SpaceX Share Crash: રેકોર્ડ હાઈથી 50% તૂટ્યો એલોન મસ્કની કંપનીનો શેર, છીનવાયું 'ટ્રિલિયોનેર' નું સ્ટેટસ, જાણો કડાકાનું કારણ

SpaceX Share Crash: દુનિયાના સૌથી અમીર વ્યક્તિ એલોન મસ્કની સ્પેસ કંપની સ્પેસએક્સ હાલમાં શેરબજારમાં મુશ્કેલીઓનો સામનો કરી રહી છે. કંપનીએ શેર માર્કેટમાં ધમાકેદાર એન્ટ્રી કરીને રોકાણકારોને માલામાલ કરી દીધા હતા. આ તેજીના કારણે એલોન મસ્ક દુનિયાના એકમાત્ર 'ટ્રિલિયોનેર' (1 ટ્રિલિયન ડોલર એટલે કે 1 લાખ કરોડ ડોલરની સંપત્તિ ધરાવનાર) બની ગયા હતા.

જોકે, હવે SpaceX ના શેરમાં આવેલા ભારે કડાકાના કારણે મસ્કની સંપત્તિમાં મોટો ઘટાડો આવ્યો છે અને તેમનું 'ટ્રિલિયોનેર' હોવાનું સ્ટેટસ છીનવાઈ ગયું છે. આ અંગે 24 જુલાઈના રોજ મસ્કે પોતાના સોશિયલ મીડિયા પ્લેટફોર્મ X પર મજાકિયા અંદાજમાં લખ્યું હતું - "ભૂતપૂર્વ ટ્રિલિયોનેર." ચાલો જાણીએ આ શેર કેમ તૂટી રહ્યો છે અને આગળ શું થશે.

SpaceX ના શેરની સફર: હાઈથી લઈને લો સુધી

રોકાણકારોને આ કંપનીના IPO માં $135 ના ભાવે શેર મળ્યા હતા. 12 જૂનના રોજ માર્કેટમાં $150 ના ભાવ સાથે તેનું શાનદાર લિસ્ટિંગ થયું હતું અને પહેલા જ દિવસે તે $176.52 ની ટોચે પહોંચ્યો હતો.ત્યારબાદ 16 જૂને શેરે $225.64 નો નવો રેકોર્ડ હાઈ બનાવ્યો હતો. પરંતુ, હાલમાં નાસ્ડેક પર આ શેર ગગડીને $113.50 પર આવી ગયો છે. એટલે કે, તે તેના ઉચ્ચ સ્તરથી લગભગ 49.70% તૂટી ચૂક્યો છે. 27 જુલાઈના રોજ ઇન્ટ્રા-ડેમાં આ શેરે $108.66 નું રેકોર્ડ નીચલું સ્તર પણ નોંધાવ્યું હતું.

1. કંપનીનો જંગી ખર્ચ અને મોટું નુકસાન

જૂન 2026 ક્વાર્ટરના પરિણામો સામે આવ્યા બાદ રોકાણકારોની ચિંતા વધી ગઈ છે. આ ક્વાર્ટરમાં કંપનીને $430 કરોડની ચોખ્ખી ખોટ થઈ છે. જ્યારે કંપનીની આવક માત્ર $470 કરોડ રહી હતી. આ સામે કંપનીનો કેપિટલ એક્સપેન્ડિચર $1010 કરોડ નોંધાયો છે, જેમાંથી $772 કરોડ માત્ર AI પાછળ ખર્ચવામાં આવ્યા છે.

શરૂઆતમાં રોકાણકારોએ મસ્કના એ દાવા પર ભરોસો કર્યો હતો જેમાં તેમણે કહ્યું હતું કે 2030 ના અંત સુધીમાં SpaceX વાર્ષિક $1 ટ્રિલિયનની આવક મેળવશે (જે 2025 ની $1870 કરોડની અંદાજિત આવક કરતા 50 ગણી વધારે છે). પરંતુ હવે રોકાણકારો આ જંગી ખર્ચ પર નજર રાખી રહ્યા છે, જેથી વેચવાલીનું દબાણ વધ્યું છે.

2. સ્ટારશિપ પ્રોજેક્ટને ફટકો

બીજું મોટું કારણ સ્ટારશિપની 13મી ટેસ્ટ ફ્લાઈટ રદ થવાનું છે. આ ફ્લાઈટ કેન્સલ થતાં કંપનીના માર્કેટ કેપમાં અચાનક $10 હજાર કરોડનો ઘટાડો જોવા મળ્યો હતો. સ્પેસએક્સ માટે 'સ્ટારશિપ' સૌથી મહત્વનો પ્રોજેક્ટ છે, કારણ કે ભવિષ્યમાં મંગળ ગ્રહ પર જવાના અને AI સંબંધિત તમામ મોટા પ્લાન આ પ્રોજેક્ટ પર જ ટકેલા છે.

હવે આગળ શું થશે?

હવે રોકાણકારોની નજર 4 ઓગસ્ટના રોજ આવનારા SpaceX ના સત્તાવાર બિઝનેસ રિઝલ્ટ પર છે. એક પબ્લિક લિસ્ટેડ કંપની તરીકે તે પ્રથમ વખત પોતાનું રિઝલ્ટ જાહેર કરશે. આ ઉપરાંત, 6 ઓગસ્ટે કંપનીના શેરની લોક-અપ એક્સપાયરી થવા જઈ રહી છે. આ એક્સપાયરી ખુલતાની સાથે જ બજારમાં લાખો નવા શેર ટ્રેડિંગ માટે આવશે, જેના કારણે શેરમાં વેચવાલીનું દબાણ વધુ વધી શકે છે.

ટ્રેડિંગના રિપોર્ટ અનુસાર, 31 જેટલા માર્કેટ એનાલિસ્ટ્સે આગામી 12 મહિના માટે આ શેરનો સરેરાશ ટાર્ગેટ પ્રાઈસ $235.18 નક્કી કર્યો છે. જેમાં સૌથી ઊંચો ટાર્ગેટ $800 અને સૌથી નીચો ટાર્ગેટ $115 આપવામાં આવ્યો છે. સ્પેસએક્સમાં શરૂઆતી તબક્કે રોકાણ કરનાર Atreides Management ના CIO ગેવિન બેકરે CNBC ને જણાવ્યું છે કે આમાં ચિંતા કરવા જેવું કંઈ નથી, કારણ કે મોટા IPO લિસ્ટ થયા પછી શરૂઆતના સમયમાં આવો ઘટાડો સામાન્ય બાબત છે.

આ પણ વાંચો-MSRDC કેસમાં HDFC Bankનું મોટું એક્શન: MD-CEO સહિત 3 મોટા અધિકારીઓ પર ફટકાર્યો દંડ, શેરમાં કડાકો

ડિસ્ક્લેમર: આ માહિતી માત્ર જાણકારીના હેતુથી આપવામાં આવી છે. અહીં જણાવવું જરૂરી છે કે શેરબજારમાં રોકાણ એ બજારના જોખમોને આધીન છે. રોકાણકારોએ કોઈપણ જગ્યાએ નાણાં રોકતા પહેલા હંમેશા નિષ્ણાતની સલાહ લેવી જોઈએ. મનીકંટ્રોલ દ્વારા ક્યારેય પણ કોઈને રોકાણ કરવાની સલાહ આપવામાં આવતી નથી.