Meesho Share Price: 7 દિવસમાં પૈસા ડબલ, પછી 11%નો કડાકો! Meeshoના શેરમાં રોકાણકારો થયા માલામાલ અને પછી...

Meesho Share Price: જાણીતા ઈ-કોમર્સ પ્લેટફોર્મ મીશો (Meesho)ના શેરે આજે બજારમાં ધમાલ મચાવી દીધી. માત્ર 7 ટ્રેડિંગ દિવસોમાં રોકાણકારોના પૈસા બમણાથી પણ વધુ કરી દીધા. જોકે, રેકોર્ડ હાઈ પર પહોંચ્યા પછી એવી વેચવાલી આવી કે રોકાણકારોની 11%થી વધુ મૂડી ધોવાઈ ગઈ. ચાલો જાણીએ કંપનીની નાણાકીય સ્થિતિ કેવી છે અને બ્રોકરેજ ફર્મ્સ આ શેર વિશે શું માને છે.

સ્ટોકમાં રોલરકોસ્ટર રાઈડ

મીશોના IPOમાં જેમને શેર લાગ્યા હતા તે રોકાણકારો માલામાલ થઈ ગયા. લિસ્ટિંગ પછીના શરુઆતી ઘટાડા બાદ શેરે એવી ગતિ પકડી કે માત્ર 4 જ ટ્રેડિંગ દિવસોમાં રોકાણકારોના પૈસા ડબલ કરી દીધા. જોકે, રેકોર્ડ હાઈ પર પહોંચ્યા બાદ તેમાં ભારે ઘટાડો જોવા મળ્યો અને તે 11%થી વધુ તૂટી ગયો. નફા વસૂલીનું દબાણ એટલું વધારે હતું કે નીચલા સ્તરે ખરીદી છતાં શેર વધુ ટકી શક્યો નહીં.

હાલમાં, BSE પર આ શેર 2.87%ના ઘટાડા સાથે 210.15 પર ટ્રેડ કરી રહ્યો છે. આ ઘટાડાને કારણે કંપનીનું માર્કેટ કેપ 1 લાખ કરોડની નીચે આવી ગયું છે અને હાલમાં 94,843.45 કરોડ પર છે.

આજના ટ્રેડિંગ દરમિયાન, મીશોનો શેર ઉછળીને 233.50ના ઓલટાઇમ હાઇ સ્તરે પહોંચ્યો હતો, જે તેના 111ના IPO પ્રાઇસ કરતાં 110.36% વધુ છે. જોકે, એ વાત ધ્યાનમાં રાખવી જરૂરી છે કે હાલમાં બજારમાં ટ્રેડિંગ માટે તેના વધુ શેર ઉપલબ્ધ નથી (ફ્રી ફ્લોટ ઓછો છે). અત્યારે તેની માત્ર 6% ઇક્વિટી જ ટ્રેડિંગ માટે ઉપલબ્ધ છે. શેર માટેનો એક મહિનાનો લોક-ઇન પિરિયડ 6 જાન્યુઆરીએ સમાપ્ત થશે, ત્યારબાદ બજારમાં શેરની ઉપલબ્ધતા વધશે.

Meesho અંગે બ્રોકરેજની શું છે સલાહ?

જાણીતી ગ્લોબલ બ્રોકરેજ ફર્મ UBS એ 'ખરીદી' ની રેટિંગ સાથે મીશોનું કવરેજ શરૂ કર્યું છે. બ્રોકરેજ ફર્મનું માનવું છે કે મીશો 'એસેટ-લાઇટ' અને 'નેગેટિવ વર્કિંગ કેપિટલ' બિઝનેસ મોડેલ પર કામ કરે છે. આ કારણે, અન્ય ઇન્ટરનેટ કંપનીઓની સરખામણીમાં તેમાં પોઝિટિવ કેશ ફ્લોની સંભાવના વધુ છે.

UBSને આશા છે કે દેશના ટિયર-2 અને ટિયર-3 શહેરો પર કંપનીનું ફોકસ તેને ગ્રોથ માટેની મોટી તક આપશે, કારણ કે આ ગ્રાહકોમાં મીશોનો ઉપયોગ ઝડપથી વધી રહ્યો છે. આ બધી બાબતોને ધ્યાનમાં રાખીને, UBS એ શેર માટે 220 નો ટાર્ગેટ પ્રાઇસ નક્કી કર્યો છે. જોકે, શેર આ લક્ષ્યાંકને પહેલાથી જ પાર કરી ચૂક્યો છે.

IPOને મળ્યો હતો શાનદાર પ્રતિસાદ

મીશોનો 5,421.20 કરોડનો IPO 3 થી 5 ડિસેમ્બર દરમિયાન સબ્સ્ક્રિપ્શન માટે ખુલ્યો હતો અને તે કુલ 81.76 ગણો ભરાયો હતો. આ ઇશ્યૂ હેઠળ 4250 કરોડના નવા શેર જારી કરવામાં આવ્યા હતા. 10 ડિસેમ્બરે લગભગ 46%ના પ્રીમિયમ પર લિસ્ટિંગ થયા બાદ, શેર પહેલા જ દિવસે 53% ના વધારા સાથે બંધ થયો હતો. જોકે, માત્ર બે દિવસ પછી, 12 ડિસેમ્બરે તે 153.95 ના નીચલા સ્તરે આવી ગયો હતો, જેમાંથી રિકવરી કરીને આજે (18 ડિસેમ્બર) તે 233.50 ના રેકોર્ડ હાઈ પર પહોંચ્યો હતો.

આ પણ વાંચો- પ્રણવ અદાણી ફરી વિવાદમાં: NDTV સોદા પહેલાં કોને આપી દીધી હતી ગુપ્ત માહિતી? SEBIએ લગાવ્યો મોટો આરોપ

ડિસ્ક્લેમર: અહીં આપવામાં આવેલી રોકાણની સલાહ કે મંતવ્યો એક્સપર્ટ્સ/બ્રોકરેજ ફર્મના અંગત મંતવ્યો છે. અમે કોઈપણ રોકાણ નિર્ણય લેતા પહેલા હંમેશા સર્ટિફાઇડ એક્સપર્ટની સલાહ લેવાની ભલામણ કરીએ છીએ.