ગુજરાતમાં આજે મેઘો મુશળધાર! દક્ષિણ ગુજરાતમાં અતિ ભારે વરસાદની આગાહી

Gujarat Weather Update: ગુજરાતમાં ચોમાસાએ ફરી એકવાર જોર પકડ્યું છે. હવામાન વિભાગે આજે, બુધવારે, દક્ષિણ ગુજરાતના જિલ્લાઓમાં અતિ ભારે વરસાદની આગાહી કરી છે. રાજ્યના મોટાભાગના વિસ્તારોમાં દરરોજ 150થી વધુ તાલુકાઓમાં હળવાથી ભારે વરસાદ નોંધાઈ રહ્યો છે, જેના કારણે ખેડૂતો અને નાગરિકો બંને સાવચેત રહેવા તૈયારી કરી રહ્યા છે.

દક્ષિણ ગુજરાતમાં ભારે વરસાદનું એલર્ટ

હવામાન વિભાગના તાજેતરના અપડેટ મુજબ, નર્મદા, સુરત, નવસારી, વલસાડ, દમણ અને દાદરા નગર હવેલીમાં આજે અતિ ભારે વરસાદની શક્યતા છે. મંગળવારે પણ આ વિસ્તારોમાં ભારે વરસાદે હાહાકાર મચાવ્યો હતો, જેના કારણે નીચાણવાળા વિસ્તારોમાં પાણી ભરાવાની સમસ્યા સર્જાઈ હતી.

આ ઉપરાંત, પંચમહાલ, દાહોદ, વડોદરા, છોટા ઉદેપુર, ભરૂચ, ડાંગ, તાપી, અમરેલી, ભાવનગર અને બોટાદમાં પણ ભારે વરસાદની આગાહી છે. આ જિલ્લાઓમાં ગાજવીજ સાથે વરસાદ પડવાની સંભાવના છે, જેના કારણે નાગરિકોને સાવચેતી રાખવાની સલાહ આપવામાં આવી છે.

ઉત્તર ગુજરાતના બનાસકાંઠા, પાટણ, મહેસાણા, સાબરકાંઠા અને અરવલ્લીમાં પણ આજે ભારે વરસાદની આશંકા છે. સૌરાષ્ટ્રના સુરેન્દ્રનગર, રાજકોટ, જૂનાગઢ, પોરબંદર, મોરબી, દ્વારકા, ગીર સોમનાથ, બોટાદ, દીવ અને કચ્છમાં ગાજવીજ સાથે હળવાથી મધ્યમ વરસાદની આગાહી કરવામાં આવી છે.

આ વરસાદી સિસ્ટમની અસરથી રાજ્યના ઘણા ડેમોમાં પાણીની આવક વધી છે, પરંતુ નીચાણવાળા વિસ્તારોમાં પૂરનો ખતરો પણ વધ્યો છે. નવસારીમાં પૂર્ણા નદી ભયજનક સ્તરે બહેતી હોવાથી સ્થાનિક વહીવટી તંત્ર એલર્ટ પર છે.

ખેડૂતો અને ઓથોરિટી માટે ચેતવણી

આગાહીને ધ્યાનમાં રાખીને ખેડૂતોને તેમના પાકની સુરક્ષા માટે તૈયારી કરવાની સલાહ આપવામાં આવી છે. સ્થાનિક વહીવટી તંત્રે પણ નીચાણવાળા વિસ્તારોમાં રહેતા લોકોને સુરક્ષિત સ્થળે ખસેડવાની તૈયારી શરૂ કરી છે. હવામાન વિભાગે નાગરિકોને બિનજરૂરી મુસાફરી ટાળવા અને સાવચેતી રાખવા અપીલ કરી છે.

આગામી દિવસોમાં હવામાન

હવામાન વિભાગના જણાવ્યા અનુસાર, આગામી પાંચ દિવસ સુધી ગુજરાતમાં વરસાદી માહોલ યથાવત રહેવાની શક્યતા છે. ખાસ કરીને દક્ષિણ ગુજરાત અને સૌરાષ્ટ્રમાં વરસાદનું જોર રહેશે.

આ પણ વાંચો- Bridge Collapse: મુજપુર ગંભીરા બ્રિજ ધરાશાયી, વાહનો નદીમાં ખાબક્યા, 3ના મોત