FMCG માર્કેટમાં મોટો ધમાકો: મુકેશ અંબાણી 668 કરોડની આ ફૂડ કંપની ખરીદશે, ટાટા સાથે થશે સીધો મુકાબલો

Reliance Deal Udhaiyams Agro Foods: ભારતના બિઝનેસ જગતમાં ફરી એકવાર મોટા સમાચાર સામે આવ્યા છે. દિગ્ગજ ઉદ્યોગપતિ મુકેશ અંબાણી હવે FMCG (ફાસ્ટ-મૂવિંગ કન્ઝ્યુમર ગુડ્સ) સેક્ટરમાં પોતાની પકડ વધુ મજબૂત કરવા માટે એક મોટું પગલું ભરવા જઈ રહ્યા છે. તેમની કંપની રિલાયન્સ કન્ઝ્યુમર પ્રોડક્ટ્સ, ચેન્નઈ સ્થિત 'ઉદ્યમ્સ એગ્રો ફૂડ્સ' (Udhaiyams Agro Foods) નામની કંપનીને ખરીદવાની તૈયારીમાં છે.

આ ડીલ લગભગ 668 કરોડની હોવાનું અનુમાન છે, જે FMCG માર્કેટમાં મોટા ફેરફારો લાવી શકે છે. આ સોદા બાદ રિલાયન્સનો સીધો મુકાબલો ટાટા જેવી દિગ્ગજ કંપની સાથે થશે.

શું બનાવે છે ઉદ્યમ્સ એગ્રો ફૂડ્સ?

ઉદ્યમ્સ એગ્રો ફૂડ્સ દક્ષિણ ભારતમાં એક જાણીતું નામ છે. આ કંપની મુખ્યત્વે મસાલા, નાસ્તા (સ્નેક્સ) અને રેડી-ટુ-ઈટ બ્રેકફાસ્ટ મિક્સ જેવા ઉત્પાદનો બનાવે છે. હાલમાં, પ્રાદેશિક બજારમાં તેનો મુકાબલો ટાટા કન્ઝ્યુમર પ્રોડક્ટ્સ, ID ફ્રેશ ફૂડ અને MTR જેવી મોટી બ્રાન્ડ્સ સાથે છે. આ કંપનીને ખરીદવાથી રિલાયન્સને ફૂડ માર્કેટમાં એક મજબૂત શરૂઆત મળશે.

સૂત્રોના જણાવ્યા અનુસાર, રિલાયન્સ આ કંપનીમાં બહુમતી હિસ્સો ખરીદવા માટે વાતચીત કરી રહી છે. આ ડીલ રિલાયન્સની અગાઉની ખરીદીઓ જેવી જ વ્યૂહરચનાનો ભાગ છે, જેમાં 'કેમ્પા સોફ્ટ ડ્રિંક્સ' અને 'વેલવેટ શેમ્પૂ' જેવી બ્રાન્ડ્સનો સમાવેશ થાય છે. રિલાયન્સની યોજના પહેલા પ્રાદેશિક બજારોમાં પોતાની પકડ મજબૂત કરવાની અને પછી ધીમે ધીમે સમગ્ર દેશમાં તેનો વિસ્તાર કરવાની છે.

ખાસ વાત એ છે કે, ઉદ્યમ્સ એગ્રો ફૂડ્સના પ્રમોટર્સ, એસ. સુધાકર અને એસ. દિનકર, કંપનીમાં પોતાનો નાનો હિસ્સો જાળવી રાખશે.

FMCG બિઝનેસ પર રિલાયન્સનું ફોકસ

આ સમાચાર એવા સમયે આવ્યા છે જ્યારે રિલાયન્સ રિટેલે તાજેતરમાં જ પોતાના FMCG બિઝનેસને 'ન્યૂ RCPL' (રિલાયન્સ કન્ઝ્યુમર પ્રોડક્ટ્સ લિમિટેડ) નામની નવી પેટાકંપનીમાં ટ્રાન્સફર કર્યો છે. આ ફેરફારનો મુખ્ય ઉદ્દેશ્ય પેક્ડ કન્ઝ્યુમર બિઝનેસ પર વધુ ધ્યાન કેન્દ્રિત કરવાનો છે. આ બિઝનેસમાં કેમ્પા, સ્યોર વોટર, સિલ જેમ, લોટસ ચોકલેટ અને વેલવેટ પર્સનલ કેર જેવી ઘણી બ્રાન્ડ્સ સામેલ છે.

ભારતનું પેક્ડ ફૂડ માર્કેટ કેટલું મોટું છે?

ઇમાર્ક ગ્રુપ (Imarc Group)ના એક રિપોર્ટ અનુસાર, ભારતનું પેક્ડ ફૂડ માર્કેટ ખૂબ જ ઝડપથી વધી રહ્યું છે. વર્ષ 2024માં આ બજારનું વેચાણ 121.3 અબજ ડોલર હતું. એક અનુમાન મુજબ, વર્ષ 2033 સુધીમાં આ બજાર 224.8 અબજ ડોલર સુધી પહોંચી જશે. આ વૃદ્ધિ 6.5% ના CAGR (કમ્પાઉન્ડ એન્યુઅલ ગ્રોથ રેટ) દરે થવાની અપેક્ષા છે. આ વૃદ્ધિ પાછળનું મુખ્ય કારણ ઝડપી શહેરીકરણ, સુવિધાજનક ભોજનની વધતી માંગ અને ઓનલાઈન ફૂડ ડિલિવરીનો વધતો વ્યાપ છે. રિલાયન્સનો આ નિર્ણય બજારની આ સંભાવનાઓને ધ્યાનમાં રાખીને લેવાયો છે, જે આવનારા સમયમાં ગ્રાહકો માટે વધુ વિકલ્પો અને સ્પર્ધા લાવશે.

આ પણ વાંચો-શેરબજારમાં ભૂકંપ: સેન્સેક્સ 500 પોઈન્ટ તૂટ્યો, નિફ્ટી 25,900 નીચે; રોકાણકારોના શ્વાસ અધ્ધર કરનારા 5 કારણો