મહારાષ્ટ્રમાં મતદાર યાદી વિવાદ: CEC જ્ઞાનેશ કુમારના 14 આદેશ રદ કરવા બોમ્બે હાઈકોર્ટમાં ધા, SIR પ્રક્રિયા પર સવાલો

Maharashtra Election Commission: મહારાષ્ટ્રમાં અત્યારે ચૂંટણી પંચની સ્પેશિયલ ઈન્ટેન્સિવ રિવિઝન પ્રક્રિયા એક મોટા કાનૂની વિવાદમાં ફસાઈ ગઈ છે. બોમ્બે હાઈકોર્ટની પ્રિન્સિપલ બેન્ચ અને તેની કોલ્હાપુર સર્કિટ બેન્ચમાં આ મુદ્દે બે અલગ-અલગ અરજીઓ દાખલ કરવામાં આવી છે. મતદાર યાદીમાંથી લોકોના નામ પોતાની મરજી મુજબ હટાવી દેવા, પ્રક્રિયામાં મોટી ગડબડ અને ચૂંટણી પંચની અંદર જ ચાલી રહેલા આંતરિક મતભેદોને લઈને ગંભીર આરોપો લાગ્યા છે.

કોલ્હાપુર બેન્ચમાં પહેલી અરજી: CEC ના 14 આદેશો સામે વાંધો

કોલ્હાપુર બેન્ચમાં ત્રણ સ્થાનિક નાગરિકોએ જાણીતા વકીલ અસીમ સરોદેની ટીમ મારફતે પહેલી અરજી દાખલ કરી છે. આ અરજીમાં ચીફ ઈલેક્શન કમિશનર (CEC) જ્ઞાનેશ કુમારના 14 વહીવટી આદેશોને તાત્કાલિક રદ કરવાની માંગ કરાઈ છે.

અરજીમાં એક ચોંકાવનારો દાવો કરવામાં આવ્યો છે કે, ઈલેક્શન કમિશનર સુખબીર સિંહ સંધૂ અને વિવેક જોશીએ 14 વખત આ મુદ્દે વાંધો ઉઠાવ્યો હતો. તેમણે મતદારોના નામ હટાવવા, ડેટાબેઝના એક્સેસ, સોફ્ટવેરમાં થતી ગડબડી અને જુલાઈ મહિનામાં ફોર્મ 6 માં થયેલા ફેરફારો સામે સવાલો કર્યા હતા. અરજીમાં સ્પષ્ટ કહેવાયું છે કે આ સમગ્ર પ્રક્રિયા 'CEC એન્ડ અધર ECs એક્ટ, 2023' ની કલમ 18 નું ખુલ્લું ઉલ્લંઘન છે.

બીજી અરજી મુંબઈની પ્રિન્સિપલ બેન્ચમાં દાખલ થઈ છે. વંચિત બહુજન આઘાડીના યુવા અધ્યક્ષ સાગર રમેશ ગાયકવાડ અને અન્ય એક સ્થાનિકે વકીલ હેમંત ઘડીગાંવકર, સંદેશ મોરે અને હિતેન્દ્ર ગાંધી મારફતે આ અરજી કરી છે. આ અરજીમાં સુપ્રીમ કોર્ટના ADR ચુકાદાનો હવાલો આપીને જણાવાયું છે કે, બૂથ લેવલના અધિકારીઓ ઘરે-ઘરે જઈને લોકો પાસે ઓળખપત્ર માંગી રહ્યા છે, જે ચૂંટણી પંચના પોતાના જ નિયમોની સીધી વિરુદ્ધ છે. આ ઉપરાંત, સૌથી મોટી ખામી એ છે કે જે મતદારો ઘરે હાજર ન મળ્યા, તેમને કોઈપણ જાતની સુનાવણી કે લેખિત આદેશ વિના સીધા જ ગેરહાજર, સ્થળાંતરિત (બીજે રહેવા ગયેલા), મૃત્યુ પામેલા કે ડુપ્લિકેટની કેટેગરીમાં મૂકી દેવામાં આવ્યા.

અરજદારોની મુખ્ય માંગણીઓ શું છે?

અરજદારોએ કોર્ટમાં બહુ સ્પષ્ટતાથી કહ્યું છે કે તેમનો ઈરાદો ચૂંટણી પ્રક્રિયા રોકવાનો બિલકુલ નથી, પરંતુ તેઓ ઈચ્છે છે કે કાયદાનું સાચું અને કડક પાલન થાય. તેમની મુખ્ય માંગણીઓ નીચે મુજબ છે:

* મતદાર યાદીમાંથી જે લોકોના નામ ખોટી રીતે કે મનસ્વી રીતે હટાવી દેવાયા છે, તેમને ફરીથી યાદીમાં જોડવામાં આવે.

* મહારાષ્ટ્રમાં ચાલી રહેલી SIR પ્રક્રિયા પર તાત્કાલિક સ્ટે (મનાઈહુકમ) લગાવવામાં આવે.

* આ સમગ્ર ગરબડની નિષ્પક્ષ તપાસ માટે હાઈકોર્ટના નિવૃત્ત જજના વડપણ હેઠળ એક સ્વતંત્ર તપાસ સમિતિની રચના થાય.

આગામી અઠવાડિયે આ બંને અરજીઓ પર હાઈકોર્ટમાં તાત્કાલિક ધોરણે સુનાવણી થવાની પૂરી શક્યતા છે. હવે જોવું એ રહ્યું કે ન્યાયતંત્ર આ ગંભીર આરોપો પર ચૂંટણી પંચને શું આદેશ આપે છે.

આ પણ વાંચો- H-1B વિઝા સંકટ: અમેરિકામાં નોકરી છૂટતા લોન પર ઘર ખરીદનારા ભારતીયોની હાલત કફોડી, મજબૂરીમાં વતન વાપસી