India Pakistan tension: ભારત-પાકિસ્તાન વચ્ચે તણાવ ઘટ્યા બાદ અમેરિકાનું મહત્ત્વનું નિવેદન, શાંતિના પ્રયાસોને આવકાર્યા

India Pakistan tension: ભારત અને પાકિસ્તાન વચ્ચે ચાલી રહેલા તણાવમાં નોંધપાત્ર ઘટાડો થયો છે. આ દરમિયાન અમેરિકી વિદેશ વિભાગે બંને દેશોના નેતાઓના શાંતિના પ્રયાસોની પ્રશંસા કરી છે. અમેરિકી વિદેશ વિભાગે એક નિવેદનમાં જણાવ્યું કે, "અમે ભારતના વડાપ્રધાન નરેન્દ્ર મોદી અને પાકિસ્તાનના વડાપ્રધાન શાહબાઝ શરીફની સમજદારી, સંયમ અને શાંતિનો માર્ગ અપનાવવાની રાજનીતિની સરાહના કરીએ છીએ."

સરહદ પર શાંતિનો માહોલ

જમ્મુ-કાશ્મીર અને આંતરરાષ્ટ્રીય સરહદે ગઈ રાત્રે શાંતિનો માહોલ જોવા મળ્યો. ભારતીય સેનાએ જણાવ્યું કે, "જમ્મુ-કાશ્મીર અને આંતરરાષ્ટ્રીય સરહદે આવેલા અન્ય વિસ્તારોમાં ગઈ રાત્રે નોંધપાત્ર શાંતિ રહી. કોઈ અનિચ્છનીય ઘટનાના અહેવાલ નથી. આ તાજેતરના દિવસોમાં પ્રથમ શાંત રાત્રિ હતી." આ શાંતિનો શ્રેય ભારત અને પાકિસ્તાન વચ્ચે થયેલા યુદ્ધવિરામ (સીઝફાયર)ની જાહેરાતને આપવામાં આવી રહ્યો છે.

અમેરિકાનું શાંતિ માટે સમર્થન

On understanding reached between India and Pakistan, US State Department to ANI says, "We commend Prime Ministers Modi and Sharif on their wisdom, prudence, and statesmanship in choosing the path of peace. President Trump and Secretary Rubio continue to urge both countries to…

— ANI (@ANI) May 12, 2025

યુદ્ધવિરામની પ્રક્રિયા અને ઉલ્લંઘન

10 મેના રોજ પાકિસ્તાનના ડાયરેક્ટર જનરલ ઓફ મિલિટરી ઓપરેશન્સ (DGMO)એ ભારતના DGMO સાથે ટેલિફોનિક વાતચીત કરી અને યુદ્ધવિરામની દરખાસ્ત મૂકી હતી, જેના પછી યુદ્ધવિરામની જાહેરાત કરવામાં આવી. જોકે, થોડા કલાકો બાદ જ પાકિસ્તાને યુદ્ધવિરામનું ઉલ્લંઘન કર્યું, જેના કારણે ભારતે સખત વાંધો ઉઠાવ્યો હતો. ભારતના વિદેશ સચિવ વિક્રમ મિસરીએ શનિવારે મોડી રાત્રે પત્રકારોને જણાવ્યું હતું કે, "પાકિસ્તાનને આ ઉલ્લંઘનો બંધ કરવા અને પરિસ્થિતિને ગંભીરતા અને જવાબદારી સાથે હેન્ડલ કરવા માટે યોગ્ય પગલાં લેવાનું કહેવામાં આવ્યું છે."

ભારતનો કડક સંદેશ

ભારતના DGMOએ રવિવારે પાકિસ્તાનના DGMOને હોટલાઈન પર એક સંદેશ મોકલીને 10 મેના રોજ થયેલા કરારના ઉલ્લંઘન પર ધ્યાન દોર્યું હતું. ભારતે સ્પષ્ટ શબ્દોમાં જણાવ્યું કે, "જો આજે રાત્રે, પછીના સમયે અથવા ભવિષ્યમાં પાકિસ્તાન તરફથી આવી કોઈ હરકત ફરીથી થશે, તો અમે તેનો કડક અને દંડાત્મક રીતે જવાબ આપીશું."

આજે DGMO વચ્ચે ફરી વાતચીત

જાણવા મળ્યું છે કે આજે ભારત અને પાકિસ્તાનના DGMO વચ્ચે ફરી એકવાર વાતચીત થવાની છે. આ વાતચીતમાં યુદ્ધવિરામની સ્થિતિ અને સરહદ પર શાંતિ જાળવવા અંગે ચર્ચા થવાની સંભાવના છે.

આ પણ વાંચો - ભારતીય અર્થવ્યવસ્થા FY2026માં 6.5%ના દરે થશે ગ્રોથ: CIIનો તાજેતરનો અંદાજ