અમેરિકાની દિગ્ગજ બેંક જેપી મોર્ગન પર મોટો સાયબર એટેક! 84 કરોડથી વધુ સંપત્તિ ધરાવતા 16,000 શ્રીમંત ગ્રાહકોનો ડેટા લીક
JPMorgan Cyberattack: અમેરિકાની સૌથી મોટી બેંક જેપી મોર્ગન ચેઝ પર સાયબર હુમલો થયો છે, જેમાં 16,000 અમીર ગ્રાહકોનો ડેટા લીક થયો છે. 'નોન-પ્રોફિટ' નામના રેન્સમવેર ગ્રુપે હુમલાની જવાબદારી લીધી છે.
વૈશ્વિક સ્તરે સતત વધી રહ્યા છે સાયબર હુમલા અને આઉટેજ
JPMorgan Cyberattack: વિશ્વની સૌથી મોટી નાણાકીય સંસ્થાઓમાં ગણાતી અમેરિકન બેંક 'જેપી મોર્ગન ચેઝ' (JPMorgan Chase) પર એક મોટો સાયબર હુમલો થયો હોવાના ચોંકાવનારા સમાચાર સામે આવ્યા છે. બેંક માટે કામ કરતા થર્ડ-પાર્ટી સર્વિસ પ્રોવાઈડર્સ પર થયેલા આ સાયબર એટેકમાં અંદાજે 16,000 જેટલા અત્યંત શ્રીમંત ગ્રાહકોનો સંવેદનશીલ ડેટા લીક થઈ ગયો છે.
ખુદ જેપી મોર્ગન બેંકે આ ઘટનાની પુષ્ટિ કરતા ગુરુવારે સોશિયલ મીડિયા પ્લેટફોર્મ 'X' પર પોસ્ટ કરીને ગ્રાહકોને જાણ કરી છે. બેંકે પોતાની આંતરિક તપાસમાં સ્વીકાર્યું છે કે હેકર્સે થર્ડ-પાર્ટી વેન્ડર્સ પાસે રહેલા કેટલાક માર્કેટિંગ ડેટા સુધી પહોંચ મેળવી લીધી હતી, જેના કારણે ઘણા ગ્રાહકોની વ્યક્તિગત માહિતી ખુલ્લી પડી ગઈ હોવાની શક્યતા છે.
‘નોન-પ્રોફિટ' રેન્સમવેર ગ્રુપે લીધી જવાબદારી: 84 કરોડથી વધુ સંપત્તિ ધરાવતા ગ્રાહકો નિશાના પર!
મીડિયા રિપોર્ટ્સ અનુસાર, આ મોટા ડેટા લીક પાછળ એક કુખ્યાત હેકિંગ ગ્રુપનો હાથ છે, જેની મુખ્ય વિગતો નીચે મુજબ છે:
કયા ગ્રુપે કર્યો હુમલો?: 'નોન-પ્રોફિટ' (Non-Profit) નામના એક રેન્સમવેર ગ્રુપે આ સાયબર હુમલાની જવાબદારી સ્વીકારી છે. આ જ હેકિંગ ગ્રુપે જેપી મોર્ગન ઉપરાંત માસ્ટરકાર્ડ (Mastercard) અને વીઝા (Visa) ના ગ્રાહકોનો ડેટા પણ લીક કર્યો હોવાનો દાવો કર્યો છે.
કઈ માહિતી લીક થઈ?: થર્ડ-પાર્ટી બિઝનેસ પાર્ટનર્સની સિસ્ટમમાં થયેલી આ ઘૂસણખોરીને કારણે આશરે 16,000 હાઈ-નેટ-વર્થ (અમીર) ગ્રાહકોના નામ, ઈમેલ એડ્રેસ, ઘરના સરનામા, ફોન નંબર અને એકાઉન્ટ ID જેવી ખૂબ જ મહત્વની વિગતો લીક થઈ ગઈ છે.
ખાસ 'રિઝર્વ પ્રોગ્રામ'ના ગ્રાહકોને અસર: મળતી માહિતી મુજબ, લીક થયેલો આ ડેટા બેંકના સૌથી પ્રતિષ્ઠિત 'રિઝર્વ પ્રોગ્રામ' (Reserve Program) સાથે જોડાયેલો છે. આ પ્રોગ્રામ હેઠળ માત્ર ખાસ આમંત્રણ (Invite-only) દ્વારા જ વીઝા ક્રેડિટ કાર્ડ આપવામાં આવે છે અને તેના માટે ગ્રાહક પાસે સામાન્ય રીતે ઓછામાં ઓછી 10 મિલિયન અમેરિકન ડોલર (આશરે 84 કરોડ રૂપિયાથી વધુ) ની સંપત્તિ હોવી જરૂરી હોય છે.
જેપી મોર્ગન બેંકે સ્પષ્ટતા કરી છે કે આ સાયબર હુમલાને કારણે બેંકની મુખ્ય બેંકિંગ સેવાઓમાં કોઈ જ અડચણ આવી નથી અને તમામ સેવાઓ રાબેતા મુજબ ચાલુ છે. તેમજ અઠવાડિયાની શરૂઆતમાં કેટલાક ગ્રાહકોને જે ટેકનિકલ ખામી નડી હતી, તેને આ સાયબર એટેક સાથે કોઈ સંબંધ નથી.
બેંકે ભરોસો આપ્યો છે કે તે ડેટા લીકથી પ્રભાવિત થયેલા તમામ ગ્રાહકોનો સીધો સંપર્ક કરશે અને તેમને જરૂરી સુરક્ષા સહાય પૂરી પાડશે. જેથી કોઈ નાણાકીય છેતરપિંડી ન થાય તે માટે અસરગ્રસ્ત ગ્રાહકોને 'મફત ક્રેડિટ મોનિટરિંગ' (Free Credit Monitoring)ની સુવિધા પણ આપવામાં આવશે.
વૈશ્વિક સ્તરે સતત વધી રહ્યા છે સાયબર હુમલા અને આઉટેજ
જેપી મોર્ગન પર થયેલો આ સાયબર હુમલો એવા સમયે થયો છે જ્યારે છેલ્લા કેટલાક અઠવાડિયામાં દુનિયાભરમાં અનેક મોટી ટેકનિકલ ખામીઓ અને સાયબર એટેકની ઘટનાઓ સામે આવી છે. જેમાં ગયા અઠવાડિયે અમેરિકાના ફેડરલ એવિએશન એડમિનિસ્ટ્રેશન (FAA) દ્વારા આખા દેશમાં ફ્લાઈટ્સ રોકી દેવાની ઘટના, માઈક્રોસોફ્ટની ઈમેલ સેવા વૈશ્વિક સ્તરે ઠપ થવી અને ગયા મહિને દુનિયાના સૌથી મોટા ક્રિપ્ટોકરન્સી એક્સચેન્જ બાયનેન્સ (Binance) પર થયેલા મોટા સાયબર હુમલાનો સમાવેશ થાય છે.