અત્યાર સુધીની સૌથી મોટી ડીલની તૈયારીમાં ગૂગલ.. જો કે માઈક્રોસોફ્ટ અને એમેઝોન તરફથી જોરદાર કોમ્પિટિશનનો કરવો પડશે સામનો

ગૂગલની પેરેન્ટ આલ્ફાબેટ, વિશ્વની સૌથી મોટી ટેક કંપનીઓમાંની એક, તેની અત્યાર સુધીની સૌથી મોટી ડીલની તૈયારી કરી રહી છે. એક રિપોર્ટ અનુસાર, કંપની ઝડપથી વિકસતા સાયબર સિક્યુરિટી સ્ટાર્ટઅપ વિઝને હસ્તગત કરવાની નજીક છે. આ ડીલ 23 અબજ ડોલરની હોઈ શકે છે. આ કંપની ક્લાઉડ કમ્પ્યુટિંગ માટે સાયબર સિક્યુરિટી સોફ્ટવેર બનાવે છે. જો આ ડીલ આગળ વધે છે, તો તે ગૂગલની અત્યાર સુધીની સૌથી મોટી ખરીદી હશે. આનાથી એ પણ બહાર આવ્યું છે કે ગૂગલ સાયબર સિક્યોરિટી માર્કેટમાં મોટો દાવ રમવાની તૈયારી કરી રહ્યું છે. વિઝે આ વર્ષે વેન્ચર કેપિટલ રોકાણકારો પાસેથી એક અબજ ડોલર એકત્ર કર્યા હતા. ત્યારથી ગૂગલ અને વિઝ વચ્ચે વાતચીત શરૂ થઈ ગઈ હતી.

સૂત્રોનું કહેવું છે કે બંને કંપનીઓ વચ્ચે હજુ સુધી ડીલ ફાઈનલ થઈ નથી અને ભવિષ્યમાં કંઈ પણ થઈ શકે છે. જો કે બંને કંપનીઓએ આ અંગે કોઈ ટિપ્પણી કરી નથી. ગૂગલના ઈતિહાસમાં અત્યાર સુધીનો સૌથી મોટો સોદો મોટોરોલાની ખરીદીનો હતો. લગભગ એક દાયકા પહેલા ગૂગલે મોટોરોલાને 12.5 બિલિયન ડોલરમાં ખરીદી હતી. પરંતુ ભારે નુકસાનને કારણે, ગૂગલે બે વર્ષ પછી જ મોટોરોલાને વેચી દીધી. તાજેતરના ફંડિંગ રાઉન્ડમાં, વિઝનું મૂલ્યાંકન $12 બિલિયન રાખવામાં આવ્યું હતું. એટલે કે ગૂગલ તેને વેલ્યુએશન કરતા બમણી કિંમત આપી રહ્યું છે.

ક્લાઉડ પર ધ્યાન કેન્દ્રિત

માર્ચ 2022માં આલ્ફાબેટે સાયબર સિક્યુરિટી ફર્મ મેન્ડિયન્ટને $5.4 બિલિયનમાં ખરીદી. તેનો હેતુ તેના ક્લાઉડ કમ્પ્યુટિંગ બિઝનેસને મજબૂત કરવાનો અને કંપનીઓને સાયબર હુમલાઓથી બચાવવાનો હતો. કંપની તેની આવકને તેના કોર સર્ચ એડવર્ટાઇઝિંગ બિઝનેસની બહાર વિવિધતા લાવવા માંગે છે. આમાં, તે ક્લાઉડ પર મજબૂત ભાર ધરાવે છે. કંપનીના ક્લાઉડ વેચાણમાં વધારો થયો છે પરંતુ તેને માઇક્રોસોફ્ટ અને એમેઝોન તરફથી સખત કોમ્પિટિશનનો સામનો કરવો પડશે. તાજેતરના વર્ષોમાં ક્લાઉડ કમ્પ્યુટિંગનું મહત્વ વધી રહ્યું છે. કંપનીઓએ તેમના ડેટાને ક્લાઉડ પ્લેટફોર્મ પર શિફ્ટ કરવા માટે ઘણો ખર્ચ કર્યો છે.