LIC Share Price Fall: LICના શેરમાં 7%નો મોટો કડાકો, જાણો આ ભારે ઘટાડા પાછળનું અસલી કારણ શું છે?

LIC Share Price Fall: દેશની સૌથી મોટી વીમા કંપની લાઈફ ઈન્સ્યોરન્સ કોર્પોરેશન ઓફ ઈન્ડિયાના રોકાણકારો માટે એક મોટા સમાચાર સામે આવ્યા છે. મંગળવારે, 4 ઓગસ્ટના રોજ LICના શેરમાં ભારે વેચવાલી જોવા મળી હતી. સરકાર દ્વારા કંપનીમાં OFS લાવવાની જાહેરાત થતાં જ શેર 7% જેટલો તૂટીને 397.80 રૂપિયાના લેવલ પર આવી ગયો હતો.

OFSની શું છે ખાસ વિગતો?

સરકાર આ OFS દ્વારા LIC માં પોતાનો 6.5% હિસ્સો વેચવા જઈ રહી છે. આ હિસ્સો વેચીને સરકાર અંદાજે 31,000 કરોડ રૂપિયા ભેગા કરવાની તૈયારીમાં છે. આ વેચાણ માટે શેર દીઠ 382 રૂપિયાનો 'ફ્લોર પ્રાઇસ' નક્કી કરવામાં આવ્યો છે, જે અગાઉના ક્લોઝિંગ ભાવ કરતાં લગભગ 10થી 11%ના ડિસ્કાઉન્ટ પર છે. બજારમાં નવા શેર આવવાની આશંકા અને આ ભારે ડિસ્કાઉન્ટને કારણે જ શેરમાં અત્યારે દબાણ જોવા મળી રહ્યું છે.

શું છે LIC OFS નું માળખું?

બેસ ઓફર: પ્રથમ તબક્કામાં સરકાર LIC ની 2.5% ઇક્વિટી (શેર મૂડી) વેચી રહી છે.

ગ્રીનશૂ ઓપ્શન: જો સંસ્થાકીય રોકાણકારો તરફથી સારી માંગ નીકળશે, તો વધારાનો 4% હિસ્સો વેચવાનો વિકલ્પ પણ ખુલ્લો રાખવામાં આવ્યો છે.

કુલ હિસ્સાનું વેચાણ: જો ગ્રીનશૂ ઓપ્શનનો પૂરેપૂરો ઉપયોગ થાય, તો સરકાર બજારમાં કુલ 6.5% હિસ્સો વેચશે.

કોના માટે અને ક્યારે ખુલશે આ OFS?

આ OFS ને બે દિવસની વિન્ડોમાં વહેંચવામાં આવ્યું છે:

નોન-રિટેલ રોકાણકારો: સંસ્થાકીય રોકાણકારો અને HNI માટે આ ઇશ્યૂ 4 ઓગસ્ટના રોજ ખુલી ગયો છે.

રિટેલ રોકાણકારો: નાના રોકાણકારો અને લાયક કર્મચારીઓ 5 ઓગસ્ટના રોજ આ OFS માં બોલી લગાવી શકશે. સૌથી સારી વાત એ છે કે, રિટેલ રોકાણકારો અને કર્મચારીઓને કટ-ઓફ પ્રાઇસ પર શેર દીઠ 15 રૂપિયાનું વધારાનું ડિસ્કાઉન્ટ પણ આપવામાં આવશે.

સરકાર શા માટે હિસ્સો વેચી રહી છે?

આ OFS લાવવા પાછળનો મુખ્ય હેતુ માર્કેટ રેગ્યુલેટર SEBI ના મિનિમમ પબ્લિક શેરહોલ્ડિંગના નિયમોનું પાલન કરવાનો છે. મે 2022 માં દેશનો સૌથી મોટો IPO આવ્યા બાદ, સરકાર પાસે LIC નો 96.5% હિસ્સો હતો, જ્યારે પબ્લિક પાસે માત્ર 3.5% શેર હતા. SEBI ના નિયમ મુજબ LIC એ પોતાનો સરકારી હિસ્સો ઘટાડીને 90% કરવા માટે મે 2027 સુધીનો સમય અપાયો છે. હવે આ 6.5% હિસ્સો વેચાયા પછી સરકારનું હોલ્ડિંગ ઘટીને 90% થઈ જશે, એટલે કે સમય મર્યાદા પહેલા જ SEBI નો ટાર્ગેટ પૂરો થઈ જશે.

રોકાણકારો પર શું અસર થશે?

માર્કેટમાં 'ફ્રી-ફ્લોટ' વધવાથી શેરની ટ્રેડિંગ લિક્વિડિટીમાં નોંધપાત્ર સુધારો થશે. પબ્લિક શેરહોલ્ડિંગ વધવાથી ભવિષ્યમાં LICનો ગ્લોબલ અને ડોમેસ્ટિક પેસિવ ઈન્ડેક્સમાં સમાવેશ થવાની શક્યતાઓ પણ મજબૂત બનશે.

ફ્લોર પ્રાઇસ ડિસ્કાઉન્ટ પર હોવાથી ટૂંકા ગાળામાં શેરમાં ઉતાર-ચઢાવ જોવા મળી શકે છે. પરંતુ લાંબા ગાળાના રોકાણકારો અને રિટેલ ખરીદદારો માટે સસ્તા ભાવે એન્ટ્રી લેવાની આ એક શાનદાર તક બની શકે છે.

આ પણ વાંચો - Poojaa Precision IPO Listing: 301 રૂપિયાનો શેર 470 પર લિસ્ટ, રોકાણકારોને પહેલા જ દિવસે 62%નો બમ્પર નફો!

ડિસ્ક્લેમર: આ માહિતી માત્ર જાણકારીના હેતુથી આપવામાં આવી છે. અહીં જણાવવું જરૂરી છે કે શેરબજારમાં રોકાણ એ બજારના જોખમોને આધીન છે. રોકાણકારોએ કોઈપણ જગ્યાએ નાણાં રોકતા પહેલા હંમેશા નિષ્ણાતની સલાહ લેવી જોઈએ. મનીકંટ્રોલ દ્વારા ક્યારેય પણ કોઈને રોકાણ કરવાની સલાહ આપવામાં આવતી નથી.