ફેસ્ટિવ સીઝનમાં નોકરીઓની બમ્પર ઓફર! ફ્લિપકાર્ટ બાદ હવે Myntra આપશે 26,000થી વધુ રોજગાર

Festive season jobs in India: તહેવારોની સીઝન આવતા જ ઓનલાઈન શોપિંગનો ક્રેઝ વધી જાય છે. વધતી ડિમાન્ડને પહોંચી વળવા ઈ-કોમર્સ કંપનીઓ પણ પોતાની તૈયારીઓમાં લાગી ગઈ છે. આ ફેસ્ટિવ સીઝન માત્ર ગ્રાહકો માટે જ નહીં, પરંતુ નોકરી શોધી રહેલા યુવાનો માટે પણ ખુશખબર લાવી છે. Flipkart બાદ હવે જાણીતી ફેશન અને લાઈફસ્ટાઈલ બ્રાન્ડ Myntra એ પણ 26,000 થી વધુ લોકોને રોજગારી આપવાની જાહેરાત કરી છે.

Myntraના ‘બિગ ફેશન ફેસ્ટિવલ'માં રોજગારની તક

મિંત્રાનો લોકપ્રિય ‘બિગ ફેશન ફેસ્ટિવલ' ટૂંક સમયમાં શરૂ થવા જઈ રહ્યો છે. આ સેલની તૈયારીના ભાગરૂપે કંપનીએ 26,000થી વધુ સીઝનલ નોકરીઓ ઊભી કરી છે. કંપનીના જણાવ્યા અનુસાર, નોકરીઓનો આ આંકડો ગયા વર્ષની સરખામણીમાં બમણો છે.

મહિલાઓ અને દિવ્યાંગો માટે વિશેષ સ્થાન

કયા ક્ષેત્રમાં મળશે નોકરીઓ?

આ સીઝનલ ભરતીમાં અલગ-અલગ વિભાગો માટે લોકોને નોકરી પર રાખવામાં આવશે. જેમાં મુખ્યત્વે નીચે મુજબના કામોનો સમાવેશ થાય છે:

સપ્લાય ચેઈન અને વેરહાઉસિંગ: સામાનનું સોર્ટિંગ, ગ્રેડિંગ અને પેકિંગ કરવું.

ડિલિવરી પાર્ટનર્સ: ગ્રાહકો સુધી સામાન પહોંચાડવા માટે 8,000 જેટલા ડિલિવરી બોયઝ/પાર્ટનર્સની ભરતી.

કસ્ટમર સર્વિસ: ગ્રાહકોના પ્રશ્નો ઉકેલવા માટે 2,700 કસ્ટમર સપોર્ટ એક્ઝિક્યુટિવ.

આ કામગીરી સંભાળવા માટે મિંત્રાએ બિહાર, ઉત્તર પ્રદેશ, મધ્ય પ્રદેશ, ઝારખંડ, ઓડિશા અને કર્ણાટક જેવા રાજ્યોમાંથી યુવાનોની પસંદગી કરી છે. આ તમામ કર્મચારીઓ બેંગલુરુ, મુંબઈ, કોલકાતા, બિલાસપુર અને બિનોલા ખાતે આવેલા કંપનીના 5 મોટા ઓપરેશન હબ પર કામ સંભાળશે.

ડિલિવરી થશે એકદમ ફાસ્ટ

આટલી મોટી સંખ્યામાં ભરતી થવાથી કંપનીની ડિલિવરી ક્ષમતામાં જબરદસ્ત વધારો થશે. ખાસ કરીને મિંત્રાની 'M-એક્સપ્રેસ' સર્વિસ (જેમાં 24 થી 48 કલાકમાં જ સામાન પહોંચાડવામાં આવે છે) તેને મોટો સપોર્ટ મળશે. ગ્રાહકોને સમયસર ઓર્ડર મળી રહે તે જ કંપનીનો મુખ્ય ટાર્ગેટ છે.

ફ્લિપકાર્ટે પણ ખોલ્યો છે નોકરીઓનો પિટારો

નોંધનીય છે કે, મિંત્રા પહેલા Flipkart એ પણ આ ફેસ્ટિવ સીઝનમાં 2.50 લાખથી વધુ સીઝનલ રોજગારીની તકો ઊભી કરવાની માહિતી આપી હતી. તેમાંથી 75,000 નોકરીઓ તો એવા લોકો માટે છે જેઓ પહેલીવાર કામ કરવા જઈ રહ્યા છે. ફ્લિપકાર્ટની આ મહાભરતી દેશભરમાં ફેલાયેલા તેના 7,000થી વધુ ઈ-કાર્ટ ફુલફિલમેન્ટ સેન્ટર અને ડિલિવરી હબ માટે કરવામાં આવી રહી છે.

આ પણ વાંચો- મહારાષ્ટ્રમાં મતદાર યાદી વિવાદ: CEC જ્ઞાનેશ કુમારના 14 આદેશ રદ કરવા બોમ્બે હાઈકોર્ટમાં ધા, SIR પ્રક્રિયા પર સવાલો

આમ, આ વર્ષની તહેવારોની સીઝન માત્ર ઓનલાઈન બમ્પર ડિસ્કાઉન્ટ કે શોપિંગ પૂરતી સીમિત નથી રહી, પરંતુ દેશના હજારો યુવાનો માટે રોજગારની શાનદાર તકો લઈને આવી છે. એમેઝોન, ફ્લિપકાર્ટ અને મિંત્રા જેવી કંપનીઓ અર્થતંત્રમાં રોજગારી વધારવામાં મોટો ફાળો આપી રહી છે.