Donald Trump India News: ભારત માટે મોટા ખતરાની ઘંટી! રશિયા પાસેથી તેલ ખરીદવું પડી શકે છે ભારે, અમેરિકા લગાવશે 500% ટેરિફ?

India US Trade: ભારત અને અમેરિકા વચ્ચેના સંબંધો હાલમાં એક નાજુક તબક્કે આવીને ઊભા છે. આગામી અઠવાડિયે અમેરિકાની સંસદમાં એક એવું બિલ રજૂ થવા જઈ રહ્યું છે, જે જો પાસ થઈ ગયું તો ભારત માટે મુસીબત વધી શકે છે. અમેરિકા રશિયા-યુક્રેન યુદ્ધને અટકાવવા માટે રશિયા પર દબાણ વધારી રહ્યું છે, પરંતુ તેની સીધી અસર હવે ભારત પર પડવાની શક્યતા છે. વાત જાણે એમ છે કે, આ નવા પ્રસ્તાવ મુજબ જે દેશો રશિયા પાસેથી ઉર્જા ઉત્પાદનો ખરીદે છે, તેમના પર અમેરિકા 500% સુધીનો તોતિંગ ટેરિફ (ટેક્સ) લગાવી શકે છે.

શું છે અમેરિકાનો આ નવો કાયદો?

અમેરિકા રશિયાને ઘેરવા માટે એક કડક કાયદો લાવવાની તૈયારીમાં છે, જેનું નામ "Stopping Russia's Aggression Act of 2025" (રશિયા પર પ્રતિબંધ લગાવવાનો અધિનિયમ 2025) છે. આ કોઈ સામાન્ય બિલ નથી, પરંતુ રિપબ્લિકન સેનેટર લિન્ડસે ગ્રેહામ અને ડેમોક્રેટિક સેનેટર રિચર્ડ બ્લુમેન્ટલ દ્વારા સંયુક્ત રીતે તૈયાર કરવામાં આવ્યું છે.

મહત્વની વાત એ છે કે, આ બિલ પ્રમુખ ડોનાલ્ડ ટ્રમ્પ સાથેની બેઠક બાદ તૈયાર થયું છે અને તેને વ્હાઇટ હાઉસની મંજૂરી પણ મળી ચૂકી છે. આ કાયદાનો મુખ્ય ઉદ્દેશ્ય એ છે કે જો રશિયા શાંતિ વાટાઘાટોમાં સહકાર નહીં આપે અથવા યુદ્ધ વિરામની શરતોનું પાલન નહીં કરે, તો અમેરિકા તે દેશો પર કડક કાર્યવાહી કરશે જે રશિયાને આર્થિક મદદ પૂરી પાડે છે – એટલે કે તેની પાસેથી તેલ કે ગેસ ખરીદે છે.

જ્યારથી રશિયા અને યુક્રેન વચ્ચે યુદ્ધ શરૂ થયું છે, ત્યારથી ભારતે પોતાની જનતાને સસ્તા ભાવે પેટ્રોલ-ડીઝલ પૂરું પાડવા માટે રશિયા પાસેથી મોટા પાયે ક્રૂડ ઓઈલ (કાચું તેલ) ખરીદ્યું છે. ભારતની આ નીતિ અમેરિકાને ખૂંચી રહી છે.

આ નવા બિલમાં સૌથી ખતરનાક જોગવાઈ એ છે કે, જે દેશો રશિયા પાસેથી તેલ, ગેસ કે યુરેનિયમ ખરીદશે, તે દેશોની અમેરિકામાં નિકાસ પર 500% સુધીનો ટેરિફ લગાવી શકાશે. સરળ ભાષામાં કહીએ તો, જો ભારત રશિયા પાસેથી તેલ ખરીદવાનું ચાલુ રાખશે, તો અમેરિકામાં ભારતીય સામાન વેચવો અશક્ય બની જશે કારણ કે તેના પર જંગી ટેક્સ લાગશે. ડોનાલ્ડ ટ્રમ્પે અગાઉ પણ ઈશારો કર્યો હતો કે જો ભારત રશિયન ઓઈલ ખરીદશે તો અમેરિકા ટેરિફ વધારવા અંગે વિચારશે.

હવે આગળ શું થશે?

આ મામલે આગામી અઠવાડિયું ખૂબ જ મહત્વનું છે, કારણ કે અમેરિકન સેનેટમાં આ બિલ પર વોટિંગ થવાનું છે. જો આ બિલ કાયદો બની જાય છે, તો ભારત અને અમેરિકાના વેપાર સંબંધોમાં કડવાશ આવી શકે છે.

નિષ્ણાતોનું માનવું છે કે અમેરિકાનું આ પગલું ભલે રશિયાને નબળું પાડવા માટે હોય, પરંતુ તેનાથી ભારત જેવા મિત્ર દેશો સાથેના સંબંધો બગડી શકે છે અને વૈશ્વિક બજારમાં પણ અફરાતફરી મચી શકે છે. હવે જોવાનું એ રહેશે કે મોદી સરકાર અને ટ્રમ્પ પ્રશાસન વચ્ચે આ મુદ્દે કોઈ વચ્ચેનો રસ્તો નીકળે છે કે કેમ.

આ પણ વાંચો - અમેરિકા બનાવશે 'ડ્રીમ મિલિટરી': ડોનાલ્ડ ટ્રમ્પે રક્ષા બજેટ વધારીને 1.5 ટ્રિલિયન ડોલર કરવાનો સંકેત આપ્યો, જાણો શું છે પ્લાન