મોંઘવારી અને પેટ્રોલ-ડીઝલના ઊંચા ભાવથી ટૂંક સમયમાં મળશે રાહત! ક્રૂડ ઓઈલ ગગડીને 70 ડોલર પર આવવાનો Citiનો અંદાજ

Crude Oil Price Drop: મોંઘા પેટ્રોલ-ડીઝલ અને સતત વધી રહેલી મોંઘવારીનો માર સહન કરી રહેલા સામાન્ય લોકોને ટૂંક સમયમાં જ મોટી રાહત મળી શકે છે. ગ્લોબલ ફાઇનાન્શિયલ ફર્મ 'સિટી'એ અંદાજ લગાવ્યો છે કે આગામી સમયમાં કાચા તેલના ભાવમાં મોટો ઘટાડો આવશે અને તે ગગડીને 70 ડોલર પ્રતિ બેરલ સુધી નીચે આવી શકે છે. રિપોર્ટમાં જણાવવામાં આવ્યું છે કે ક્રૂડના ભાવ નરમ પડવાથી ભારતીય રૂપિયાને પણ મોટો સપોર્ટ મળશે. ઉલ્લેખનીય છે કે, આ વર્ષે ફેબ્રુઆરીના અંતમાં અમેરિકા અને ઈરાન વચ્ચે યુદ્ધ શરૂ થયા બાદ ક્રૂડ ઓઈલના ભાવ આસમાને પહોંચી ગયા હતા અને છેલ્લા ઘણા અઠવાડિયાથી બ્રેન્ટ ક્રૂડ 100 ડોલર પ્રતિ બેરલની ઉપર ટ્રેડ કરી રહ્યું છે.

મિડલ ઈસ્ટનું સંકટ ખતમ થતાં ઘટશે ટ્રાન્સપોર્ટ અને વીમાનો ખર્ચ

Citi India ના ચીફ ઇકોનોમિસ્ટ સમીરન ચક્રવર્તીએ જણાવ્યું હતું કે, પશ્ચિમ એશિયામાં ચાલી રહેલું યુદ્ધનું સંકટ આ વર્ષના અંત સુધીમાં અથવા આવતા વર્ષની શરૂઆતમાં સમાપ્ત થઈ જવાની પૂરેપૂરી આશા છે.

આ સંકટ પૂરું થતાંની સાથે જ 'સ્ટ્રેટ ઓફ હોર્મુઝ'ના રસ્તેથી માલવાહક જહાજોની અવરજવર ફરીથી સામાન્ય થઈ જશે. દરિયાઈ માર્ગ ખુલવાથી ફ્રેટ કોસ્ટ અને ઇન્શ્યોરન્સ કોસ્ટમાં મોટો ઘટાડો આવશે. હાલમાં ક્રૂડ ઓઈલના ભાવ આટલા ઊંચા રહેવા પાછળ આ બંને ખર્ચાઓનો પણ મોટો હાથ છે.

ક્રૂડ ઓઈલ સસ્તું થવાથી ભારતના અર્થતંત્રને થનારા ફાયદા અંગે નિષ્ણાતોએ નીચે મુજબના મંતવ્યો આપ્યા છે.

બેલેન્સ ઓફ પેમેન્ટમાં રાહત: સમીરન ચક્રવર્તીના મતે, ક્રૂડ ઓઈલના ભાવ ઘટવાથી ભારતના 'બેલેન્સ ઓફ પેમેન્ટ' પરનું દબાણ ઓછું થશે. જોકે, બાહ્ય ખાતા પર થોડું દબાણ ચાલુ રહી શકે છે અને ચાલુ નાણાકીય વર્ષના બીજા છ માસિક ગાળામાં બેલેન્સ ઓફ પેમેન્ટની ખાધ અંદાજે 12 અબજ ડોલર રહી શકે છે.

વિદેશી રોકાણમાં વધારો: આ નાણાકીય વર્ષમાં ગ્રોસ FDI 20 ટકાથી વધુ વધ્યું છે અને ઓક્ટોબરના મધ્ય ભાગથી પોર્ટફોલિયો ઇનફ્લોમાં પણ સુધારો થયો છે, જે ભારતીય બજાર માટે સારા સંકેત છે.

રૂપિયામાં રિકવરીની આશા: સ્ટેટ બેંક ઓફ ઈન્ડિયાના ગ્રુપ ચીફ ઇકોનોમિક એડવાઇઝર સૌમ્ય કાંતિ ઘોષે પણ આગામી સમયમાં રૂપિયામાં મજબૂતી આવવાની આશા વ્યક્ત કરી છે. તેમણે કહ્યું કે આગળ જતાં ડોલર નબળો પડી શકે છે અને ક્રૂડ સસ્તું થવાથી રૂપિયા પર તેની પોઝિટિવ અસર જોવા મળશે.

નોંધનીય છે કે, માર્ચ મહિનાથી ક્રૂડના ભાવમાં સતત તેજી રહેવાને કારણે ભારતનું ઈમ્પોર્ટ બિલ ખૂબ જ વધી ગયું હતું. જેના લીધે ડોલર સામે રૂપિયો ગગડીને અત્યાર સુધીના સૌથી નીચલા સ્તરે પહોંચી ગયો હતો. જોકે, ત્યારબાદ RBI દ્વારા લેવામાં આવેલા પગલાંને કારણે છેલ્લા કેટલાક અઠવાડિયામાં રૂપિયામાં સારી રિકવરી જોવા મળી છે.

118 ડોલરથી નીચે આવીને 106 ડોલર પર પહોંચ્યું બ્રેન્ટ ક્રૂડ

આંતરરાષ્ટ્રીય બજારમાં 3 નવેમ્બરના રોજ બ્રેન્ટ ક્રૂડનો ભાવ 1.6 ટકાના સુધારા સાથે 106 ડોલર પ્રતિ બેરલ પર ચાલી રહ્યો હતો, જ્યારે WTI ક્રૂડ 98 ડોલર પ્રતિ બેરલના સ્તરે હતું. ગયા અઠવાડિયે જ બ્રેન્ટ ક્રૂડનો ભાવ 118 ડોલર પ્રતિ બેરલના ભયાનક સ્તરે પહોંચી ગયો હતો, જેનાથી આખી દુનિયામાં મોંઘવારી વધી રહી છે. જોકે, હવે અમેરિકા અને ઈરાન વચ્ચે સમાધાન થવાની આશા તેમજ અમેરિકી રાષ્ટ્રપતિ ડોનાલ્ડ ટ્રમ્પે ઈરાન પર નવા હુમલા કરવાનો ઈન્કાર કર્યા બાદ ક્રૂડ ઓઈલના ભાવમાં નરમાઈ શરૂ થઈ છે.

આ પણ વાંચો-બાઇટડાન્સના ઝાંગ યિમિંગને પછાડી મુકેશ અંબાણી ફરી બન્યા એશિયાના સૌથી ધનિક વ્યક્તિ, નેટવર્થ વધીને $88.8 અબજ પર પહોંચી