સતત ત્રીજા મહિને GST કલેક્શન 2 લાખ કરોડને પાર, જાણો સપ્ટેમ્બરના લેટેસ્ટ આંકડા અને રિફંડનું ગણિત

GST Collection in September: ભારતીય અર્થવ્યવસ્થા માટે એક ખૂબ જ સારા અને ઉત્સાહજનક સમાચાર છે. સરકારે 1 ઓક્ટોબરના રોજ જાહેર કરેલા આંકડા મુજબ, સપ્ટેમ્બર મહિનામાં દેશનું GST કલેક્શન સતત ત્રીજા મહિને 2 લાખ કરોડ રૂપિયાના આંકડાને પાર કરી ગયું છે. ખાસ વાત એ છે કે આ વખતે આયાત દ્વારા થતા GST કલેક્શનની ગતિ ઘણી ઝડપી રહી છે, જ્યારે સામે પક્ષે ટેક્સ રિફંડમાં ઘટાડો નોંધાયો છે.

સપ્ટેમ્બરનું GST ગણિત અને આંકડા

સરકારના ડેટા પ્રમાણે, સપ્ટેમ્બરમાં ગ્રોસ GST કલેક્શન વાર્ષિક ધોરણે 14.7% ના વધારા સાથે 2.04 લાખ કરોડ રૂપિયા પર પહોંચી ગયું છે. આ અગાઉ ઓગસ્ટમાં 14.3% અને જુલાઈમાં 15.4% નો ઉછાળો જોવા મળ્યો હતો.

સપ્ટેમ્બરમાં સ્થાનિક વ્યવહારોમાંથી ગ્રોસ GST આવક 10.1% વધીને 1.38 લાખ કરોડ રૂપિયા થઈ છે. જ્યારે આયાતમાંથી મળતો GST 25.9% ના મોટા ઉછાળા સાથે 65,525 કરોડ રૂપિયા પર પહોંચી ગયો છે. નાણાકીય વર્ષ 2027 ના પ્રથમ છ મહિનામાં કુલ ગ્રોસ GST કલેક્શન 11.6% વધીને 12.46 લાખ કરોડ રૂપિયા થઈ ગયું છે. ઉલ્લેખનીય છે કે ગત નાણાકીય વર્ષ 2026 ના આ જ સમયગાળામાં આ આંકડો 11.17 લાખ કરોડ રૂપિયા હતો. આ જ સમયમાં નેટ GST આવક પણ 10.4% વધીને 10.66 લાખ કરોડ રૂપિયા થઈ છે.

તમને જણાવી દઈએ કે સપ્ટેમ્બરમાં નેટ GST કલેક્શનનો ગ્રોથ ગ્રોસ રેવેન્યુ કરતા પણ વધુ રહ્યો છે. તે વાર્ષિક ધોરણે 18.1% વધીને 1.76 લાખ કરોડ રૂપિયા નોંધાયો છે. આટલા મોટા ઉછાળા પાછળનું મુખ્ય કારણ GST રિફંડમાં થયેલો ઘટાડો છે. સપ્ટેમ્બરમાં GST રિફંડ 3% ઘટીને 27,001 કરોડ રૂપિયા રહ્યું છે. જેમાં સ્થાનિક રિફંડમાં પણ 13.5% નો મોટો ઘટાડો જોવા મળ્યો છે.

રાજ્યોની સ્થિતિ: ગુજરાત આગળ, તમિલનાડુ પાછળ

રાજ્યો પ્રમાણે જોઈએ તો GST કલેક્શનમાં મોટો તફાવત જોવા મળ્યો છે. મહારાષ્ટ્ર, કર્ણાટક, ગુજરાત અને તેલંગાણામાં GST કલેક્શનમાં લગભગ 15-18% ની આસપાસ મજબૂત ગ્રોથ જોવા મળ્યો છે. બીજી તરફ, તમિલનાડુના કલેક્શનમાં સપ્ટેમ્બર મહિના દરમિયાન ઘટાડો નોંધાયો છે.

એક્સપર્ટ શું કહે છે?

ગ્રાન્ટ થોર્ન્ટન ભારતના પાર્ટનર અને ટેક્સ મેનેજમેન્ટ લીડર મનોજ મિશ્રાના મતે, "હાલમાં જ્યારે દુનિયાભરમાં ઊર્જાના ભાવો ઊંચા છે, જિયો-પોલિટિકલ ટેન્શન છે અને માલસામાનના ટ્રાન્સપોર્ટેશનનો ખર્ચ વધ્યો છે, ત્યારે આયાતમાંથી મળતા GST કલેક્શનની મજબૂતી ખૂબ જ મહત્ત્વની છે." જોકે, તેમણે એમ પણ સ્પષ્ટ કર્યું કે આયાત GST માં આવેલા ઉછાળાને સીધી રીતે સ્થાનિક બજારમાં માંગ કે વપરાશમાં વધારાનો સંકેત માની લેવો જોઈએ નહીં.

આ પણ વાંચો-Smit Machchhar: 'એક ભારતીયે 9/11 થતાં બચાવી લીધું...'પીએમ મોદીએ કેપ્ટન સ્મિત મચ્છારની બહાદુરીને કરી સલામ