Gold Price in Dubai: દુબઈમાં પણ સોનું સસ્તું નથી રહ્યું! 2025માં ભાવ આસમાને પહોંચ્યા, તોડ્યા તમામ રેકોર્ડ

Gold Price in Dubai: જો તમે એમ વિચારતા હોવ કે દુબઈમાં સોનું સસ્તું મળે છે, તો આ સમાચાર તમારા માટે ચોંકાવનારા છે. વર્ષ 2025 સોના માટે ઐતિહાસિક સાબિત થયું છે. દુનિયાભરની સાથે સાથે દુબઈમાં પણ સોનાના ભાવમાં આગ લાગી છે. હાલની સ્થિતિ એવી છે કે દુબઈમાં સોનું ખરીદવું હવે સસ્તું નથી રહ્યું. વર્ષ 2025માં સોનાની કિંમતોમાં જે ઉછાળો આવ્યો છે, તેણે ભૂતકાળના તમામ રેકોર્ડ તોડી નાખ્યા છે. માત્ર ભારત જ નહીં, પરંતુ 'સિટી ઓફ ગોલ્ડ' ગણાતા દુબઈમાં પણ સોનાના ભાવ આસમાને પહોંચી ગયા છે.

દુબઈમાં સોનાના ભાવમાં ઐતિહાસિક તેજી

બજારના આંકડા પર નજર કરીએ તો, વર્ષ 2025ની શરૂઆતમાં સોનાના ભાવ થોડા ધીમા હતા, પરંતુ ત્યારબાદ તેમાં એકાએક જબરદસ્ત તેજી જોવા મળી.

24 કેરેટ સોનું: 1 જાન્યુઆરી 2025ના રોજ દુબઈમાં 24 કેરેટ સોનાનો ભાવ પ્રતિ ગ્રામ 318 દિરહામ (આશરે 8800 રૂપિયા) હતો. વર્ષના અંતે એટલે કે 31 ડિસેમ્બર 2025 સુધીમાં આ ભાવ વધીને 520 દિરહામ (આશરે 12750 રૂપિયા) પ્રતિ ગ્રામ થઈ ગયો. આમ, એક વર્ષમાં ભાવમાં 63.52% નો વધારો થયો છે. ભારતીય રૂપિયામાં ગણતરી કરીએ તો દુબઈમાં 10 ગ્રામ સોનાનો ભાવ 1.27 લાખ રૂપિયા સુધી પહોંચી ગયો છે.

14 કેરેટ સોનામાં શું ફેરફાર થયો?

એક રસપ્રદ વાત એ છે કે 24, 22 અને 21 કેરેટની સરખામણીમાં 14 કેરેટ સોનામાં બહુ મોટો વધારો નથી થયો. 14 કેરેટ સોનું UAE માં 29 નવેમ્બરે લોન્ચ થયું હતું. વર્ષ 2025માં તેમાં માત્ર 2.3% નો નજીવો વધારો થયો છે. આ સોનું વજનમાં હળવું હોવાથી સામાન્ય લોકો તેને રોજિંદા ઉપયોગ માટે સરળતાથી ખરીદી શકે છે.

સોનું આટલું મોંઘું કેમ થયું?

વર્ષ 2025માં સોનાના ભાવ વધવા પાછળ કોઈ એક નહીં પણ અનેક આર્થિક કારણો જવાબદાર છે:

વૈશ્વિક તણાવ: દુનિયાભરમાં ચાલી રહેલા યુદ્ધો અને રાજકીય અસ્થિરતાને કારણે રોકાણકારો ગભરાયેલા છે. મુશ્કેલ સમયમાં સોનું સૌથી સુરક્ષિત રોકાણ મનાય છે, તેથી લોકો અને મધ્યસ્થ બેંકો  સોનું ખરીદવા લાગ્યા.

અમેરિકન બેંકનો નિર્ણય: અમેરિકાની ફેડરલ રિઝર્વ બેંકે વ્યાજદરમાં ઘટાડો કર્યો છે. જ્યારે વ્યાજદર ઘટે છે, ત્યારે બોન્ડ જેવા સાધનો કરતા સોનામાં રોકાણ કરવું વધુ ફાયદાકારક લાગે છે, જેનાથી ભાવ વધ્યા છે.

આ તેજી 1970ના દાયકા પછીની સૌથી મોટી તેજી માનવામાં આવે છે, જેમાં વૈશ્વિક સ્તરે ભાવ લગભગ 70% જેટલા વધ્યા છે.

ભારતમાં સોનાનો ભાવ ક્યાં પહોંચ્યો?

ભારતમાં પણ સોનાના ભાવે ગ્રાહકોને રડાવ્યા છે. વર્ષ 2025માં ભારતીય બજારમાં સોનાના ભાવમાં 70 થી 80% નો વધારો થયો છે. વર્ષની શરૂઆતમાં જે 24 કેરેટ સોનું 78,000 થી 80,000 રૂપિયા (પ્રતિ 10 ગ્રામ) મળતું હતું, તે ડિસેમ્બર 2025 સુધીમાં 1.40 લાખ રૂપિયા ને પાર કરી ગયું. ભારતમાં રૂપિયાનું ધોવાણ, ગોલ્ડ ETFમાં રોકાણ અને લગ્નસરાની ખરીદીને કારણે ભાવમાં આટલો મોટો ઉછાળો જોવા મળ્યો છે.

સોનાની આ રેકોર્ડબ્રેક તેજીએ સાબિત કર્યું છે કે હવે સોનું માત્ર ઘરેણું નથી રહ્યું, પણ એક મજબૂત આર્થિક સાધન બની ગયું છે. જોકે, દુબઈથી સસ્તું સોનું લાવવાનું વિચારતા લોકો માટે હવે ગણતરી બદલાઈ ગઈ છે.

આ પણ વાંચો- Middle East Conflict: સાઉદી અરેબિયા અને UAE વચ્ચે યમન માટે જંગ, ભારત માટે કેમ વધી મુશ્કેલી? જાણો અંદરની વાત