Stock Market News: CEO ગયા મેડિકલ લીવ પર ને આ કંપનીનો શેર 4% તૂટ્યો! શું તમારા પોર્ટફોલિયોમાં છે?

Manappuram Finance Share Price: શેરબજારમાં સમાચારનો પ્રભાવ કેટલો ઝડપી હોય છે તેનું તાજું ઉદાહરણ આજે જોવા મળ્યું છે. ગોલ્ડ લોન (Gold Loan) ક્ષેત્રની દિગ્ગજ કંપની મણપ્પુરમ્ ફાઇનાન્સ (Manappuram Finance)ના શેરમાં આજે શરૂઆતી કારોબારમાં જ મોટો કડાકો બોલી ગયો હતો. આ ઘટાડા પાછળનું મુખ્ય કારણ કંપનીના મેનેજમેન્ટમાં આવેલો અચાનક બદલાવ છે. જો તમારા પોર્ટફોલિયોમાં આ શેર છે, તો તમારે આ સમાચાર ખાસ વાંચવા જોઈએ.

કેમ તૂટ્યો મણપ્પુરમ્ ફાઇનાન્સનો શેર?

આજે બજાર ખુલતાની સાથે જ મણપ્પુરમ્ ફાઇનાન્સના શેરમાં વેચવાલીનું જોરદાર દબાણ જોવા મળ્યું હતું. કંપનીએ શેરબજારને માહિતી આપી હતી કે તેમના CEO (ચીફ એક્ઝિક્યુટિવ ઓફિસર) દીપક રેડ્ડી મેડિકલ લીવ પર જઈ રહ્યા છે. આ સમાચારની સીધી અસર શેરના ભાવ પર પડી અને શેર લગભગ 4% જેટલો ગગડી ગયો.

જોકે, નીચલા લેવલ પર થોડી ખરીદી આવતા ઘટાડો થોડો કવર થયો હતો, પરંતુ શેર હજુ પણ દબાણમાં છે. હાલમાં BSE પર આ શેર 0.66%ના ઘટાડા સાથે 294.60ના ભાવ પર ટ્રેડ કરી રહ્યો છે. આજના દિવસ દરમિયાન શેર તૂટીને 285.40 સુધી નીચે ચાલ્યો ગયો હતો.

કંપની દ્વારા એક્સચેન્જ ફાઈલિંગમાં આપવામાં આવેલી માહિતી મુજબ, CEO અને મેનેજમેન્ટના મુખ્ય વ્યક્તિ દીપક રેડ્ડી પોતાની સારવાર માટે વિદેશ જઈ રહ્યા છે. સારવારના હેતુસર તેમણે 25 ફેબ્રુઆરી 2026થી રજા લીધી છે. તેમની તબિયત અને સારવારને ધ્યાનમાં રાખતા તેઓ અંદાજે 90થી 120 દિવસ સુધી રજા પર રહી શકે છે. આ સમાચાર રોકાણકારો માટે ચિંતાનો વિષય બન્યા હતા.

RBI તરફથી મળ્યા સારા સમાચાર: બેન કેપિટલ ડીલને મંજૂરી

એક તરફ CEOની રજાના સમાચાર છે, તો બીજી તરફ કંપની માટે એક પોઝિટિવ ન્યુઝ પણ છે. રિઝર્વ બેંક ઓફ ઈન્ડિયા (RBI) એ મણપ્પુરમ્ ફાઇનાન્સમાં ‘બેન કેપિટલ' (Bain Capital) ના પ્રસ્તાવિત રોકાણને લીલી ઝંડી આપી દીધી છે.

RBIએ બેન કેપિટલને કંપનીમાં 41.66% સુધીનો હિસ્સો ખરીદવા અને જોઈન્ટ કંટ્રોલ માટે ફાઈનલ મંજૂરી આપી દીધી છે. આ ડીલ પૂરી થયા બાદ બેન કેપિટલને કંપનીના ‘પ્રમોટર' ગ્રુપમાં સામેલ કરવામાં આવશે.

શું છે ડીલની વિગતો?

માર્ચ 2025માં થયેલા કરાર મુજબ, બેન કેપિટલ પ્રેફરન્શિયલ એલોટમેન્ટ દ્વારા 236 પ્રતિ શેરના ભાવે લગભગ 4,385 કરોડનું રોકાણ કરીને 18% હિસ્સો ખરીદશે. આ રોકાણ તેમની સહયોગી કંપનીઓ BC Asia Investment XXV અને BC Asia Investments XIV મારફતે કરવામાં આવશે.

આ ઉપરાંત, પબ્લિક ઇન્વેસ્ટર્સ પાસેથી પણ 236 ના ભાવે વધારાનો 26% હિસ્સો ખરીદવા માટે ઓપન ઓફર લાવવામાં આવશે. આ રોકાણ બાદ મણપ્પુરમ્ ફાઇનાન્સમાં બેન કેપિટલનો હિસ્સો 18.0% થી 41.7% ની વચ્ચે રહી શકે છે, જ્યારે હાલના પ્રમોટર્સનો હિસ્સો ઘટીને 28.9% જેટલો રહી શકે છે.

એક વર્ષમાં શેરનું પ્રદર્શન

મણપ્પુરમ્ ફાઇનાન્સના શેરના પ્રદર્શન પર નજર કરીએ તો, ગત વર્ષે 3 માર્ચ 2025 ના રોજ શેરનો ભાવ 194.70 હતો, જે તેનો 52-વીક લો (સૌથી નીચલો સ્તર) હતો. ત્યાંથી સુધારો બતાવતા માત્ર 10 મહિનામાં શેરે 64.84% નું રિટર્ન આપ્યું હતું અને 7 જાન્યુઆરી 2025 ના રોજ 320.95 નો રેકોર્ડ હાઈ બનાવ્યો હતો.

આ પણ વાંચો- Ola Electric Share: ઓલ-ટાઈમ હાઈથી 84% તૂટ્યો શેર, હવે એક પણ ‘Buy' રેટિંગ નહીં - રોકાણકારો ચિંતામાં

ડિસ્ક્લેમર: અહીં આપેલી માહિતી સ્ટોક પર્ફોમન્સ પર આધારિત છે. એ નોંધવું અગત્યનું છે કે બજારમાં રોકાણ બજારના જોખમોને આધીન છે. રોકાણકાર તરીકે, પૈસાનું રોકાણ કરતા પહેલા હંમેશા નિષ્ણાતની સલાહ લો. મનીકંટ્રોલ ક્યારેય કોઈને અહીં પૈસા રોકવાની સલાહ આપતું નથી.