્ષમાં શેરની ચાલ કેવી રહી?

છેલ્લા એક વર્ષના ડેટા પર નજર કરીએ તો ઇન્ડિગોના શેરે રોકાણકારોને મોટો આંચકો આપ્યો છે. 18 ઓગસ્ટ 2025 ના રોજ BSE પર આ શેર 6,225.05 ની સપાટીએ હતો, જે તેના શેર માટે એક વર્ષનો સૌથી હાઈ લેવલ (Record High) છે. આ ઉચ્ચ સ્તરેથી માત્ર 7 મહિનામાં શેર 37.43% જેટલો તૂટીને 23 માર્ચ 2026 ના રોજ 3,894.80 ના લેવલ પર આવી ગયો હતો, જે તેનો એક વર્ષનો રેકોર્ડ લો (Record Low) છે.

અંતમાં કહી શકાય કે, ગ્લોબલ માર્કેટમાં ક્રૂડના વધતા ભાવ અને પીએમ મોદી દ્વારા લોકલ ટુરિઝમને પ્રમોટ કરવાની અપીલની સીધી અસર એવિએશન સેક્ટર અને ખાસ કરીને ઇન્ડિગોના શેર પર જોવા મળી રહી છે.

આ પણ વાંચો- PM મોદીની 1 વર્ષ સુધી સોનું ન ખરીદવાની અપીલથી જ્વેલરી માર્કેટમાં મચ્યો ખળભળાટ, શેરો ગગડ્યા, જાણો એક્સપર્ટ્સની રાય

Disclaimer: મનીકંટ્રોલ.કોમ પર આપવામાં આવેલી સલાહ કે વિચારો એક્સપર્ટ/બ્રોકરેજ ફર્મના અંગત મંતવ્યો છે. વેબસાઇટ કે તેનું મેનેજમેન્ટ તેના માટે જવાબદાર નથી. યુઝર્સને મનીકંટ્રોલ દ્વારા સલાહ આપવામાં આવે છે કે કોઈપણ રોકાણનો નિર્ણય લેતા પહેલા હંમેશા પ્રમાણિત નિષ્ણાતની સલાહ લેવી.