AI Impact Summit 2026: ડીપફેક પર લાગશે લગામ? ભારત 30 દેશો સાથે મળીને ઘડશે કડક AI નિયમો

AI Impact Summit 2026: ભારત હવે આર્ટિફિશિયલ ઈન્ટેલિજન્સ (AI) ના દુરુપયોગ અને ડીપફેક જેવી ગંભીર સમસ્યાઓ સામે લડવા માટે વૈશ્વિક સ્તરે આગેવાની લઈ રહ્યું છે. નવી દિલ્હીમાં યોજાયેલી AI Impact Summit 2026 માં કેન્દ્રીય મંત્રી અશ્વિની વૈષ્ણવે એક મોટી જાહેરાત કરી છે. તેમણે જણાવ્યું હતું કે ભારત દુનિયાના 30 થી વધુ દેશો સાથે મળીને AI માટેના કડક નિયમો અને કાયદા બનાવવા પર ચર્ચા કરી રહ્યું છે.

‘વિશ્વાસ વગરનું ઈનોવેશન નકામું’

આ સમિટમાં બોલતા અશ્વિની વૈષ્ણવે એક બહુ મહત્વની વાત કરી હતી. તેમણે કહ્યું કે, "જો ટેકનોલોજીમાં લોકોનો વિશ્વાસ ન હોય, તો તે નવું સંશોધન (Innovation) એક બોજ બની જાય છે." આજના સમયમાં મીડિયા અને સોશિયલ પ્લેટફોર્મ પર AI નો દુરુપયોગ વધી રહ્યો છે, ત્યારે સરકાર હવે એક્શન મોડમાં છે.

સરકાર એવા નિયમો લાવી રહી છે જેનાથી AI દ્વારા બનેલી સામગ્રી (Content) પર સ્પષ્ટ વોટરમાર્ક અને લેબલિંગ ફરજિયાત કરવામાં આવશે. આનો મુખ્ય હેતુ એ છે કે જે વસ્તુ માણસે પોતાની મહેનતથી બનાવી છે અને જે AI એ બનાવી છે, તે બંને વચ્ચેનો તફાવત લોકોને તરત ખબર પડે.

મંત્રીએ ‘Rewarding Our Creative Future in the Age of AI’ નામના સેશનમાં ભાગ લીધો હતો, જેમાં મોશન પિક્ચર એસોસિએશનના ચેરમેન ચાર્લ્સ રિવ્કિન પણ હાજર હતા. વૈષ્ણવે ચિંતા વ્યક્ત કરતા કહ્યું કે ખોટી માહિતી અને ડીપફેક ટેકનોલોજી આપણા સમાજના પાયા પર હુમલો કરી રહી છે.

આ માત્ર સરકારની જવાબદારી નથી. તેમણે સ્પષ્ટ કર્યું કે સોશિયલ મીડિયા પ્લેટફોર્મ્સ, AI મોડલ્સ અને કન્ટેન્ટ ક્રિએટર્સ—બધાએ સાથે મળીને આ જવાબદારી ઉપાડવી પડશે.

ડેટા ચોરી અને ભ્રામક માહિતી સામે કડક વલણ

ડીપફેક અને ડેટા ચોરી જેવી ઘટનાઓ હવે સામાન્ય નથી રહી, તે દેશ અને સમાજ માટે ગંભીર મુદ્દો બની ગઈ છે. મંત્રીએ કહ્યું કે, "આ નવી ટેકનોલોજીનો ઉપયોગ એ રીતે થવો જોઈએ કે જેનાથી લોકોનો વિશ્વાસ વધે, નહીં કે સરકારી અને સામાજિક સંસ્થાઓ નબળી પડે." આપણે જે અભિવ્યક્તિની આઝાદી ભોગવીએ છીએ તે પણ વિશ્વાસ પર ટકેલી છે, અને તેને સાચવવી ખૂબ જરૂરી છે.

સોશિયલ મીડિયા પ્લેટફોર્મ્સને અપાયા નિર્દેશ

આ જાહેરાત એવા સમયે કરવામાં આવી છે જ્યારે કેન્દ્ર સરકારે સોશિયલ મીડિયા કંપનીઓને કડક સૂચનાઓ આપી દીધી છે. સરકારે સ્પષ્ટ કહ્યું છે કે AI દ્વારા બનેલી કોઈપણ સામગ્રી, પછી તે ફોટો હોય કે વિડિયો, તેના પર સ્પષ્ટ લેબલ હોવું જોઈએ.

આ પગલું ખાસ કરીને ગેરકાયદેસર, અશ્લીલ અથવા લોકોને ગેરમાર્ગે દોરતી માહિતીને રોકવા માટે લેવામાં આવ્યું છે. આગામી સમયમાં આપણે જોઈ શકીશું કે સોશિયલ મીડિયા પર AI કન્ટેન્ટને અલગ તારવવા માટે નવી સિસ્ટમ અમલમાં આવશે.

આ પણ વાંચો- Gaudium IVF IPO: બાળક માટે વલખાં મારતા દંપતીઓની આશા હવે રોકાણકારોની કરાવશે કમાણી, 20 ફેબ્રુઆરીએ ખુલશે આઈપીઓ