Smit Machchhar: 'એક ભારતીયે 9/11 થતાં બચાવી લીધું...'પીએમ મોદીએ કેપ્ટન સ્મિત મચ્છારની બહાદુરીને કરી સલામ | Moneycontrol Gujarati
Get App

Smit Machchhar: 'એક ભારતીયે 9/11 થતાં બચાવી લીધું...'પીએમ મોદીએ કેપ્ટન સ્મિત મચ્છારની બહાદુરીને કરી સલામ

ભારતીય પાયલટ કેપ્ટન સ્મિત મચ્છારે પોતાના જીવના જોખમે ફ્લાયદુબઈ પ્લેનને ક્રેશ થતાં બચાવ્યું. પીએમ મોદી અને ઇઝરાયેલના પીએમ નેતન્યાહુએ તેમની બહાદુરીના વખાણ કર્યા. જાણો હવામાં બનેલી આખી ઘટના.

અપડેટેડ 12:55:56 PM Oct 01, 2026 પર
Story continues below Advertisement
પીએમ મોદીએ દિલ્હીના 'ભારત મંડપમ' ખાતે આયોજિત UPSCના શતાબ્દી સમારોહમાં પણ આ ઘટનાનો ખાસ ઉલ્લેખ કર્યો હતો.

Smit Machchhar: ભારતીય પાયલટ કેપ્ટન સ્મિત મચ્છારે પોતાની અદમ્ય હિંમત અને સૂઝબૂઝથી હજારો ફૂટની ઊંચાઈ પર એક મોટી દુર્ઘટના ટાળી છે. ફ્લાયદુબઈ વિમાનને જાણીજોઈને ક્રેશ કરવાના સહ-પાયલટના પ્રયાસને નિષ્ફળ બનાવીને તેમણે 174 લોકોના જીવ બચાવ્યા છે. વડાપ્રધાન નરેન્દ્ર મોદીએ તેમની આ બહાદુરીની ખુલ્લા દિલે પ્રશંસા કરતા કહ્યું છે કે, "એક હિન્દુસ્તાનીએ દુનિયાને ફરી એકવાર 9/11 જેવી ગોઝારી ઘટના થતાં બચાવી લીધી છે."

હવામાં 34,000 ફૂટની ઊંચાઈએ શું બન્યું હતું?

બુધવારે દુબઈથી તેલ અવીવ જઈ રહેલી ફ્લાયદુબઈની ફ્લાઇટ FZ1073 માં આ ભયાનક ઘટના બની હતી. વિમાનમાં 27 બાળકો સહિત કુલ 174 મુસાફરો સવાર હતા. અચાનક જ વિમાન 34,000 ફૂટની ઊંચાઈએથી ઝડપથી 17,000 ફૂટ નીચે આવી ગયું.

મળતી માહિતી મુજબ, સહ-પાયલટે વિમાનની સિસ્ટમને નુકસાન પહોંચાડવાનો પ્રયાસ કર્યો હતો અને કેપ્ટન સ્મિત મચ્છાર પર છરી વડે જીવલેણ હુમલો કર્યો હતો. ગંભીર રીતે ઘાયલ હોવા છતાં અને લોહીલુહાણ હાલતમાં પણ સ્મિત મચ્છારે વળતો પ્રહાર કર્યો. તેમણે હિંમત દાખવીને કોકપિટનો દરવાજો ખોલી નાખ્યો, જેથી ક્રૂ મેમ્બર્સ અને મુસાફરો અંદર આવી શકે અને હુમલાખોર સહ-પાયલટને કાબૂમાં લઈ શકે. ત્યારબાદ વિમાનને સુરક્ષિત રીતે સાઉદી અરેબિયાના તબુક શહેર સ્થિત પ્રિન્સ સુલતાન બિન અબ્દેલ અઝીઝ એરપોર્ટ તરફ ડાયવર્ટ કરવામાં આવ્યું હતું.

પીએમ મોદીએ પરિવાર સાથે કરી વાતચીત


વડાપ્રધાન મોદીએ ગુરુવારે કેપ્ટન સ્મિત મચ્છારની પત્ની અને માતા-પિતા સાથે ફોન પર વાતચીત કરી હતી. તેમણે પરિવારને સાંત્વના આપતા કહ્યું કે સાઉદી અરેબિયામાં ભારતીય દૂતાવાસ ઘાયલ પાયલટને તમામ શક્ય તબીબી મદદ પૂરી પાડી રહ્યું છે.

પીએમ મોદીએ દિલ્હીના 'ભારત મંડપમ' ખાતે આયોજિત UPSCના શતાબ્દી સમારોહમાં પણ આ ઘટનાનો ખાસ ઉલ્લેખ કર્યો હતો. તેમણે કહ્યું, "કેપ્ટન સ્મિત મચ્છારે ધૈર્ય અને સાહસનો અદભુત પરિચય આપ્યો છે. ઇઝરાયેલના વડાપ્રધાને પણ કહ્યું છે કે ભારતે 9/11 થતાં બચાવી લીધું છે. આજે આખી દુનિયાને આ ભારતીય હીરો પર ગર્વ છે." સોશિયલ મીડિયા પ્લેટફોર્મ 'X' પર પણ પીએમ મોદીએ તેમના જલ્દી સ્વસ્થ થવાની કામના કરી હતી.

ઇઝરાયેલના પીએમ નેતન્યાહુએ પણ કર્યા વખાણ

ઇઝરાયેલના વડાપ્રધાન બેન્જામિન નેતન્યાહુએ પણ ભારતીય પાયલટને સાચા અર્થમાં 'હીરો' ગણાવ્યા છે. તેમણે કહ્યું, "છરી વાગી હોવા છતાં કેપ્ટન મચ્છારે હુમલાખોરનો સામનો કર્યો. તેમની સમયસૂચકતાના કારણે ઇઝરાયેલ અને અન્ય દેશોના 174 નાગરિકોના જીવ બચી ગયા અને હવામાં એક મોટી દુર્ઘટના ટળી ગઈ. હું તેમની આ અસાધારણ બહાદુરીને સલામ કરું છું."

આ પણ વાંચો-ભારતીય પાયલટની શૌર્યગાથા: ચાકુ વાગવા છતાં સ્મિત મચ્છારે કોકપિટનો દરવાજો ખોલ્યો અને 174 લોકોના જીવ બચાવ્યા!

MoneyControl News

MoneyControl News

First Published: Oct 01, 2026 12:55 PM

પહેલા મનીકંટ્રોલ ગુજરાતી પર ગુજરાતીમાં સ્ટોક માર્કેટ,  Stock Tips,  સમાચાર, પર્સનલ ફાઇનાન્સ  અને બિઝનેસ  સંબંધિત સમાચાર વાંચો. દૈનિક બજાર અપડેટ્સ માટે Moneycontrol App  ડાઉનલોડ કરો.