પેટ્રોલ-ડીઝલના ભાવમાં 3 રૂપિયાનો વધારો છતાં BPCL, HPCL અને IOCના શેર ગગડ્યા, જાણો હવે રોકાણકારોએ શું કરવું જોઈએ?

OMC Stocks : દેશભરમાં સામાન્ય જનતા માટે પેટ્રોલ અને ડીઝલના ભાવમાં 3 રૂપિયા પ્રતિ લિટરનો વધારો કરવામાં આવ્યો છે. પરંતુ આશ્ચર્યની વાત એ છે કે, ઈંધણ મોંઘુ થવા છતાં શેરબજારમાં ઓઈલ માર્કેટિંગ કંપનીઓ (OMCs) ના શેરમાં નિરાશા જોવા મળી રહી છે. શરૂઆતી કારોબારમાં આ કંપનીઓના શેર 2% સુધી તૂટી ગયા હતા.

શેરબજારમાં કેમ જોવા મળ્યો ઘટાડો?

ગ્લોબલ માર્કેટમાં ક્રૂડ ઓઈલ (કાચું તેલ) ના ભાવ સતત ઊંચા સ્તરે છે. બજારના નિષ્ણાતો અને રોકાણકારોને આશા હતી કે ભાવમાં આનાથી પણ મોટો વધારો થશે. પરંતુ વધારો બજારની અપેક્ષા કરતાં ઓછો હોવાથી શેરોમાં વેચવાલી જોવા મળી.

શેરના લેટેસ્ટ ભાવ પર એક નજર:

HPCL (હિન્દુસ્તાન પેટ્રોલિયમ): શેર 2.17 ટકા તૂટીને 369.35 રૂપિયા પર ટ્રેડ થઈ રહ્યો છે.

IOC (ઈન્ડિયન ઓઈલ): શેરમાં 1.65 ટકાનો ઘટાડો નોંધાયો છે અને તે 137.94 રૂપિયા પર આવી ગયો છે.

કંપનીઓને થઈ રહ્યું છે મોટું નુકસાન

કેન્દ્રીય પેટ્રોલિયમ મંત્રી હરદીપ સિંહ પુરીના જણાવ્યા મુજબ, વર્તમાન સમયમાં ભારતીય ઓઈલ કંપનીઓને દરરોજ લગભગ 1,000 કરોડ રૂપિયાનું નુકસાન સહન કરવું પડી રહ્યું છે. આ કુલ ઘાટો 1,98,000 કરોડ રૂપિયા સુધી પહોંચી શકે તેવી ભીતિ છે. કોટક ઈન્સ્ટિટ્યૂશનલ ઈક્વિટીઝના એક રિપોર્ટ અનુસાર, ક્રૂડના ઊંચા ભાવને કારણે રિફાઈનરીઓ પર દર મહિને આશરે 27,000 કરોડ રૂપિયાનો વધારાનો બોજ પડી રહ્યો છે. નોંધનીય છે કે ભારત પોતાની જરૂરિયાતના 85 ટકા ક્રૂડ ઓઈલની આયાત કરે છે. પશ્ચિમ એશિયામાં તણાવના કારણે ક્રૂડ ઓઈલના ભાવ 107 ડોલર પ્રતિ બેરલની આસપાસ પહોંચી ગયા છે.

પેટ્રોલ અને ડીઝલ કેટલા મોંઘા થયા?

4 વર્ષથી વધુ સમય બાદ ઈંધણના ભાવમાં આટલો મોટો વધારો કરાયો છે:

દિલ્હી: પેટ્રોલ 94.77 રૂપિયાથી વધીને 97.77 રૂપિયા અને ડીઝલ 87.67 રૂપિયાથી વધીને 90.67 રૂપિયા પ્રતિ લિટર થયું છે. દિલ્હીમાં CNG માં પણ 2 રૂપિયા પ્રતિ કિલોનો વધારો થયો છે.

મુંબઈ: પેટ્રોલ 3.30 રૂપિયા વધીને 106.64 રૂપિયા અને ડીઝલ 3.11 રૂપિયા વધીને 93.14 રૂપિયા પ્રતિ લિટર થઈ ગયું છે. પ્રીમિયમ પેટ્રોલના ભાવમાં પણ 2 રૂપિયાનો વધારો કરાયો છે.

OMC કંપનીઓએ અગાઉ કર્યો હતો જંગી નફો

તાજેતરના વર્ષોના આંકડા પર નજર કરીએ તો, આ કંપનીઓએ અગાઉ રેકોર્ડ નફો નોંધાવ્યો હતો. HPCL એ 14,694 કરોડ અને ત્યારબાદ 7,365 કરોડ રૂપિયાનો નફો કર્યો હતો. BPCL એ 26,859 કરોડ અને પછી 13,337 કરોડ રૂપિયા કમાયા હતા. જ્યારે IOC એ 39,619 કરોડ અને ત્યારબાદ 12,962 કરોડ રૂપિયાનો નફો કર્યો હતો.

રોકાણકારો માટે હવે શું હોવી જોઈએ રણનીતિ?

સીએનબીસી-આવાઝના મેનેજિંગ એડિટર અનુજ સિંઘલના જણાવ્યા અનુસાર, ઓઈલ કંપનીઓ સાથે અત્યારે કોઈ સહાનુભૂતિ ન રાખવી જોઈએ. છેલ્લા કેટલાક સમયથી કંપનીઓએ 10 થી 15 ટકા માર્જિન કમાઈને રેકોર્ડ નફો કર્યો હતો. જ્યારે ક્રૂડ સસ્તું થાય છે ત્યારે આ કંપનીઓ ભાવ ઘટાડતી નથી.

નિષ્ણાતની સીધી સલાહ:

OMC શેરો માટેનો સૌથી સારો સમય હવે પૂરો થઈ ગયો છે. કંપનીઓને હવે પહેલા જેવું મોટું વેલ્યુએશન નહીં મળે. HPCL એ તો પહેલા ક્વાર્ટરમાં નુકસાનની આગાહી પણ કરી દીધી છે. જો અત્યારે શેરમાં કોઈ ઉછાળો (Rally) આવે, તો તે રોકાણકારો માટે વેચવાલી (Sell) કરવાની ઉત્તમ તક છે. આગામી સમયમાં જો ક્રૂડ ઓઈલના ભાવમાં મોટો ઘટાડો આવે, તો જ આ શેરોમાં નવેસરથી રોકાણ કરવાનું વિચારવું જોઈએ.

આ પણ વાંચો- શેરબજારમાં પોઝિટિવ ટ્રેન્ડ: ઇન્ટ્રાડેમાં બમ્પર કમાણી માટે આ 2 શેરો પર રાખો નજર, નિષ્ણાતની મોટી સલાહ