Hurun Global Rich List 2026: ભારતમાં 57 નવા અબજોપતિ બન્યા, મુકેશ અંબાણી ફરી બન્યા એશિયાના સૌથી અમીર વ્યક્તિ

Hurun Global Rich List 2026: તાજેતરમાં જ Hurun Global Rich List 2026 જાહેર કરવામાં આવી છે, જેમાં ભારત માટે ખૂબ જ સારા સમાચાર છે. આ રિપોર્ટ અનુસાર, આ વર્ષે ભારતના અબજોપતિઓની ક્લબમાં મોટો ઉછાળો જોવા મળ્યો છે. દેશમાં 57 નવા અબજોપતિઓ બન્યા છે, જેની સાથે ભારતમાં કુલ અબજોપતિઓની સંખ્યા 308 થઈ ગઈ છે. હવે ચીન અને અમેરિકા પછી ભારત આખી દુનિયામાં અબજોપતિઓનું ત્રીજું સૌથી મોટું હબ બની ગયું છે.

ભારતીય અમીરોની સંપત્તિ ચીન કરતા પણ વધુ

આંકડાઓ પર નજર કરીએ તો ભારતીય અબજોપતિઓની કુલ સંપત્તિ લગભગ 112 લાખ કરોડ રૂપિયા સુધી પહોંચી ગઈ છે. સૌથી ખાસ વાત એ છે કે, ભારતીય અબજોપતિઓની સરેરાશ સંપત્તિ ચીનના અબજોપતિઓ કરતા પણ વધારે છે. ભારતના અબજોપતિઓની સરેરાશ સંપત્તિ 36,570 કરોડ રૂપિયા છે.

આ રિપોર્ટમાં એ પણ જણાવાયું છે કે 199 ભારતીય અબજોપતિઓની સંપત્તિમાં વધારો થયો છે, જ્યારે 109 લોકોની સંપત્તિ ઘટી છે અથવા તેમાં કોઈ જ ફેરફાર થયો નથી. કેટલાક લોકો આ વર્ષે અબજોપતિની યાદીમાંથી બહાર પણ થઈ ગયા છે.

મુકેશ અંબાણી (નંબર 1): રિલાયન્સ ઇન્ડસ્ટ્રીઝના ચેરમેન મુકેશ અંબાણીએ ભારત અને એશિયાના સૌથી અમીર વ્યક્તિ તરીકેનો પોતાનો તાજ જાળવી રાખ્યો છે. તેમની સંપત્તિમાં 9% નો વધારો થયો છે અને તે લગભગ 9.8 લાખ કરોડ રૂપિયા થઈ ગઈ છે.

ગૌતમ અદાણી (નંબર 2): અદાણી ગ્રુપના ગૌતમ અદાણી બીજા ક્રમે છે. આ વર્ષ દરમિયાન તેમની કુલ સંપત્તિ લગભગ 7.5 લાખ કરોડ રૂપિયા રહી છે.

રોશની નાદર મલ્હોત્રા (નંબર 3): HCL ટેક્નોલોજીસના રોશની નાદર મલ્હોત્રા અને તેમનો પરિવાર 3.2 લાખ કરોડ રૂપિયાની સંપત્તિ સાથે ત્રીજા સ્થાને છે. ખાસ વાત એ છે કે ટોપ 10 અમીરોમાં તેઓ એકમાત્ર મહિલા છે.

સાયરસ પૂનાવાલા (નંબર 4): સીરમ ઇન્સ્ટિટ્યૂટ ઓફ ઇન્ડિયાના પ્રમોટર સાયરસ પૂનાવાલા અને તેમના પરિવારની સંપત્તિમાં 44% નો જંગી ઉછાળો આવ્યો છે. 3 લાખ કરોડ રૂપિયાની સંપત્તિ સાથે તેઓ ચોથા સ્થાને પહોંચી ગયા છે.

મુંબઈમાં સૌથી વધુ 95 અબજોપતિઓ

શહેરોની વાત કરીએ તો, ભારતમાં મુંબઈનો દબદબો હજુ પણ કાયમ છે. મુંબઈમાં કુલ 95 અબજોપતિઓ રહે છે. જોકે, એશિયાના અબજોપતિઓની રાજધાનીનો તાજ મુંબઈએ ચીનના શેનઝેન શહેરના હાથે ગુમાવ્યો છે. તેમ છતાં, આ વર્ષે મુંબઈમાં 15 નવા અબજોપતિ ઉમેરાયા છે, જે ન્યૂયોર્ક (14) અને લંડન (9) કરતા પણ વધારે છે.

હેલ્થકેર સેક્ટરે બનાવ્યા સૌથી વધુ અમીર

આ રિપોર્ટમાં અલગ અલગ સેક્ટરની વાત કરવામાં આવી છે:

હેલ્થકેર: આ સેક્ટરમાંથી સૌથી વધુ 53 નવા લોકો અબજોપતિ બન્યા છે.

અન્ય સેક્ટર: ત્યારબાદ ઇન્ડસ્ટ્રીયલ પ્રોડક્ટ્સમાંથી 36 અને કન્ઝ્યુમર ગુડ્સમાંથી 31 નવા લોકો લિસ્ટમાં જોડાયા છે. ઓટો કમ્પોનન્ટ્સ અને ફાઇનાન્શિયલ સર્વિસીસમાંથી પણ ઘણા લોકો આવ્યા છે.

એનર્જી સેક્ટર: આ સેક્ટરમાંથી માત્ર 8 નવા લોકો જ જોડાયા છે, પરંતુ તેઓએ 18.3 લાખ કરોડ રૂપિયાની જંગી વેલ્થ બનાવી છે, જે ભારતના કુલ અબજોપતિઓની સંપત્તિના 16% જેટલી થાય છે.

સૌથી યુવા અબજોપતિ

આ લિસ્ટમાં ભારત તરફથી સૌથી નાની ઉંમરના અબજોપતિ બનવાનું બહુમાન OYOના ફાઉન્ડર રીતેશ અગ્રવાલને મળ્યું છે. માત્ર 32 વર્ષની ઉંમરે તેમની નેટવર્થ 14,440 કરોડ રૂપિયા નોંધાઈ છે.

હુરુન ગ્લોબલ રિચ લિસ્ટ 2026 એ સાબિત કરે છે કે ભારતની ઇકોનોમી ખૂબ જ ઝડપથી આગળ વધી રહી છે. નવા સેક્ટર્સમાંથી ઉભરી રહેલા અબજોપતિઓ દેશના આર્થિક વિકાસની નવી કહાની લખી રહ્યા છે.

આ પણ વાંચો- શેર બજારમાં ‘બ્લેક ફ્રાઈડે': સેન્સેક્સ 1100 પોઈન્ટ તૂટ્યો, રોકાણકારોના એક જ દિવસમાં 3 લાખ કરોડ સ્વાહા