ચૂંટણી પરિણામો 2026: બંગાળમાં ભાજપની પ્રચંડ આંધી, તમિલનાડુમાં 'થલપથી' વિજયનો જાદુ ચાલ્યો; જાણો પાંચેય રાજ્યોની સ્થિતિ

Election Results 2026: પાંચ રાજ્યોની વિધાનસભા ચૂંટણીના પરિણામો આજે જાહેર થઈ રહ્યા છે અને શરૂઆતી રુઝાનમાં મોટા ઉલટફેર જોવા મળી રહ્યા છે. પશ્ચિમ બંગાળ, આસામ, તમિલનાડુ, કેરળ અને પુડુચેરીમાં જનતાએ કોના પર પસંદગી ઉતારી છે તેનું ચિત્ર હવે સ્પષ્ટ થવા લાગ્યું છે. આ વખતના પરિણામોમાં સૌથી મોટું આશ્ચર્ય પશ્ચિમ બંગાળ અને તમિલનાડુમાં જોવા મળી રહ્યું છે.

બંગાળમાં મમતાના ગઢમાં ગાબડું, ભાજપની મજબૂત પકડ

પશ્ચિમ બંગાળમાં અત્યાર સુધીના રુઝાન મુજબ મમતા બેનર્જીની TMC ને મોટો ઝટકો લાગ્યો હોય તેવું જણાય છે. ભાજપ અહીં પ્રચંડ જીત તરફ આગળ વધી રહ્યું છે અને તેની બેઠકોનો આંકડો 190 ને પાર પહોંચતો દેખાય છે.

ભવાનીપુર: મમતા બેનર્જીની પોતાની બેઠક ભવાનીપુર પર કાંટાની ટક્કર ચાલી રહી છે, જ્યાં ભાજપના ઉમેદવાર સતત પડકાર આપી રહ્યા છે.

તમિલનાડુમાં અભિનેતા વિજયનો 'પાવર'

આજના પરિણામોમાં સૌથી વધુ ચર્ચા અભિનેતા વિજયની પાર્ટી TVK (તમિલગા વેટ્રી કઝગમ) ની થઈ રહી છે. પ્રથમ વખત ચૂંટણી મેદાનમાં ઉતરેલી વિજયની પાર્ટીએ સ્થાપિત પક્ષો DMK અને AIADMK ને પાછળ પાડી દીધા છે. અત્યાર સુધીના વલણોમાં TVK સૌથી મોટી પાર્ટી તરીકે ઉભરી રહી છે, જોકે બહુમતીના આંકડા માટે હજુ રાહ જોવી પડશે.

આસામ અને કેરળની સ્થિતિ

આસામ: અહીં મુખ્યમંત્રી હિમંતા બિશ્વા સરમાના નેતૃત્વમાં ભાજપ ફરી એકવાર સત્તા જાળવી રાખવામાં સફળ થતું દેખાય છે. ભાજપ અને તેનું ગઠબંધન બહુમતીના આંકડાથી ઘણું આગળ ચાલી રહ્યું છે.

કેરળ: કેરળમાં સત્તા બદલવાનો જૂનો ટ્રેન્ડ જળવાઈ રહ્યો હોય તેવું લાગે છે. ડાબેરી ગઠબંધન (LDF) ને સત્તામાંથી બહાર કરીને કોંગ્રેસના નેતૃત્વવાળું UDF (યુનાઇટેડ ડેમોક્રેટિક ફ્રન્ટ) વાપસી કરતું જોવા મળી રહ્યું છે.

પુડુચેરી: અહીં પણ AINRC-ભાજપ ગઠબંધન અને DMK-કોંગ્રેસ વચ્ચે સીધો જંગ છે, જેમાં રસાકસી ચાલી રહી છે.

શું કહેતા હતા એક્ઝિટ પોલ?

એક્ઝિટ પોલમાં પશ્ચિમ બંગાળમાં ભાજપ અને TMC વચ્ચે ટક્કર બતાવાઈ હતી, પરંતુ રુઝાનમાં ભાજપ ઘણું આગળ નીકળી ગયું છે. આસામમાં અગાઉથી જ ભાજપની જીત નક્કી માનવામાં આવતી હતી. તમિલનાડુમાં વિજય 'કિંગમેકર' બનશે તેવો અંદાજ હતો, પરંતુ તેઓ તો સીધા 'કિંગ' બનવાની રેસમાં આવી ગયા છે.

ચૂંટણીના આ પરિણામો દેશના રાજકારણ માટે ખૂબ જ મહત્વના સાબિત થશે. બંગાળમાં ભાજપની સંભવિત જીત અને તમિલનાડુમાં એક નવા પ્રાદેશિક પક્ષનો ઉદય ભારતીય લોકશાહીમાં નવા સમીકરણો રચશે.

આ પણ વાંચો-બંગાળમાં ભાજપની આંધી: 185 બેઠકો પર BJP ની લીડ વચ્ચે મમતા બેનર્જીનો મોટો દાવો- ‘હતાશ ન થાઓ, સાંજ સુધીમાં આપણે જ જીતીશું’