પાકિસ્તાનમાં આતંકવાદને સરકાર અને સેનાનું સમર્થન, ભારત ઇચ્છે છે આતંકનો અંત: વિદેશમંત્રી જયશંકર

વિદેશમંત્રી એસ. જયશંકરે પાકિસ્તાન પર આકરા પ્રહારો કરતાં કહ્યું કે, પાકિસ્તાનમાં આતંકવાદને ત્યાંની સરકાર અને સેનાનું સીધું સમર્થન છે. તેમણે સ્પષ્ટ શબ્દોમાં જણાવ્યું કે, જો સરહદ પારથી આતંકવાદી હુમલાઓ ચાલુ રહેશે, તો પાકિસ્તાને ગંભીર પરિણામો ભોગવવા પડશે.

પાકિસ્તાનમાં આતંકવાદની હકીકત

નેધરલેન્ડ્સના હેગમાં મીડિયા સાથેની વાતચીત દરમિયાન જયશંકરે પાકિસ્તાનના આતંકવાદી માળખા પર સવાલ ઉઠાવ્યા. તેમણે કહ્યું, “એવું શક્ય નથી કે પાકિસ્તાનમાં આતંકવાદ ફેલાતો હોય અને સરકારને તેની ખબર ન હોય. જો એમ્સ્ટરડેમ જેવા શહેરમાં હજારો લોકો લશ્કરી તાલીમ લેતા હોય, તો શું સરકારને ખબર ન હોય? ના, આવું ન થઈ શકે.” તેમણે ઉમેર્યું કે, યુએનની પ્રતિબંધિત આતંકવાદીઓની યાદીમાં સામેલ કુખ્યાત આતંકવાદીઓ પાકિસ્તાનના મોટા શહેરોમાં દિવસના અજવાળે સક્રિય છે, અને આ બધું સરકાર અને સેનાની જાણકારી વગર શક્ય નથી.

ભારત-પાક યુદ્ધવિરામમાં ત્રીજા પક્ષની ભૂમિકા નહીં

આતંકવાદનો અંત લાવવાનો ભારતનો સંકલ્પ

પાકિસ્તાન સાથેના સંબંધોના કાયમી ઉકેલ અંગે વાત કરતાં જયશંકરે કહ્યું, “ભારત આતંકવાદનો ચોક્કસ અંત ઇચ્છે છે. જો પાકિસ્તાન તરફથી આતંકી હુમલાઓ ચાલુ રહેશે, તો તેના ગંભીર પરિણામો ભોગવવા પડશે.” તેમણે ઉમેર્યું કે, ભારત સરકાર આવા હુમલાઓનો કડક જવાબ આપવા માટે તૈયાર છે. “અમે આતંકવાદીઓ પર હુમલો કરીશું, અને આ ઓપરેશન ચાલુ રહેશે,” એમ તેમણે દ્રઢતાથી જણાવ્યું.

જમ્મુ-કાશ્મીર પર ભારતનું વલણ

જમ્મુ અને કાશ્મીરના મુદ્દે જયશંકરે ઐતિહાસિક હકીકતોનો ઉલ્લેખ કર્યો. તેમણે કહ્યું, “1947માં ભારત અને પાકિસ્તાનના વિભાજન વખતે જમ્મુ-કાશ્મીર ભારતનો હિસ્સો બન્યું હતું. પાકિસ્તાને ગેરકાયદેસર રીતે કબજે કરેલો વિસ્તાર તેના વાસ્તવિક માલિક, એટલે કે ભારતને, પરત કરવો જોઈએ.” તેમણે ભારપૂર્વક જણાવ્યું કે, પાકિસ્તાન સાથેની વાતચીત માત્ર આતંકવાદ અને પાકિસ્તાનના કબજા હેઠળના કાશ્મીરના મુદ્દે જ થશે.

ત્રણ દેશોની મુલાકાતનો હેતુ

જયશંકરની આ ટિપ્પણીઓ તેમની ડેનમાર્ક, જર્મની અને નેધરલેન્ડ્સની ત્રણ દેશોની મુલાકાત દરમિયાન આવી છે. આ મુલાકાત દ્વિપક્ષીય સંબંધોને મજબૂત કરવા અને આંતરરાષ્ટ્રીય મંચ પર ભારતનું વલણ સ્પષ્ટ કરવાના ઉદ્દેશ્ય સાથે હતી.

વિદેશમંત્રીએ પોતાની વાતને સમાપ્ત કરતાં કહ્યું, “પાકિસ્તાને આ વાત સારી રીતે સમજી લેવી જોઈએ કે આતંકવાદનો રસ્તો અપનાવવાના ગંભીર પરિણામો હશે. ભારત આતંકવાદનો અંત લાવવા માટે પ્રતિબદ્ધ છે, અને અમે આ માટે દરેક જરૂરી પગલાં લઈશું.”

આ પણ વાંચો- સેમસંગનો સૌથી સ્લીમ સ્માર્ટફોન ભારતમાં બનશે, Galaxy S25 Edgeનું ભવ્ય લોન્ચિંગ