વિદેશ ફરવા જતા ભારતીયોને મોટો ઝટકો! 1 જાન્યુઆરી 2027થી મલેશિયામાં ‘વિઝા-ફ્રી એન્ટ્રી' થશે બંધ, જાણો શું છે નવા નિયમો | Moneycontrol Gujarati
Get App

વિદેશ ફરવા જતા ભારતીયોને મોટો ઝટકો! 1 જાન્યુઆરી 2027થી મલેશિયામાં ‘વિઝા-ફ્રી એન્ટ્રી' થશે બંધ, જાણો શું છે નવા નિયમો

Malaysia Visa Free Entry Ends: મલેશિયા ફરવા જવાનો પ્લાન કરતા ભારતીયો માટે મોટા સમાચાર. 1 જાન્યુઆરી 2027 થી મલેશિયાએ વિઝા-ફ્રી એન્ટ્રી બંધ કરવાનો નિર્ણય લીધો છે. જાણો MyVISA ના નવા નિયમો.

અપડેટેડ 04:56:44 PM Nov 20, 2026 પર
Story continues below Advertisement
કેટલાક લોકો દ્વારા કરવામાં આવેલા નિયમોના દુરુપયોગનું પરિણામ હવે સાચા ભારતીય પ્રવાસીઓએ ભોગવવું પડશે.

Malaysia Visa Free Entry Ends: વિદેશ ફરવા જવાના શોખીન ભારતીય પ્રવાસીઓ માટે એક ખૂબ જ મહત્વના અને ચિંતાજનક સમાચાર સામે આવ્યા છે. મલેશિયા સરકારે ભારતીય પાસપોર્ટ ધારકો માટે આપવામાં આવતી 'વિઝા-ફ્રી એન્ટ્રી' (વિઝા વગર પ્રવેશ) ની સુવિધા બંધ કરવાનો મોટો નિર્ણય લીધો છે. 1 જાન્યુઆરી 2027 થી આ નવો નિયમ લાગુ થઈ જશે. એટલે કે, હવે મલેશિયા ભારતીયો માટે વિઝા-ફ્રી ડેસ્ટિનેશન નહીં રહે અને ત્યાં જવા માટે અગાઉથી માન્ય વિઝા લેવા ફરજિયાત બનશે.

મલેશિયાના ઈમિગ્રેશન વિભાગ દ્વારા 17 નવેમ્બરના રોજ એક સત્તાવાર નોટિસ બહાર પાડીને આ જાહેરાત કરવામાં આવી છે. તેમાં સ્પષ્ટ કરવામાં આવ્યું છે કે ભારતીય નાગરિકોને મળતી હાલની વિઝા મુક્તિ વર્ષ 2026 ના અંત સાથે જ સમાપ્ત થઈ જશે.

1 ડિસેમ્બર 2026 થી ‘MyVISA' પોર્ટલ પર અરજી કરી શકાશે


નવા નિયમો મુજબ, જે ભારતીય પ્રવાસીઓ 1 જાન્યુઆરી 2027 કે ત્યારબાદ મલેશિયા જવાનું પ્લાનિંગ કરી રહ્યા છે, તેમણે મુસાફરી પહેલાં વિઝા મેળવવા પડશે. પ્રવાસીઓની સુવિધા માટે નવો નિયમ લાગુ થવાના 1 મહિના પહેલાં જ એટલે કે 1 ડિસેમ્બર 2026 થી વિઝા અરજીની પ્રક્રિયા શરૂ કરી દેવામાં આવશે. ભારતીય નાગરિકો મલેશિયન સરકારના ઓનલાઈન પોર્ટલ 'MyVISA' દ્વારા પોતાની વિઝા અરજી સબમિટ કરી શકશે.

શા માટે મલેશિયાએ બંધ કરવી પડી વિઝા-ફ્રી એન્ટ્રી?

કોવિડ-19 મહામારી બાદ પોતાના દેશના પ્રવાસન ઉદ્યોગને ફરીથી બેઠો કરવા માટે મલેશિયાએ ડિસેમ્બર 2023 માં ભારતીયો માટે વિઝા-ફ્રી એન્ટ્રીની શરૂઆત કરી હતી. આ નિર્ણય બાદ મલેશિયા જતા ભારતીય પ્રવાસીઓની સંખ્યામાં જબરદસ્ત ઉછાળો આવ્યો હતો. પરંતુ, સપ્ટેમ્બર 2026 માં કુઆલાલંપુર ખાતે આવેલા ભારતીય હાઈ કમિશને આ સુવિધાના થઈ રહેલા ગેરકાયદેસર ઉપયોગ અંગે ગંભીર ચિંતા વ્યક્ત કરી હતી:

હાઈ કમિશને ચેતવણી આપી હતી કે મોટી સંખ્યામાં ભારતીયો ફરવાના બહાને (ટુરિસ્ટ વિઝાની છૂટ હેઠળ) મલેશિયામાં ઘૂસીને ત્યાં નોકરી શોધી રહ્યા છે. કેટલાક લેભાગુ એજન્ટો ભારતીય નાગરિકોને નકલી નોકરીઓની લાલચ આપીને ગેરમાર્ગે દોરી રહ્યા હતા. આના કારણે ભારતીયો પર નિર્ધારિત સમય કરતા વધુ રોકાણ, શોષણ, પોલીસ અટકાયત અને કડક કાયદાકીય કાર્યવાહી થવાનું જોખમ વધી ગયું હતું. આ દુરુપયોગ રોકવા માટે જ વિઝા-ફ્રી એન્ટ્રી બંધ કરવામાં આવી છે.

મલેશિયાના વિઝા નિયમોમાં થયા આ 2 મોટા ફેરફારો

ઈમિગ્રેશન વિભાગે વિઝા પ્રક્રિયાને લઈને બીજા પણ કેટલાક કડક નિયમો જાહેર કર્યા છે, જે દરેક અરજદારે ખાસ જાણવા જેવા છે:

7 દિવસમાં અરજી આપમેળે રદ થશે: નવા નિયમ પ્રમાણે, જો કોઈ વિઝા અરજી "New Application" (નવી અરજી) અથવા "Pending Payment" (પેમેન્ટ બાકી) ના તબક્કામાં કામકાજના 7 દિવસોથી વધુ સમય સુધી પડી રહેશે, તો સિસ્ટમ દ્વારા તે અરજી આપમેળે એક્સપાયર (રદ) કરી દેવામાં આવશે.

વિઝા ફી પાછી નહીં મળે: વિભાગે ચોખ્ખા શબ્દોમાં સ્પષ્ટતા કરી છે કે તમારી વિઝા અરજી પાસ થાય કે રિજેક્ટ (નામંજૂર) થાય, એકવાર ભરેલી વિઝા પ્રોસેસિંગ ફી કોઈપણ સંજોગોમાં પાછી મળશે નહીં. એટલું જ નહીં, જો સરકારની વિઝા પોલિસી બદલાય અથવા પ્રવાસી પોતે ફરવાનો પ્લાન કેન્સલ કરે કે બદલે, તો પણ ફીનું રિફંડ આપવામાં આવશે નહીં.

ટૂંકમાં કહીએ તો, કેટલાક લોકો દ્વારા કરવામાં આવેલા નિયમોના દુરુપયોગનું પરિણામ હવે સાચા ભારતીય પ્રવાસીઓએ ભોગવવું પડશે. જો તમે પણ વર્ષ 2027 માં મલેશિયા ફરવા જવાનો પ્લાન બનાવી રહ્યા હોવ, તો છેલ્લી ઘડીની દોડધામથી બચવા માટે 1 ડિસેમ્બર 2026 પછી 'MyVISA' પોર્ટલ પર સમયસર અરજી કરી દેવી હિતાવહ રહેશે.

આ પણ વાંચો- અમેરિકાની દિગ્ગજ બેંક જેપી મોર્ગન પર મોટો સાયબર એટેક! 84 કરોડથી વધુ સંપત્તિ ધરાવતા 16,000 શ્રીમંત ગ્રાહકોનો ડેટા લીક

MoneyControl News

MoneyControl News

First Published: Nov 20, 2026 4:56 PM

પહેલા મનીકંટ્રોલ ગુજરાતી પર ગુજરાતીમાં સ્ટોક માર્કેટ,  Stock Tips,  સમાચાર, પર્સનલ ફાઇનાન્સ  અને બિઝનેસ  સંબંધિત સમાચાર વાંચો. દૈનિક બજાર અપડેટ્સ માટે Moneycontrol App  ડાઉનલોડ કરો.