Coronavirus Update: વધતા કેસ.. વધતી ચિંતા.. દેશમાં એક દિવસમાં 4000થી વધુ નવા કેસ, પોઝિટિવિટી રેટમાં પણ વધારો

Coronavirus Update: દેશમાં ફરી એકવાર કોરોના સંક્રમણ હાહાકાર મચાવી રહ્યો છે. ઘણા રાજ્યોમાં કોરોના સંક્રમિત દર્દીઓની સંખ્યા ઝડપથી વધી રહી છે. દરમિયાન, છેલ્લા 24 કલાકમાં દેશભરમાં 4,435 નવા કોરોના સંક્રમિત દર્દીઓ સામે આવ્યા છે. તેના એક દિવસ પહેલા 3,038 નવા કેસ નોંધાયા હતા. ગઈકાલની સરખામણીએ આજે કોરોના સંક્રમિત દર્દીઓની સંખ્યામાં વધારો થયો છે. દેશમાં એક્ટિવ કેસની સંખ્યા વધીને 23091 થઈ ગઈ છે. કોરોના દર્દીઓની વધતી સંખ્યા વચ્ચે સરકાર પણ એલર્ટ મોડ પર આવી ગઈ છે.

તાજેતરમાં, દેશમાં કોરોના સંક્રમિત દર્દીઓની સંખ્યામાં વધારો થયો છે. આ કારણે ઘણા રાજ્યો અને કેન્દ્રશાસિત પ્રદેશોએ કોવિડ પ્રોટોકોલના નિયમો પર આગ્રહ કરવાનું શરૂ કર્યું છે.

સ્વાસ્થ્ય વિભાગ તરફથી મળેલી માહિતી અનુસાર દેશની રાષ્ટ્રીય રાજધાની દિલ્હીમાં સોમવારે કોરોના સંક્રમણના 521 નવા કેસ નોંધાયા છે. આ આંકડો ગત 27 ઓગસ્ટ પછી સૌથી વધુ છે. હાલમાં દિલ્હીમાં કોરોના પોઝિટિવ રેટ 15.64 ટકા છે. 27 ઓગસ્ટે દિલ્હીમાં એક જ દિવસમાં 573 નવા કેસ નોંધાયા હતા. જેમાં 5 લોકોના મોત થયા હતા. કોરોના પોઝિટિવ રેટ 3.62 ટકા હતો. દરમિયાન, ઉત્તર પ્રદેશના ગૌતમ બુદ્ધ નગરના જિલ્લા મેજિસ્ટ્રેટ મનીષ કુમાર વર્માએ કહ્યું કે અમે કોરોનાને લઈને તમામ અધિકારીઓ સાથે સમીક્ષા બેઠક કરી છે. હોસ્પિટલ, એમ્બ્યુલન્સ સેનિટાઈઝેશનની વ્યવસ્થા સંપૂર્ણ કરવામાં આવી છે.

કેટલાક રાજ્યોમાં માસ્ક પહેરવું ફરજિયાત

કોરોનાના વધતા જતા કેસોને જોતા મહારાષ્ટ્રના સતારામાં માસ્ક પહેરવાનું ફરજિયાત કરવામાં આવ્યું છે. સરકારી કચેરીઓ, ખાનગી કંપનીઓની ઓફિસો, બેંકો અને કોલેજોના કર્મચારીઓ માટે માસ્ક પહેરવાનું ફરજિયાત કરવામાં આવ્યું છે. બીજી તરફ હરિયાણાના સ્વાસ્થ્ય મંત્રી અનિલ વિજે કહ્યું કે જે વિસ્તારોમાં 100થી વધુ કોરોના સંક્રમિત દર્દીઓ સામે આવી રહ્યા છે. ત્યાં તમામ આરોગ્ય કર્મચારીઓ માટે માસ્ક પહેરવાનું જરૂરી બનાવવામાં આવશે.

આ પણ વાંચો - ચીનને અમેરિકાની વધુ એક લપડાક.. અરૂણાચલ પ્રદેશને ગણાવ્યું ભારતનું અભિન્ન અંગ