‘અમેરિકાના ખર્ચે ભારતમાં AIની મજા?' ટ્રમ્પના ખાસ માણસે ભારત પર કાઢ્યો ગુસ્સો, ફરી કહ્યું- ‘ટેરિફ કિંગ'

India US Trade relations: અમેરિકા અને ભારત વચ્ચેના વેપાર સંબંધોને લઈને અવારનવાર ચર્ચાઓ થતી રહે છે, પરંતુ આ વખતે મામલો જરા ગરમાયો છે. વ્હાઈટ હાઉસના પૂર્વ ટ્રેડ એડવાઈઝર અને ડોનાલ્ડ ટ્રમ્પના નજીકના મનાતા પીટર નવારોએ ભારતને લઈને કેટલાક તીખા નિવેદનો આપ્યા છે. તેમણે માત્ર વેપાર જ નહીં પણ ભારતમાં વપરાતી આર્ટિફિશિયલ ઇન્ટેલિજન્સ (AI) સર્વિસ પર પણ સવાલો ઉઠાવ્યા છે.

પીટર નવારોએ ભારતને ફરી એકવાર 'ટેરિફનો મહારાજા' ગણાવ્યો છે અને દાવો કર્યો છે કે ભારતની AI સર્વિસનું પેમેન્ટ અમેરિકન નાગરિકો કરી રહ્યા છે. ચાલો વિગતે જાણીએ કે આખો મામલો શું છે.

ભારતમાં AI સર્વિસ પર કેમ ભડક્યા નવારો?

પીટર નવારોએ ભારતની AI સર્વિસિસ પર મોટો સવાલ ઉઠાવ્યો છે. તેમનું કહેવું છે કે તેમને એ વાત સમજાતી નથી કે અમેરિકન લોકો ભારતમાં અપાતી AI સુવિધાઓ માટે શા માટે પૈસા ચૂકવી રહ્યા છે. તેમણે દલીલ કરી હતી કે, "ChatGPT અને Google Gemini જેવા મોટા AI પ્લેટફોર્મ્સ અમેરિકાની જમીન પર ચાલે છે. આ મોડલ્સને ચલાવવા માટે જે વીજળી, પાણી અને અન્ય સંસાધનો (Resources) વપરાય છે, તે બધું અમેરિકાનું છે. તેમ છતાં ભારતમાં આ સેવાઓ મફત અથવા ખૂબ સસ્તામાં મળી રહી છે." નવારોએ આને અમેરિકાની આર્થિક નીતિની વિરુદ્ધ ગણાવ્યું છે.

ભારત અત્યારે ટેકનોલોજીની દુનિયામાં એક મોટું માર્કેટ બની ગયું છે. અહીં સામાન્ય લોકોમાં પણ AIનો ઉપયોગ ઝડપથી વધી રહ્યો છે. Google અને OpenAI જેવી કંપનીઓના કેટલાક પેડ સબસ્ક્રિપ્શન ભારતમાં ફ્રીમાં અથવા ટેલિકોમ કંપનીઓની ઓફર સાથે વાપરવા મળી રહ્યા છે. આ જ કારણે મોટી કંપનીઓ પોતાના AI મોડલ ભારતમાં લોન્ચ કરવા માટે ઉત્સુક હોય છે.

ભારતને ફરી કહ્યું 'ટેરિફનો મહારાજા'

વાતચીત દરમિયાન નવારોએ ફરી એકવાર ભારત પર નિશાન સાધતા તેને 'ટેરિફ કિંગ' અથવા 'ટેરિફના મહારાજા' તરીકે સંબોધ્યું હતું. તેમનો આરોપ છે કે ભારત અમેરિકન પ્રોડક્ટ્સ પર ખૂબ વધારે ઈમ્પોર્ટ ડ્યુટી (આયાત વેરો) લગાવે છે. આના કારણે અમેરિકન કંપનીઓને નુકસાન વેઠવું પડે છે અને તેમને ભારતીય માર્કેટમાં ટકવું મુશ્કેલ બને છે.

રશિયા પાસેથી તેલ ખરીદવા પર પણ નારાજગી

માત્ર ટેકનોલોજી જ નહીં, પીટર નવારોએ ભારતના રશિયા સાથેના સંબંધો પર પણ આંગળી ચીંધી છે. તેમણે કહ્યું કે ભારત રશિયા પાસેથી સસ્તા ભાવે કાચું તેલ (Crude Oil) ખરીદી રહ્યું છે. તેમના મતે, ભારત આમ કરીને રશિયાની અર્થવ્યવસ્થાને સપોર્ટ કરી રહ્યું છે, જે પશ્ચિમી દેશોની નીતિઓથી વિપરીત છે.

ભારતમાં AI કંપનીઓની તેજી

ભલે અમેરિકા તરફથી ટીકાઓ થઈ રહી હોય, પણ હકીકત એ છે કે ભારત આજે દુનિયાના ટોપ AI ઈકોસિસ્ટમમાં સામેલ છે. ભારતમાં AI સ્ટાર્ટઅપ્સ અને કંપનીઓની સંખ્યામાં જબરદસ્ત વધારો થયો છે. આંકડાઓની વાત કરીએ તો, ભારતમાં અત્યારે 2,000થી પણ વધુ AI કંપનીઓ અને સ્ટાર્ટઅપ્સ કામ કરી રહ્યા છે. એક રિપોર્ટ મુજબ, ભારતમાં GenAI સ્ટાર્ટઅપ્સની સંખ્યા જ લગભગ 890 ને પાર કરી ગઈ છે અને આ ગ્રાફ સતત ઉપર જઈ રહ્યો છે. આ બતાવે છે કે ભારત AI ક્ષેત્રે કેટલું મજબૂત બની રહ્યું છે.

આ પણ વાંચો- ભારત પર દબાણ? અમેરિકી સાંસદોએ ટ્રમ્પને લખ્યો પત્ર: દાળ પરની ઈમ્પોર્ટ ડ્યુટી ઘટાડવા કરી માગ, જાણો સમગ્ર મામલો