અમદાવાદના વિદ્યાર્થીઓનો ડંકો: માત્ર 15 વિદ્યાર્થીઓએ બનાવ્યું ‘SanskarSat-1’ સેટેલાઇટ, ISRO કરશે લોન્ચ, જાણો શું છે ખાસિયત

Ahmedabad Students Satellite: ગુજરાત અને ખાસ કરીને અમદાવાદ માટે ગૌરવની ક્ષણ નજીક આવી રહી છે. ભારતીય અવકાશ સંશોધન સંસ્થા એટલે કે ISRO નવા વર્ષ 2026 માં પોતાનું પ્રથમ લોન્ચિંગ કરવા જઈ રહ્યું છે. આગામી સોમવાર, 12 જાન્યુઆરીના રોજ થનારા આ અવકાશી મિશનમાં આ વખતે ગુજરાતનું નામ પણ ગુંજશે. આ લોન્ચમાં અમદાવાદના વિદ્યાર્થીઓ દ્વારા તૈયાર કરવામાં આવેલ ‘SanskarSat-1’ (સંસ્કારસેટ-1) સેટેલાઇટ પણ અવકાશમાં મોકલવામાં આવશે.

ચાલો જાણીએ કે આખરે આ વિદ્યાર્થીઓએ આ સિદ્ધિ કેવી રીતે મેળવી અને આ દેશી સેટેલાઇટની ખાસિયતો શું છે.

નાના વિદ્યાર્થીઓનો મોટો કમાલ

સામાન્ય રીતે આપણે સેટેલાઇટ બનાવવાનું કામ મોટા વૈજ્ઞાનિકોનું માનતા હોઈએ છીએ, પરંતુ ‘SanskarSat-1’ એ સાબિત કર્યું છે કે પ્રતિભાની કોઈ ઉંમર નથી હોતી. આ સેટેલાઇટને અમદાવાદમાં આવેલી ‘સંસ્કારધામ’ ના વિદ્યાર્થીઓએ ડિઝાઇન અને તૈયાર કર્યો છે. નવાઈની વાત એ છે કે આ પ્રોજેક્ટમાં ધોરણ 7 થી લઈને ધોરણ 12 સુધીના વિદ્યાર્થીઓ જોડાયેલા હતા.

શું છે ‘SanskarSat-1’ ની ખૂબીઓ?

તમને થતું હશે કે આ વિદ્યાર્થીઓએ કેવું સેટેલાઇટ બનાવ્યું હશે? તો તમને જણાવી દઈએ કે SanskarSat-1 એક પ્રકારનું ‘ક્યુબસેટ’ છે. આ એક ખૂબ જ નાનું સેટેલાઇટ હોય છે જેનો આકાર ક્યુબ જેવો હોય છે. તેનો ઉપયોગ મુખ્યત્વે રિસર્ચ અને નવી ટેકનોલોજીના પ્રદર્શન માટે થાય છે. આ નાનકડા સેટેલાઇટને ઇસરો અન્ય મોટા સેટેલાઇટની સાથે પિગીબેક પેલોડ તરીકે લોન્ચ કરી શકે છે. આનો મુખ્ય ઉદ્દેશ્ય શીખવાનો અને પ્રયોગ કરવાનો છે. આ સેટેલાઇટની મદદથી વિદ્યાર્થીઓ એ શીખશે કે સેટેલાઇટ પૃથ્વી સાથે કેવી રીતે વાતચીત કરે છે, ત્યાંથી ડેટા કેવી રીતે મળે છે અને તે ડેટાનું એનાલિસિસ કેવી રીતે થાય છે.

Student-made satellite ‘SanskarSat-1’ developed by Sanskardham Ahmedabad, set for ISRO launch tomorrowhttps://t.co/u4OENLl89D pic.twitter.com/zKIa3Zo2Cf

— DeshGujarat (@DeshGujarat) January 11, 2026

15 વિદ્યાર્થીઓ અને 5 ટીમોની મહેનત

આ સફળતા પાછળ 15 વિદ્યાર્થીઓની રાત-દિવસની મહેનત છે. આ કામને વ્યવસ્થિત કરવા માટે વિદ્યાર્થીઓએ 5 અલગ-અલગ ટીમ બનાવી હતી. આ ટીમોએ ડિઝાઇન, ફેબ્રિકેશન, મિશન પ્લાનિંગ, એસેમ્બલી અને ટેસ્ટિંગ જેવા જટિલ કામો વહેંચી લીધા હતા.

એટલું જ નહીં, સેટેલાઇટ બનાવતી વખતે વિદ્યાર્થીઓએ પોતાના કેમ્પસમાં જ એક ‘ઓટોમેટેડ વેધર સ્ટેશન’ પણ બનાવ્યું હતું. આનો હેતુ રિયલ-ટાઈમ ડેટા ભેગો કરવાનો અને તે ડેટાનો ઉપયોગ ખેતી તથા હવામાનની જાણકારી માટે કેવી રીતે થઈ શકે તે સમજવાનો હતો.

અમદાવાદના આ હોનહાર વિદ્યાર્થીઓની મહેનત હવે આકાશમાં ઉડાન ભરશે, જે સમગ્ર ગુજરાત માટે ગૌરવની વાત છે.

આ પણ વાંચો- અમદાવાદમાં પતંગ મહોત્સવ 2026ની ભવ્ય શરૂઆત: PM મોદી અને જર્મન ચાન્સેલર ફ્રેડરિક એક જ કારમાં રિવરફ્રન્ટ પહોંચ્યા, જુઓ મહોત્સવની રોનક