Innovisionનો 323 કરોડનો IPO આજથી ખૂલ્યો; જાણો પ્રાઇસ બેન્ડ, GMP અને રોકાણ કરવું કે નહીં?

Innovision IPO: મેનપાવર અને ટોલ મેનેજમેન્ટ સેવાઓ આપતી જાણીતી કંપની ઇનોવિઝન (Innovision)નો આઇપીઓ (IPO) આજથી એટલે કે 10 માર્ચથી રોકાણ માટે ખૂલી ગયો છે. કંપની આ આઇપીઓ દ્વારા બજારમાંથી 323 કરોડ એકઠા કરવાની યોજના ધરાવે છે. શેરબજારમાં રસ ધરાવતા રોકાણકારો પાસે 12 માર્ચ સુધી આ ઇશ્યૂમાં પૈસા લગાવવાની તક છે. જો તમે પણ આ આઇપીઓમાં રોકાણ કરવાનું વિચારી રહ્યા છો, તો ચાલો જાણીએ તેની તમામ મહત્વની વિગતો.

પ્રાઇસ બેન્ડ અને લોટ સાઇઝ

કંપનીએ પોતાના આઇપીઓ માટે 521 થી 548 પ્રતિ શેરનો પ્રાઇસ બેન્ડ નક્કી કર્યો છે. આ ઇશ્યૂની કુલ સાઇઝ 323 કરોડ છે, જેમાં 255 કરોડના નવા શેર (Fresh Issue) બહાર પાડવામાં આવશે, જ્યારે 68 કરોડના શેર ઓફર ફોર સેલ (OFS) હેઠળ વેચવામાં આવશે. જો કોઈ રોકાણકાર આમાં પૈસા લગાવવા માંગતો હોય, તો તેણે ઓછામાં ઓછા 27 શેરનો એક લોટ ખરીદવો પડશે. કંપનીના શેર BSE અને NSE બંને એક્સચેન્જ પર લિસ્ટ થવાની શક્યતા છે.

આઇપીઓ માટેની મહત્વની તારીખો:

* આઇપીઓ બંધ થવાની તારીખ: 12 માર્ચ

* શેર ફાળવણી (Allotment): 13 માર્ચ

* ડીમેટ ખાતામાં શેર જમા થવાની તારીખ: 16 માર્ચ

* શેરબજારમાં લિસ્ટિંગ: 17 માર્ચ

ગ્રે માર્કેટમાં કેવો છે માહોલ? (GMP)

અત્યારે ગ્રે માર્કેટમાં આ આઇપીઓને લઈને કોઈ ખાસ ઉત્સાહ જોવા મળી રહ્યો નથી. બજારના જાણકારો મુજબ, ઇનોવિઝનના શેરનો ગ્રે માર્કેટ પ્રીમિયમ (GMP) હાલમાં શૂન્યની આસપાસ ચાલી રહ્યો છે. આનો સીધો અર્થ એ છે કે, રોકાણકારોને લિસ્ટિંગના દિવસે કોઈ મોટો નફો થવાની આશા ઓછી છે અને શેર ફ્લેટ લિસ્ટ થઈ શકે છે. પ્રાઇસ બેન્ડના ઉપલા સ્તર પર કંપનીનું પ્રી-આઇપીઓ માર્કેટ કેપ આશરે 1,291 કરોડ આંકવામાં આવ્યું છે.

કંપનીનો બિઝનેસ શું છે?

ઇનોવિઝન મુખ્યત્વે મેનપાવર પૂરો પાડવા, ટોલ પ્લાઝાનું મેનેજમેન્ટ કરવા અને સ્કિલ ડેવલપમેન્ટ ટ્રેનિંગ આપવાનું કામ કરે છે. કંપનીએ પોતાના બિઝનેસની શરૂઆત પ્રાઇવેટ સિક્યોરિટી આપવાથી કરી હતી. ત્યારબાદ નાણાકીય વર્ષ 2014 માં કંપનીએ સ્કિલ ડેવલપમેન્ટ સેવાઓ અને વર્ષ 2019 માં ટોલ મેનેજમેન્ટ સેવાઓમાં એન્ટ્રી કરી. આજે આ કંપની દેશના 23 રાજ્યો અને 5 કેન્દ્રશાસિત પ્રદેશોમાં પોતાનો વ્યાપ ધરાવે છે.

કેવી છે કંપનીની નાણાકીય સ્થિતિ?

છેલ્લા કેટલાક વર્ષોમાં કંપનીની આવકમાં જબરદસ્ત ઉછાળો જોવા મળ્યો છે. નાણાકીય વર્ષ 2023 માં કંપનીની આવક 258 કરોડ હતી, જે 2024 માં 512 કરોડ અને 2025 માં વધીને સીધી 896 કરોડ થઈ ગઈ છે. નફાની વાત કરીએ તો 2023 માં 9 કરોડનો નફો હતો, જે 2024 માં 10 કરોડ અને 2025 માં 29 કરોડ સુધી પહોંચી ગયો છે. કંપનીનો ગ્રોથ સારો છે, પણ તેનો માર્જિન હજુ પણ ઓછો છે. વર્ષ 2025 માં કંપનીનું EBITDA માર્જિન માત્ર 5.78 ટકા જેટલું રહ્યું હતું. જોકે, કંપનીનું રિટર્ન ઓન નેટ વર્થ (RoNW) 35.45 ટકા છે, જે સારી બાબત કહી શકાય. કંપની આ આઇપીઓમાંથી મળેલા પૈસાનો ઉપયોગ પોતાના દેવા ચૂકવવા, વર્કિંગ કેપિટલની જરૂરિયાતો પૂરી કરવા અને અન્ય કોર્પોરેટ કામો માટે કરશે.

રોકાણ માટે બ્રોકરેજની શું છે સલાહ?

જાણીતી બ્રોકરેજ ફર્મ ‘સ્વસ્તિકા ઇન્વેસ્ટમાર્ટ' એ રોકાણકારોને હાલ પૂરતું આ આઇપીઓથી દૂર રહેવાની સલાહ આપી છે. બ્રોકરેજનું કહેવું છે કે, કંપનીનું RoNW ભલે 35.45 ટકા છે, પરંતુ અત્યારે શેરનું વેલ્યુએશન ખૂબ જ મોંઘુ છે. 35.69 ના પ્રાઇસ-ટુ-અર્નિંગ (P/E) રેશિયો પર આ શેર ભવિષ્યના ગ્રોથને પહેલેથી જ પચાવી ચૂક્યો છે.

આ ઉપરાંત, કંપની જે સેક્ટરમાં છે તેમાં કોમ્પિટિશન ખૂબ જ વધારે છે અને માર્જિન ઓછું રહે છે. ઓછા EBITDA માર્જિનને કારણે રોકાણકારો માટે તેમાં જોખમ વધારે છે. બ્રોકરેજ માને છે કે જ્યાં સુધી કંપની પોતાના માર્જિનમાં સુધારો ન દેખાડે, ત્યાં સુધી આને લોંગ-ટર્મ માટે સારું રોકાણ ગણી શકાય નહીં.

આ પણ વાંચો- શેરબજારમાં રોનક પરત ફરી: 5 સેકન્ડમાં રોકાણકારો કમાયા 4.29 લાખ કરોડ, જાણો સેન્સેક્સ-નિફ્ટીમાં તેજીનું મુખ્ય કારણ

ડિસ્ક્લેમર: Moneycontrol.com પર વ્યક્ત કરાયેલા મંતવ્યો નિષ્ણાતોના અંગત મંતવ્યો છે. આ માટે વેબસાઇટ અથવા મેનેજમેન્ટ જવાબદાર નથી. મની કંટ્રોલ યુઝર્સને કોઈપણ રોકાણ નિર્ણય લેતા પહેલા પ્રમાણિત નિષ્ણાતની સલાહ લેવાની સલાહ આપે છે.