તહેવારો ટાણે સામાન્ય જનતાને મોંઘવારીનો ડામ: કોમર્શિયલ LPG સિલિન્ડર 62.50 રૂપિયા મોંઘો, હોટેલ-રેસ્ટોરન્ટમાં જમવાનું થશે મોંઘું

ઓક્ટોબર મહિનાની શરૂઆત સામાન્ય માણસ અને વેપારીઓ માટે માઠા સમાચાર લઈને આવી છે. ઓઈલ માર્કેટિંગ કંપનીઓએ 1 ઓક્ટોબર 2026ના રોજ સવારે એલપીજી સિલિન્ડરના નવા ભાવ જાહેર કર્યા છે. આગામી નવરાત્રી અને દિવાળીના તહેવારો પહેલા જ 19 કિલોના કોમર્શિયલ ગેસ સિલિન્ડરની કિંમતમાં 62.50 રૂપિયાનો મોટો વધારો ઝીંકી દેવામાં આવ્યો છે.

વેપારીઓ પર બોજો, બહાર ખાવાનું થશે મોંઘું

કોમર્શિયલ ગેસ સિલિન્ડરના ભાવમાં સતત બીજા મહિને વધારો નોંધાયો છે. આ અગાઉ સપ્ટેમ્બર મહિનાની શરૂઆતમાં પણ ભાવમાં 9.50 રૂપિયાનો વધારો કરવામાં આવ્યો હતો. આ સતત ભાવવધારાથી હોટેલ, રેસ્ટોરન્ટ, ઢાબા અને કેટરિંગના વ્યવસાય સાથે જોડાયેલા વેપારીઓની મુશ્કેલી વધી છે. ગેસ મોંઘો થવાથી તેમનો ઉત્પાદન ખર્ચ વધશે, જેની સીધી અસર ગ્રાહકોના ખિસ્સા પર પડશે અને હવે બહાર જમવાનું વધુ મોંઘું બની શકે છે.

નવા ભાવ: ક્યાં કેટલો મોંઘો થયો ગેસ?

રાજધાની દિલ્હીમાં કોમર્શિયલ સિલિન્ડર 62.50 રૂપિયા મોંઘો થઈને હવે 2810 રૂપિયાના સ્તરે પહોંચી ગયો છે. બિહારની રાજધાની પટનામાં દેશનો સૌથી મોંઘો કોમર્શિયલ સિલિન્ડર મળી રહ્યો છે. અહીં ભાવ 3029 રૂપિયાથી સીધો ઉછળીને 3100.50 રૂપિયા થઈ ગયો છે.

ગૃહિણીઓને કોઈ જ રાહત નહીં

એક તરફ કોમર્શિયલ સિલિન્ડરના ભાવ ભડકે બળી રહ્યા છે, તો બીજી તરફ ઘરગથ્થુ રાંધણગેસ વાપરતી ગૃહિણીઓ માટે કોઈ જ રાહતના સમાચાર નથી. કંપનીઓએ 14.2 કિલોના ઘરેલુ સિલિન્ડરના ભાવમાં કોઈ જ ફેરફાર કે ઘટાડો કર્યો નથી.

હાલમાં દેશના મહાનગરોમાં 14.2 કિલોના સિલિન્ડર જૂના ભાવે જ મળી રહ્યા છે.

દિલ્હી: 942 રૂપિયા

મુંબઈ: 941.50 રૂપિયા

ચેન્નાઈ: 957.50 રૂપિયા

કોલકાતા: 968 રૂપિયા

આ પણ વાંચો-સતત ત્રીજા મહિને GST કલેક્શન 2 લાખ કરોડને પાર, જાણો સપ્ટેમ્બરના લેટેસ્ટ આંકડા અને રિફંડનું ગણિત